Yobbu 37 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ “Sino syosi sikera omwooyo kwaange kwateengereha, mani kwatula mu bwiihalo bwakwo.

² Muwulire ohwaaduluha hw'ekono lya Nasaae, neende ohubuluula hutula mu munwa kwae.

³ Nasaae asiindihaanga olumesu luhalania ekulu lyoosi, haandi ohumesamesa hwalwo hwoola hu enyaande choosi ech'esyaalo.

⁴ Olumesu niluwa, n'ohuwoola hw'ekono lyae huwuliirihana; Nasaae yaaduluhana neende ekono lyae litiisa mani olumesu lwemeeda alala neende ohwaaduluhana hw'ekono lyae.

⁵ Ohwaaduluhana hw'ekono lya Nasaae huwukisa; ahola ebiindu by'amaani bi hutanyala ohumanya.

⁶ Olwohuba aboolera efula y'amakina ati, ‘Kwa hu syaalo’; neende ebireesi by'efula ati, ‘Kwa neende amaani.’

⁷ Mani Nasaae yaakamya emirimo kya buli muundu, hu baandu boosi bamanya ebiindu bi anyala ohuhola.

⁸ Mani ebisolo byoosi nibichia yi byeekisaanga, nibihaira mu meena kabyo.

⁹ Esifuusye situla emwaalo, haandi obunyifu butula emukulu.

¹⁰ Nasaae afuuta omuuya mani kwaanyisa amaachi, mani amaachi keehola amakina bwaangu muno.

¹¹ Nasaae yeechusa ebireesi neende omunyisi; ebireesi bisalaania ohumesamesa hwae.

¹² Ebireesi byebodoohania Nasaae n'abilagiire, biholera huhulagira hwae, buli abuundu yi bichiira.

¹³ Ebiha biindi Nasaae akwiisa efula ohusaandya abaandu, oba ohuchuhiirisa esyaalo, oba ohweekesa abaandu ati yabaheera.

¹⁴ “Ewe Yobbu, bulira sino; buleera mani obaase hu biindu by'amaani bi Nasaae ahola.

¹⁵ Omanyire koti lu Nasaae abitaaho elako lyae, mani yaakera olumesu lw'ebireesi lwae lwaaduha?

¹⁶ Omanyire koti ebireesi byereeraanga mu bbaanga, ohweekesa koti lu mulimo kwa Nasaae kw'amaani haandi koti lwaali ow'amakesi k'aakulu muno?

¹⁷ Ewe otubuhira oluuya muungubo chao esyaalo nisichuule obubafu olwohuba omuyaka kuwuucha nikutulira emwaalo.

¹⁸ Ewe onyala ohuhoonyaho Nasaae ohulandaasa ekulu, lyooma lyaaba koti esichuma sing'enaang'ena?

¹⁹ Tweekese bi hunaboolere Nasaae; abulao esiindu sihumanyire, huli koti abaandu bali mu siirima.

²⁰ Banaamuboolere bati ndaha ohulomalomaho nae? Aliwo omuundu owekoomba ati asihiriswe?

²¹ “Nae bulaanu abaandu haba si badaha ohutingaala hu bulafu ekulu niling'enaang'ena, omuyaka nikumalire ohuwuucha ebireesi mani ekulu nililabire.

²² Emukulu niyo yi humilaa-milana huli koti esaabbu hutula; mani oluyaali lwa Nasaae lwaatwiichusa obuti.

²³ Omunyala w'ebiindu byoosi, haba sihunyala ohusuda aambi nae; muhunuufu mu maani neende mubwadyeeri, haandi saacha ohudoondobania obuluungifu buungi.

²⁴ Sakira abaandu bamutya; s'adeeba hu abo ababaasa abeene bati bakesi nibo.”