Yisaaya 8 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omusyaani wa Yisaaya ohuba koti esilolero eyiri abaandu

¹ Mani Omwaami yamboolera ati, “Bukula esipaande sihoongo mani osyandiikeho mu nukuta hoongo oti: ‘Bya Maheeri-Salaali-Hasibbaasi’ ” Amahuluundu mbwe, Yaaya Bwaangu, myaasa Bwaangu.

² Mani ndeecha ndanyoola abaloli baange abeesikwa, Wuria omulaamisi neende Sakaria omwaana wa Yebberekia.

³ Mani ndaachia ndaaba alala neende omuhasi waange, mani yanyoola amabaanga yeebula omwaana musyaani. Mani Omwaami yamboolera ati, “Mukulihe eliita oti, Maheeri-Salaali-Hasibbaasi;

⁴ olwohuba omwaana oyo yahabe n'asisiiri ohumanya ohulaanga ati, ‘Laata’ oba ati, ‘Maama,’ obuyiinda bwa Damasiko neende ebyo byoosi bi Samaria syayaaya byahabe nibiyirirwe neende omutuki w'Asiiria.”

Omutuki w'Asiiria ali ohwiicha

⁵ Omwaami haandi yalomaloma naange ehabi liindi yaboola ati:

⁶ “Olwohuba abaandu bano bahayire amaachi k'omwaalo mudiidi kwa Siloa akahulukusa kaala, mani baweera mu husangaalira Resini neende Peka omwaana wa Remalia;

⁷ mani sakira, Omwaami ali ohubaleetera amaachi maangi haandi ak'amaani ak'Omwaalo kwa Ewufuraate, niye omutuki w'Asiiria neende oluyaali lwae lwoosi; amaachi ako kaheeche keechusa emitaro kya Buyudaaya kyoosi mani kadebeera hu magenya kakwo koosi.

⁸ Amaachi ako kahemeede mani kahulukusa ohwoola lu kahoole mu Buyudaaya. Kahemeede mani kaniina keechula ohwoola mu kosi; mani kahadebeere ohwoola lu kaheechuse obutakalafu bw'esyaalo syoosi, Ewe Emanueli.”

⁹ Eng'we abaandu, mwefunake, mani mwesiinduhe. Tekeerese, eng'we abaandu bomu byaalo by'eyale; mweetekehe ohulwaana, nae mutye; mweetekehe ohulwaana, nae mutye.

¹⁰ Muholere alala endekeha cheeng'we, nae haba sichichia hubitamo; Lomalome bi mudaha ohuhola, nae haba sibichia hwoolerera, olwohuba Nasaae ali naafwe.

Omwaami alabula omunabbi

¹¹ Olwohuba Omwaami yalomaloma naange neende obunyala bwae bw'amaani, yaandabula haye ohuloondakana neende engeri ch'abaandu bano, n'aboola ati:

¹² “Esyo si baandu bano balaanga oluhobo, si baandu bano boosi balaanga oluhobo, haandi otatya ebiindu bibatya, kata otawaamo omwooyo.

¹³ Nae Omwaami w'Obunyala, oyo niye yooba oyire koti omwoolerefu; niye yooba otye, haandi omwiiseengemo oluyaali.

¹⁴ Mani Omwaami niye ochia ohuba abuundu awoolerefu yi muchia ohuwoneramo, ekina lilwaania, haandi olwaanda lw'ohweegumulaho eyiri enyuumba choombi cha Yisiraeli, haandi omuteego neende oluhaanda eyiri abaandu bamenya mu Yerusalemu.

¹⁵ Mani abaandu abahandegumuleho; bahakwe mani baafuniha, bahatekwe mani bawaambia.”

Ohulabula ohudiira hu hweteeba hu misaambwa

¹⁶ Eng'we abaloondi baange, mudiirire elalira ebiindu bindabeekesa, haandi mwomiise endagaano yaange.

¹⁷ Njia ohuliinda Omwaami atuhoonye, kata ayahaba mbwe yekisire ab'enyuumba ya Yakobbo, njia ohuta esuubi lyaange mu Omwaami.

¹⁸ Bone, ese mbano neende abaana baange Omwaami bayaamberesa niifwe ebilolero neende eby'amayia mu Yisiraeli ohutula eyiri Omwaami w'Obunyala, owamenya hu Lugulu lwa Siyooni.

¹⁹ Mani nibababooleraanga bati, “Mweteebe hu balakusi neende hu baandu ab'eloko, abalira koti amayoni haandi abalomaloma ebyaama, haba simumanyire muti abaandu bahoyere ohweteeba hu Nasaae waabwe? Ebidiira hu bulamu bwaabwe byeetebwa hu bafu?”

²⁰ Mubakobolaangamo muti, “Hwomiirire hu Malako neende eby'ohuboneraho bi Nasaae yatuberesa.” Mutatekeeresa eby'abalakusi, olwohubi emboosi chaabwe haba sichikaira obudinyu ohukwaao daawe. Mubwadyeeri bweene, abo abalomaloma mani bahaya ohuba neende ebilolero byomiisa bi balomaloma, bahafwiire mu siirima obwiire nibutaahya.

Esiha sy'ebidinyu

²¹ Bahadikaane mu syaalo nibeyendehereere muno, haandi enjala niyibaluma; mani kata baheebwaabe omutuki waabwe neende Nasaae waabwe. Kata abahatiingaala aakulu;

²² oba batiingaala aasi hu loba, bone, sibulao sibahabone, ohutusaho engisa esiirima neende amatiichasi; mani baheeruswe bachie mu siirima sya titititi.