Yobbu 22 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Enganiaaya Yohudatu 22:1—27:23 Elifaasi

¹ Elifaasi Omutemaani yakobolamo ati:

² “Omuundu anyala ohuba neende obuhoonyi hu Nasaae? Mubwadyeeri omuundu mukesi amaliraanga amakesi kae hu hwechiiririsa sa omweene.

³ Nooli omuluungifu, esyo siinyala ohusaangaasa ow'Obunyala bwoosi, oba obulamu bwao nibutaaliho esiindu sibahufwaambya, esyo simuhoonya siina?

⁴ Ahufwaambya olwohuba omwisaamo oluyaali, sakira ahuheengera omusaango?

⁵ Ebibi byao haba sinibyo ebiingi? Ebiholwa byao bibi haba sibyaakama.

⁶ Olwohuba bamwaanaamao bahusiingira ebiindu buhaya, haandi wabafwaalula engubo chaabwe waabaleha syeekenye.

⁷ Haba si waberesa abaandu baweeremo amaani amaachi k'ohung'wa, haandi wemaanga abaandu balumwa enjala ebyohulya.

⁸ Ewe wehoonyera amaani kao ohunyuula eloba, mani abaandu b'odaha boong'ene nibo abadoong'amo.

⁹ Weetusa hu bahasi bafwiirwe mani waahaya ohubahoonya, nae wasaandya abaana bafwiirwa laatang'ene mani waabanyuula ebiindu byaabwe.

¹⁰ Mani sakira emiteego kihwebodohaanie, haandi ebiindu bitiisa bihukwiireho.

¹¹ Obulafu bwao bweeholere esiirima ohaye ohubona, haandi emihula ky'amaachi kihuhulukusaho.

¹² “Nasaae haba saali aakulu Muukulu? Bona eng'ining'ini ch'aakulu muno koti lu cheeyaniha!

¹³ Sakira weteeba oti, ‘Siina syeene si Nasaae amanyire? Anyala ohuheenga omusaango mu siirima sya titititi?

¹⁴ Ebireesi bimali bimubwiihire, ahaye ohubona, mani akeenda muukulu.’

¹⁵ Ewe odaha ohwoomiirira hu biima bihale bi bahola-mbi beeyiriramo?

¹⁶ Batuswao endaalo chaabwe nichisisiiri ohwoola; omusiingi kwaabwe kwayirwa neende omuhula.

¹⁷ Baboolera Nasaae bati, ‘Tulehe hube,’ haandi bati ‘Ow'Obunyala bwoosi anaatuhole siina?’

¹⁸ Nae bone, Nasaae niye owiichusa enyuumba chaabwe neende ebiindu bilai, nae ohukeraka hw'omuholi w'ebyonoono huli eyale naange.

¹⁹ Abaluungifu basibona mani baasaangaala; ababulaho omusaango babacheha sa,

²⁰ nibaboola bati, ‘Mubwadyeeri bweene abasuku beefwe basihiriswe, haandi omuliro kusaambire ebiindu bi baleha.’

²¹ “Fukiirisania neende Nasaae, mani obe mu muleembe; mani ochia ohunyoola ebiindu bilai.

²² Fukiirira Nasaae ahweekese, mani obiihe emboosi chae mu mwooyo kwao.

²³ N'okaluha eyiri ow'Obunyala bwoosi mani omweene weloongoyasa, niwebwaaba ebiindu bitaali ebiluungifu ohutula mu nyuumba yao,

²⁴ noosukuna efeesa mu lufu, neende efeesa ya Ofiri mu makina kali aasi w'omwaalo,

²⁵ waaleha ow'Obunyala bwoosi yaaba efeesa yao, haandi yaaba esaabbu yao y'engaanga;

²⁶ omweene ochia ohusaangaalira mu w'Obunyala bwoosi, mani otingaale Nasaae ataali ohutya hwoosi.

²⁷ Ochia ohumusaba, mani awulire; haandi ochia ohwooseresa ebyeeyamo byao.

²⁸ Ochia ohuheengangao esy'ohuhola, mani syoolerere koti lu odaha, mani obulafu bucha ohwaaduhaanga hu ngira chao.

²⁹ Olwohuba Nasaae yesaanga aasi ab'esuunga, nae awonia abaloonga.

³⁰ Nasaae awonia omuundu otaaliho omusaango; ewe ochia ohuwona ohweema hu buluungifu bwao.”