Yobbu 23 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yobbu

¹ Nae Yobbu yakobolamo ati:

² “Olwaalero lwosi, ohwekanyiirisa hwaange hunjuuna, omuhono kwa Nasaae kuhayiireho, haba siinyala ohwesimiirisa.

³ Eee, mba nindamanya yi ndahamunyoola, ndaheechere mani ndoola eyiri obwiihalo bwae!

⁴ Mani ndaamweekesa amaliro kaange, mani ndahamuliriire ataali ohulehao esiindu syoosi.

⁵ Ndaheekere bi Nasaae yahangobolemo, haandi ndaamanya bi yahambooleere.

⁶ Nasaae yahehoonyeere obunyala bwae neende amaani kae ohusoolania? Haba daawe; yahatekeerese yawulira bi mboola.

⁷ Eyo omuundu muluungifu yahawosere nae, omuheengi waange w'omusaango yahaweene ati mbulaho omusaango mani yandehuula.

⁸ “Bone, ndemeeda mu moni, nae abulayo; haandi suda enyuma, nae haba simubona;

⁹ mukoonyera hu muhono mukaada, nae haba simubona; ngaluuhana hu muhono muluungi, nae haba simubona.

¹⁰ Nae Nasaae amanyire engira yi ndiho; naaba n'amalire ohundeema, njia ohutulayo nindabire koti esaabbu.

¹¹ Ngeendera mu malako kae; ngaliindire haandi haba sindahakatuleho.

¹² Haba sindulaangaho hu malako ka Nasaae yamboolera; ndabiiha mu mwooyo kwaange emboosi chae.

¹³ Nae Nasaae haba sakaluuhana daawe, haandi abulao onyala ohumukaluuhania. Buli siindu si yekoomba syoosi, nisyo syaahola.

¹⁴ Olwohuba achia ohwooseresa esiindu si yandekehera; haandi ebiindu biingi koti ebyo biri mu bibaaso byae.

¹⁵ Sakira obuti bundiira ohweema mu moni wae; niimubaasaho, obuti buli neende ohuundiira yaali.

¹⁶ Nasaae yaandelalihiriise, omwooyo kwaange kuteengereha sa; Ow'obunyala bwoosi yangwisiremo oluteengo;

¹⁷ olwohuba esiirima sinjikaliire, haandi ebireesi bimali bimbwiihire mu moni.