Yobbu 36 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Haandi Elihu yachiiririra ohulomaloma n'aboola ati,

² Hola niwuundesimiirisaho budiidi, njia ohuhweekesa, olwohuba siriwo esiindu si ndaha ohuhuboolera hulwa Nasaae,

³ Olwohuba mubwadyeeri bweene emboosi chaange haba sichobubacha, haandi njia ohubeekesa endi Omuloongi waange muluungifu niye.

⁴ Mubyadyeeri bweene haba siimbacha; olwohuba omukesi mweene ali naawe.

⁵ Bone, Nasaae ali neende amaani, haandi saalekeeresa omuundu yeesi; haandi sibulao esiindi syataamanyire.

⁶ Haba s'alehaanga ababi bayiindira, haandi aberesaanga abafwiinyirirwa ebiindu bi bahoyera.

⁷ Ahiingakiriraanga abaluungifu, haandi abahola batuka koti abatuki mani abaleha banyoola oluyaali endaalo choosi.

⁸ Nae abaandu nibaba nibaboyerwe mu minyorooro, nibasaanda hulw'ebiindu bi bahola,

⁹ Nasaae amalaanga abeekesa ebyonoono byaabwe bi bahola, neende esuunga yaabwe.

¹⁰ Yeekulaanga amatwi kaabwe bawulira koti aboolobya, neende ohubalagira ati batule mu bibi byaabwe.

¹¹ Nae nibawulira mani bamuhalaabanira, bachia ohumalaanga obulamu bwaabwe nibali neende edeembe, haandi emyaaka kyaabwe nibali neende ehabi nyiingi muno.

¹² Nae nibatawulira, bachia ohusihiiriswaanga neende olugaanga, mani bafwa nibataali neende amakesi.

¹³ “Abo abatatya Nasaae babiraanga etima mu myooyo kyaabwe; kata bahasaanda batye haba sibasabaanga obuhoonyi.

¹⁴ Bafwa nibasisiiri abaraaga, haandi obulamu bwaabwe bumaliirihiraanga mu soni.

¹⁵ Nae Nasaae yeekesa abaandu naabitira mu husaanda hwaabwe, haandi yehoonyesera ebidinyu ohwiikula amatwi kaabwe.

¹⁶ Nasaae yahutusa mu bidinyu mani yaahuhola wanyoola esangaalo, haandi yaata hu meesa yao ebyohulya binyunyuula.

¹⁷ Nae bulaanu bahuheengeere omusaango mu bwiichufu nasilala koti abonooni; ohuheenga omusaango alala neende obwadyeeri bihukwiireho.

¹⁸ Weliinde mani ohaye ohubachwa neende obuyiinda; haandi otakanya obuyiinda bwahunyaasa.

¹⁹ Obaasa oti ohulira hwao hunahutusa mu husaanda, oba amaani kao koosi ohuhuwonia ohusaanda?

²⁰ Otekoomba esiro ohwoola, ebiha bi baandu basihirisirwamo ohutula mu bwiihalo bwaabwe.

²¹ Wehaliirise, mani ohaye ohwonoona, olwohuba sino nisyo sy'odoolere mu bweyaango bw'ohusaanda.

²² Bona, koti lu Nasaae ali neende amaani maangi; wiina owahamwoolaho mu hweekesa?

²³ Wiina omuboolera esy'ohuhola, oba wiina onyala ohumuboolera ati, ‘Oholere esyonoono’?

²⁴ “Yichulisa ohumufumiaanga hulw'ebiindu bi yahola, bi baandu beemba nibakinia.

²⁵ Abaandu boosi basibona; abaandu babibonera eyale.

²⁶ Bona, Nasaae koti lu ali ow'amaani, nae haba sihumumanyire; obuungi bw'emyaaka kyae haba sibumanyihana.

²⁷ Olwohuba adaya amatoonde k'amaachi, mani akahola kaba ohutoonya hw'efula

²⁸ ka ebireesi bikwiisa aasi efula, mani yaakwiira abaandu mu buungi.

²⁹ Aliwo omuundu yeesi omanyire koti ebireesi bisalaanaanga muukulu, oba ohwaaduluhana hw'ekulu lyae?

³⁰ Bona, asalaaniaanga ohumesamesa hw'ekulu ohumweebodoohania, mani afuuniha ebusiba w'enyaanja neende esiirima.

³¹ Olwohuba aheengeraanga abaandu omusaango ohweema hu bino; mani naliisa abaandu ebyohulya mu buungi.

³² Adiiraanga olumesu mu mahono kae, mani alulagira ohuubba abuundu bweene.

³³ Ohwaaduluhana hw'ekulu hweekesaanga huti omuyaka kuli ohwiicha, mani eng'oombe chosi chimanya chiti omuyaka kuli ohwiicha,