Yobbu 24 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ “Lwasiina Omunyala w'ebiindu byoosi haba sataao ebiha by'ohuheengeramo omusaango, haandi lwasiina abaandu bamumanyire haba siboola hu ludaalo lwae?

² Baluwo abaandu beeya amahoni k'enjaho; bayaaya ebyaayo mani babituka koti ebyaabwe.

³ Banyuula abaana bafwiirwe esuhiri chaabwe; bahayira hu endaawu chi bahasi bafwiirwe chibabasiingira.

⁴ Basiindiha abamanani nibabatusa hu ngira; abamanani bohu syaalo boosi abeene beekisa sa.

⁵ Bone, abamanani bali koti esuhiri ndeende mu sichiimi bali eyo nibahalaabana, nibakoonya esyohulya mu siparara si banaaberese abaana baabwe.

⁶ Mu ndalo chitaali echaabwe nimwo mu babuusa ebyohulya by'esolo chaabwe mani banoka emisabbiibbu ch'omuhola-mbi.

⁷ Esiro syoosi beeyalisa esyeekenye, nibabula esy'ohwebwiiha, haandi babula esiindu sy'ohwebwiiha mu mboo.

⁸ Efula yomu ngulu yibahubba yabadosa, mani befwiinyirira hu makina nibakoonya owehwiyikama.

⁹ (Baliwo abo abatusa abaana bafwiirwe hu mbeere, mani babukula abaana badoto koti esiindu sisiingwa.)

¹⁰ Abamanani bakeenda esyeekenye nibabula esy'ohwefwaala; bakiinga engaano yi bakesere, nae sibulao esiindu si balya;

¹¹ badiinya amafuta ohutula mu misaala ky'emiseituuni ky'abonooni; haandi banyuha efiini mu bibbaahiro, nae haba obuluwo bubeeta nibataahoombereho.

¹² Abamanani bang'orootanira mu siko nibafwa, haandi abanyaalirwe balira nibakoonya obuhoonyi; nae Nasaae haba s'adeeba hu husaba hwaabwe.

¹³ “Aluwo abo abajeemera obulafu, abatanalana neende engeri chaabwo, mani bahaya ohudoong'a mu ngira chaabwo.

¹⁴ Omwiiti asiingira mu siirima, n'adaha ohwiita omumanani neende obula obuhoonyi; nae musiro ali koti omwiibi.

¹⁵ Emoni ch'omucheke chosi chiliinda esiirima sidiire, n'aboola ati, ‘Abulao omuundu ochia ohuumbona’; mani yebwiiha mu moni.

¹⁶ Badomola ebida by'enyuumba mu siirima; nae esideete beeyikalirao; mani baahaya ohubona obulafu.

¹⁷ Boosi batya obulafu bw'esideete; olwohuba banalana neende ebitiisa byomu siirima.

¹⁸ “Muboola muti, ‘Bahulukuswa baayirwa neende omuhula kw'amaachi; omukabo kwaabwe kuli mu byaalo byabwaabwa; abulao omuundu ochiira ena ndalo chaabwe ch'emisabbiibbu ohuhalaabana.

¹⁹ Koti esiminyu neende omubasu bimalao amaachi k'omunyiti; nilwo lu makoombe kamalao abonooni.

²⁰ Kata bang'inaabwe babeebirira; eliita lyaabwe bulaanu haba siliichuliswa; nilwo lu bahola-mbi bafunakwa koti omusaala.’

²¹ “Basaandya omuhasi mukuumba otebulaangaho, haandi bahaya ohuhoonya omuhasi mufwiirwe.

²² Nae Nasaae neende amaani kae akera omuundu w'obunyala buungi yaayiindira; mani basiingira nibasinyiihe obulamu.

²³ Nasaae abaleha baamenya ataali obudinyu bwoosi, mani yaabahoonya; nae yewuunja engeri chaabwe koti lu chiri.

²⁴ Banyoola oluyaali ohumala esiha sidiidi sa, mani bamala baakotao; bahooha mani boomerera koti esaafu; bahalakwa koti emitwe ch'engaano.

²⁵ Nibitaali bityo, wiina mweene ochia ohuboola ati ndi omubacha, mani yeekesa ati bi mboola bibulao obwadyeeri?”