Yobbu 12 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yobbu

¹ Yobbu yakobolamo n'aboola ati:

² “Bwadyeeri, niing'we abaandu baachana, nimwahafwe sa muti, ni amakesi kaakama naang'we.

³ Nae ese syesi manyire sa koti lu eng'we mumanyire; haba simuuhiraho kata nabudiidi. Wiina mweene otamanyire ebiindu koti bino?

⁴ Ndeholere esyohucheha eyiri abeecha baange; ese, oliriraanga Nasaae mani yangobolamo, omuundu wadyeeri haandi obulaho esyonoono, bulaanu niise oweholere esiindu syohuchehwa.

⁵ Mu hubaasa hw'omuundu otaali neende ebidinyu, ohusaanda hweema hu sifune; bikwiira abo abahola ebyonoono.

⁶ Amadaala k'abanyaka kali bulai, haandi abo abanyoolesa Nasaae babula esibatiisa, abo abatuka banasaae baabwe.

⁷ “Nae teebaho ebisolo, mani bicha ohuhweekesa; amayoni komu miyaka, mani kachia ohuhuboolera;

⁸ oba ebimera byohu syaalo, bichia ohuhweekesa; neende eng'eeni chomu nyaanja chichia ohuhutuumbulira.

⁹ Mu biloonge bino byoosi, siina syeene esitaamanyire siti omuhono kw'Omwaami nikwo okwahola sino?

¹⁰ Obulamu bwa buli siindu silamu syoosi buli mu mahono kae neende obulamu bw'abaandu boosi.

¹¹ Omuundu nawulira emboosi, amatwi haba sikakabulamo endai neende embi koti lu yahalya ebyohulya mani yakabulamo ebirimo echamu neende ebichalaafu?

¹² Amakesi kaba ak'abahuluundu, nae ohumanya hweema hu huyiindira.

¹³ “Nasaae niye oli neende amakesi neende obunyala; niye oli neende endekeha neende ohumanya.

¹⁴ Nasaae nagemula, abulao onyala ohwoombaha haandi; oyo yi Nasaae yekalirao, abulao onyala ohumwiikulira.

¹⁵ Naabisa efula yaahaya ohukwa, esiminyu sibaao; nae nayileha yaakwa, n'omuhula kw'amaachi kuhulukusa hu syaalo.

¹⁶ Nasaae niye oli neende amaani neende amakesi; oyo obachwa neende obacha boombi bae nibo.

¹⁷ Amala mu beemirisi bohu syaalo amakesi, haandi abaheengi b'emisaango abahola baaba abasiru.

¹⁸ Adeembusa amaani k'abatuki, mani yomiisa esibiro chomu bibuno byaabwe.

¹⁹ Abalaamisi abamalamo amakesi, mani yaatusa obunyala hu batuki.

²⁰ Anyisa abo b'abaandu beesika, haandi amala amakesi mu bahuluundu.

²¹ Aleha balekeeresa abaana b'abatuki, mani yaakamya abaandu bali neende amaani.

²² Abwiihula ebiindu biri mu siirima siingi, mani yaakisula ebyeekisa mu siirima byaaba alafu.

²³ Nasaae niye ohusaahusania ebyaalo, haandi yabisihirisa: niye ohola ebyaalo byaaba eby'amaani, haandi niye obimalao.

²⁴ Nasaae niye omala amakesi mu batuki bohu syaalo, mani yakera bang'aabana mu siparara, omubula engira.

²⁵ Baaba mu siirima omutaali obulafu; mani yaakera badamaana koti abameesi.