Yobbu 15 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Enganiaaya y'Elifaasi ypohubiri 15:1—21:34 Elifaasi

¹ Elifaasi Omutemaani yakobolamo ati:

² “Sihoyerwa omuundu w'amakesi ohukobolamo neende emboosi chibulamo amahuluundu, mani omweene yeyichusamo neende emboosi chiri koti omuyaka kuwuucha?

³ Mani ahoyere ayiingane neende enomanoma yitahoonya, oba mu mboosi echitamuhoonya?

⁴ Nae oli ohumalao ohwiisa oluyaali mu Nasaae, haandi oli ohukayira abaandu ohwebaasaho mu moni wa Nasaae.

⁵ Olwohuba emboosi chitula muhanwa wao cheekesa ebyonoono byao, haandi wehoonyera olulimi lw'obubalabalanu.

⁶ Omunwa kwao kweene nikwo okuhuheengera omusaango ohuhuhira, nae haba siniise; emboosi chao cheene nicho echihuheengera omusaango.

⁷ “Obaasa oti niiwe omuundu wataangira ohwiibulwa? Oba oti waliwo engulu nichisisiiri ohubaao?

⁸ Watekeeresaho endeesa ya Nasaae? Haandi obaasa oti niiwe omukesi weeng'ene?

⁹ Siindu siina syoomanyire si efwe hutaamanyire? Siindu siina syeene syoomanyire esitaali alafu yi huli?

¹⁰ Efwe huli neende abembuchi haandi abakofu, abahira laatao obuhuluundu.

¹¹ Ebiindu bi Nasaae ahuholera ohuhugumia nibyo byoolekeeresa oti bidiidi muno yooli, haandi waabisa emoni mu mboosi chae nyifu yooli?

¹² Lwasiina omwooyo kwao kuhutusao, haandi lwasiina omyuulamyuula emoni neende obwaalaba,

¹³ mani waanyoolerera Nasaae, nooleha emboosi chifwaana chiti ohutulaanga mu munwa kwao?

¹⁴ Omuundu niye siina, hwaabuleho esihyaamu? Oba oyo owiibulwa sa neende omuhasi, anyale ohuba omuluungifu?

¹⁵ Bona, Nasaae siyeesika kata aboolerefu bae, haandi kata ekulu silyoolerefu mu moni wae;

¹⁶ nae omuundu muhola-mbi haandi omudoondobanu yahake yeena ohuba omubi, omuundu ong'wa ebyonoono koti ong'wa amaachi!

¹⁷ “Tekeeresa, mani njia ohuhweekesa bi mbweene; haandi njia ohuhuboolera bi manyire

¹⁸ (ebiindu bi baandu b'amakesi baboolere, haandi bi bakuuka yaabwe bataakisire,

¹⁹ baberesa esyaalo sino boong'ene, mani omuteende yeesi yahaya ohubabitamo).

²⁰ Omuholi w'ebyonoono anyaahanira mubuchuuni endaalo chae choosi, oyo atadeeba hu baasye, asaanda emyaaka kyoosi.

²¹ Amakono katiisa kawuumira mu matwi kae; lwanyoleereho ebiindu bilai, ao nilwo lu munyaka amuchoomera.

²² Haba safukiirira ati achia ohukobola naatula mu siirima, haandi olugaanga nilwo olumulindirire.

²³ Ang'alaala erwaanyi n'akoonya esyohulya, n'ateeba ati, ‘Siri yeena?’ Amanyire ati oludaalo lw'esiirima luli aambi ohwoola;

²⁴ ebidinyu neende esaando bi mutiisa; mani byamusidoyera, koti omutuki yetekeheere ohulwaana.

²⁵ Olwohuba akoloole omuhono kwae mani yeetika hu Nasaae, mani yaajeemera Omunyala w'ebiindu byoosi,

²⁶ niyooma omutwe, mani n'adiira engabo hoongo ohulwaania Nasaae;

²⁷ olwohuba yebwiihire mu moni wae neende esuunga yae, haandi ahomeere mu sibuno syae,

²⁸ haandi amenyere mu biko bitaalimo abaandu, mu nyuumba chi muundu atahoyere ohumenyamo, echihoyere ohweehola ebituuli by'ebikoha;

²⁹ haba saacha ohuba omuyiinda, haandi emyaandu kyae haba sikicha ohuyiindira, haandi omweene haba saacha ohumala esiha sileeyi hu syaalo;

³⁰ saacha ohuwona esiirima; omuliro kuchia ohwoomia ebisina byae, haandi ebyaamo byae bicha ohubbuyuulwa neende omuyaka.

³¹ Leha ahaye ohwebacha omweene, mani yeesike ebiindu bitahoonya; olwohuba omukabo kwae kuchia ohuba ebiindu bitahoonya.

³² Achia ohukunyoola endaalo chae nichisisiiri ohwoola, haandi amasaga kae haba sikacha ohudoong'a nikali amabisi.

³³ Achia ohusisimula emisabbiibbu kyae kiteenga, koti omutuli, haandi asukune ebyaamo byae, koti omusaala museituuni.

³⁴ Olwohuba abo abateesa oluyaali mu Nasaae bachia ohuba abakuumba, haandi omuliro kuchia ohusaamba amayeema k'abaandu baliichaki.

³⁵ Beechuule ebibaaso bibi haandi bahola ebyonoono mani emyooyo kyaabwe kyetekeehe ohubacha.”