Yobbu 1 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Sitaani ateema Yobbu

¹ Olwoola, yaliwo omusaacha mu syaalo sya Wusi, olaangwa ati, Yobbu. Omusaacha wuno yali omuundu abulaho esyonoono syoosi haandi omuluungifu, haandi owiisa oluyaali mu Nasaae; haandi owebwaaba ohwonoona.

² Yobbu yali neende abaana basyaani bataanu-na-babiri neende abaana bahaana badatu.

³ Yali neende amakoondi elifu chitaanu-na-chibiri (7,000), engamia elifu chidatu (3,000), eng'oombe endaawu emia chitaanu (500), neende esuhiri hasi emia chitaanu (500), neende abahalaabani baangi muno. Omusaacha wuno niye owali ahiramo obuyiinda mu syaalo sy'ebukwe syoosi.

⁴ Abaana bae basyaani bali baheera ohukeendaniraanga nibahola esidyaalo, mani balaangaanga bamboocho yaabwe badatu abo ohulya neende ohung'wa nabo.

⁵ Nae endaalo ch'esidyaalo syaabwe nichaweechaanga, Yobbu yabalaangaanga mani abata eyiri Nasaae ohubalabya. Yasimuhaanga echuli muno mani n'ayaana esiyaanwa sisaambwa ohuchianakana neende obuungi bwaabwe boosi; olwohuba Yobbu yaboolaanga ati, “Awuundi abaana baange banyala ohuba nibaaholere esyonoono, haandi nibeekaanire Nasaae mu myooyo kyaabwe ebiha by'esidyaalo ebyo.” Yobbu yaholaanga esiindu sino buli siha.

⁶ Olwoola, hu ludaalo luundi, abaana ba Nasaae beecha ohweyekesa eyiri Omwaami mani Sitaani yesi niyeecheramo.

⁷ Omwaami yateeba Sitaani ati, “Otula yeena?” Sitaani naakobola mu Omwaami ati, “Ndula ohung'alaala hu syaalo eyo neende era, nisyebodoohania.”

⁸ Mani Omwaami n'ateeba Sitaani ati, “Ombweeneereho omuhalaabani waange Yobbu?” “Abulao omuundu yeesi hu syaalo oli koti Yobbu, obulaho omusaango kwoosi, omuluungifu, owiisa oluyaali mu Nasaae haandi owebwaaba ohwonoona.”

⁹ Sitaani y'akobola mu Omwaami ati, “Obaasa oti Yobbu ahwiisaangamo oluyaali ataali esifune?

¹⁰ Wamuteerao olukaka ohumweebodoohania alala neende edaala lyae neende emyaandu kyae kyoosi. Buli siindu syaahola, ositaaho ehabi, mani emyaandu kyae kyemeedere mu syaalo.

¹¹ Nae bulaanu kololaho omuhono kwao, omutuseho emyaandu kyae, mani onaabone koti lu achia ohuhuhwebwaaba n'obona.”

¹² Omwaami yaboolera Sitaani ati, “Bona, mani buli siindu syaali nasyo siri mu bunyala bwao; ohumalaho, otamuholaho esibi syoosi.” Ao mani Sitaani yatula mu moni w'Omwaami.

Yobbu afwiirwa abaana bae neende emyaandu kyae

¹³ Lwaliwo oludaalo lu basyaani neende abahaana ba Yobbu bali nibaliira haandi nibang'weera efiini mu nyuumba y'omwaana waabwe muhuluundu;

¹⁴ mani wamwaanda niyeecha eyiri Yobbu, niyamuboolera ati, “Endaawu chibeere nichiri ohulima haandi esuhiri chibeere nichaayira aambi nacho.

¹⁵ Abasabbea baachikwaaho baachiyaaya, mani beehoonyera engaanga chaabwe ohwiita abahalaabani bao; niise syeeng'ene owonereo ohwiicha ohuhuboolera.”

¹⁶ Wuno niyali n'asilomalomaanga, omuhalaabani wuundi yoola niyeeruha embiro cheene, mani n'aboola ati, “Omuliro kwa Nasaae kwakuuhe nikutula Muukulu mani kwaasaamba amakoondi neende abaayi bako, mani kaasihiriya koosi; niise syeeng'ene owonereo ohwiicha ohuhuboolera.”

¹⁷ Wuno niyali n'asilomalomaanga, omuhalaabani wuundi yoola embiro cheene, mani n'aboola ati, “Abakalidaaya baholere emikaanda kidatu, mani baadiira engamia chao baachiyaaya, baheehoonyera embaanga chaabwe ohwiita abahalaabani bao; niise syeeng'ene owonereo ohwiicha ohuhuboolera”

¹⁸ Wuno niyali n'asilomalomaanga, omuhalaabani wuundi yoola embiro cheene, mani n'aboola ati, “Abaana bao basyaani neende abahaana babeere nibali ohulya neende ohung'wa mu nyuumba y'omwaana waabwe muhuluundu.

¹⁹ Nae bona, esifuusye sy'amaani siichire nisitula mu siparara, mani syaakiinga esoonda chine ch'enyuumba eyo, mani niyikwa hu baana baraaga abo, mani boosi nibafwa, niise syeeng'ene owoneremo ohwiicha ohuhuboolera.”

²⁰ Niyamala ohuwulira ako, Yobbu yasiingira, yetaandulaho ebyefwaalo byae, yebekaho efwiiri lyoosi, mani yaaguunama aasi, ohwiinamira Nasaae.

²¹ Yobbu yaboola ati, “Ndatula mu nda ya maama ni ndi syeekenye, haandi ndahakoboleo ni ndi syeekenye; Omwaami niye owamberesa, haandi Omwaami niye obukuule; leha eliita ly'Omwaami likinisibwe.”

²² Kata neende mu bidinyu byaakiire ao bityo, Yobbu haba siyaholaho esyonoono syoosi oba kata sa ohwoolobya Nasaae mu ngeri yosi.