Yobbu 34 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Elihu yeemao yaaboola ati,

² “Muwulire emboosi chaange, eng'we abasaacha bakesi, haandi mundekeerese, eng'we abamanyire ebiindu;

³ olwohuba omuundu yawuula emboosi endai neende eyitaali endai ohweema hu bi awuliire koti olulimi lu lwaawula ebyohulya binyunyuula neende ebichalaafu.

⁴ Lehe hukabuhanie esyadyeeri; lehe abeene huheengeo si hubona huti silai.

⁵ Olwohuba Yobbu aboola ati, ‘Mbulaho omusaango, nae Nasaae yaandusaho ebiindu bilai;

⁶ Kata ndahaba ni ndi omulai, naangwa omubacha; kata neende niimbulaho omusaango, nae nyaalirwe muno.’

⁷ Yobbu muundu w'engeri siina, owekotyoombera obulekeeresi koti ong'wa amaachi,

⁸ adaha muno ohuba alala neende abonooni haandi akeendaanga neende abonooni.

⁹ Olwohuba aboolere ati, ‘Abulao esiindu si muundu anyoola naahola ebisaangaasa Nasaae.’

¹⁰ “Mani sakira muteke amatwi muumbulire, eng'we abasaacha abategeera, sisinyalihana nabudiidi Nasaae ohuhola esiindu sitahoyera, haandi Omunyala w'ebiindu byoosi haba saanyala ohuhola esiindu sibi.

¹¹ Olwohuba Nasaae yahabe omuundu omukabo kwae ohweema neende ebiholwa byae, haandi omuundu yahabone ati esiindu sy'anyoolere sihoyerwa ebiima byae.

¹² Syadyeeri syeene mbwe Nasaae haba saholaanga esiindu sibi, haandi Omunyala w'ebiindu byoosi haba sa fwiinyiriraanga omuundu yeesi mu huhalaka omusaango hwae.

¹³ Wiina owamuba obunyala bw'ohuliindaanga esyaalo haandi wiina owamudiisa esyaalo syoosi?

¹⁴ Nae Nasaae n'aheengao ohwekobosera omweene omwooyo kwae, haandi yefunyisira omuuya kwae kwobulamu,

¹⁵ buli siindu silamu siba sichia ohusihiriha, mani abaandu bahakobole mu loba haandi.

¹⁶ “Nimuli ab'amakesi, mubulire sino; mutekeerese bi mboola.

¹⁷ Omuundu otadaha obwadyeeri mani anyala yaatuka? Wahayaasa omuluungifu haandi ow'amaani omusaango mani waamuhira?

¹⁸ Oyo oboolera omutuki ati, ‘Obula obuhoonyi,’ neende abaami ati, ‘Muli babi’;

¹⁹ niye oyo oteehubira mani yakwiira abaami, oba yaadaha abayiinda ohuhira abamanani, olwohuba Nasaae niye owabaloonga boosi.

²⁰ Musiiha silala nibafwa sa; nae akatikaati w'esiro abaandu badengaanisibwa mani baasihirira, mani abaandu b'amaani batuswao naabulao omuundu obadiirireho.

²¹ “Olwohuba Nasaae atingaala engeri yi muundu yeebisiramo, haandi abona buli abuundu yachiira.

²² Abulao esiirima, kata syahaba esy'amaani sitye yi bahola-mbi banyala ohweekisa Nasaae.

²³ Olwohuba haba sisihoyera mbwe Nasaae aboolere omuundu yeesi ebiha hu amale achie yaali ohumuheengera omusaango.

²⁴ Nasaae haba saateberesaanga mberi hu amala atusao ab'amaani, mani akobosao abaandi mu bweyaango bwaabwe.

²⁵ Olwohuba amanyire ebiholwa byaabwe, abasukuna mu siro silala mani baasihirira.

²⁶ Abahuyira mu moni w'abaandu hulw'ebyonoono byaabwe,

²⁷ olwohuba baleha ohumuloondaho, haandi baahaya ohudeeba hu malako kae,

²⁸ mani bakera amaliro k'abamanani kamwoolaho, mani yaabulira ohulira hw'abaandu basaanda.

²⁹ Nasaae mani n'aheengao ohubuleera, wiina onyala ohumuheengera omusaango ohumuhira? Naheengaho ohweekisa, wiina onyala ohumubona, oba syahaba esyaalo kose omuundu?

³⁰ Omuundu otatya Nasaae, haba s'ahoyeere ohutuka, hu ahaye ohusukuna abaandu mu muteego.

³¹ “Olwohuba aliwo omuundu owaboolera Nasaae ati, ‘Saandire muno; haba siinja ohwonoona haandi;

³² njekese ebiindu bi tabona; niimba nindahola esyonoono, haba sisikobolamo ohusihola.’

³³ Obaasa oti nasaae achia ohuhuleha, olwohua wekaana oti obula omusaango? Mani omweene heengao, nae ataali ese; sakira boola sy'omanyire.

³⁴ Abaandu bamanyirifu bachia ohumboolera, neende buli muundu olimo amakesi owulira ebyaange achia ohumboolera:

³⁵ ‘Yobbu alomaloma byaataamanyire, emboosi chae chibulamo amakesi.’

³⁶ Yobbu aba niyaoseswa bulai, muba mwabona muti akobolamo koti omuhola-mbi.

³⁷ Olwohuba ameeda obujeemu hu bibi byae; yeema akatikaati weefwe, mani yemeeda ohulomaloma bubi hu Nasaae.”