Yisaaya 7 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Emboosi Eyiri Omutuki Ahasi

¹ Mu ndaalo echio, Ahasi omwaana wa Yotamu, omwiichuhulu wa Wusiya, niyali n'atuka Buyudaaya, Resini omutuki wa Siria, neende Peka omwaana wa Remalia, niyali n'atuka Yisiraeli, aliwo baseeta Yerusalemu nibadaha ohusilwaania, nae nibibahaya ohusiwaamba.

² Nae ab'enyuumba ya Daudi nibawulira bati, “Siria syeyambaniisye neende Yisiraeli,” omwooyo kw'omutuki neende emyooyo ky'abaandu bae kyateengereha koti omuyaka kwahawuucha emisaala.

³ Mani Omwaami yeemao yaboobera Yisaaya ati, “Ewe neende omwaana wao, Seyari Yasubbu, muchie mubukaanane neende Ahasi, hu mutaro kw'amaachi kw'emukulu yikwakama, hu ngira ya naahuluungu eyichia mu Mukuunda kw'Omwoosi w'engubo.”

⁴ Mani mumuboolere muti, “Weliinde, oyenjeere, otatya daawe, haandi oteyendeherera wawaamo omwooyo.” Olwohuba etima lyalaba elya Resini neende Siria neende ely'omwaana wa Remalia, liri koti ebichihi bibiri ebiniooha omwoosi.

⁵ Olwohuba Siria, neende Yisiraeli neende omwaana wa Remalia, bahuliiremo olukwe, nibaboola bati,

⁶ “Lehe huchie huseete Buyudaaya mani husitiise-tiise, mani abeene husiwaambe, huteeo omwaana wa Tabeeli abe omutuki wasyo.”

⁷ Nae Omwaami Nasaae aboola ati; esyo haba sisichia hubaao, haandi haba sisichia hwoolerera daawe.

⁸ Olwohuba esiko sihoongo sya Siria nisyo Damasiko, haandi omutuki wa Damasiko niye Resini. (Nae mu myaaka amahumi kasasaaba neende kitaanu, Yisiraeli yahabe niyefunaake-funaakemo mu bituundu biingi, nisitadoong'ere esyaalo silala.)

⁹ Mani esiko sya Yisiraeli sihoongo nisyo Samaria, haandi omutuki wa Samaria niye omwaana wa Remalia. Nae nimuhaya ohufukiirira, mubwadyeeri bweene haba simuchia huyiindira.

Esilolero sya Emanueli

¹⁰ Haandi Omwaami yalomaloma neende Ahasi n'aboola ati:

¹¹ “Saba Omwaami Nasaae wao ahuberese esilolero; leha situle aasi emakoombe, oba aakulu muukulu.”

¹² Nae Ahasi yakobolamo ati, “Ese siinjia husaba esilolero, haandi siinjia huteema Omwaami daawe.”

¹³ Mani Yisaaya yaakobolamo ati, “Tekeerese mani, eng'we ab'enyuumba ya Daudi. Haba sisibamala ohujoong'ya abaandu babesimiirisa, haandi mwaadaha ohujoong'ya neende Nasaae waange yesi?

¹⁴ Mani sakira Omwaami mweene achia ohuhuberesa ahalolero. Bona, omuhaana otaamanyire eby'abasaacha achia ohunyoola amabaanga, mani yeebule omwaana musyaani, mani bachia ohumulaanga Emanueli.

¹⁵ Ebyohulya byae bichia ohuba amabeere neende obuuhi bw'enjuhi ohwoola lu yahamanye ohukabuhania akatikaati w'esyonoono neende esilai.

¹⁶ Olwohuba omwaana oyo n'asisiiri ohumanya ohuhaya esyonoono neende ohudoola esilai, ebyaalo by'abatuki babiri abali ohuhutiisa-tiisa bahabe nibabulamo abaandu.

¹⁷ Omwaami achia ohuhukwiisaho, ewe neende abaandu bao neende ab'enyuumba ya laatao ebidinyu ebihira ebyali nibikwiireo hooho hale ohwoola obwaami bwa Yisiraeli lu bwahakabuhane neende Buyudaaya. Omwaami achia ohubaleetera omutuki w'Asiiria.”

¹⁸ Ebiha ebyo nibyahoole, Omwaami achia ohulaanga Abamisiri beeyihe koti esiiye, nibatula hu mwaalo kwa Naili, neende Abasiria ohwiiyiha koti enjuhi, nibatula mu syaalo syaabwe.

¹⁹ Baheeche boosi mani baamenya mu mahooho k'emyaalo neende mu ng'uungu chomu makina, neende mu bichaha by'amawa, neende mu lwaayiro bw'ebisolo.

²⁰ Ebiha ebyo nibyahoole, Omwaami achia ohubeka efwiiri niyehoonyera ahamweeso ohutula engereha w'Omwaalo kwa Ewufuraate, ahamweeso aho niye omutuki w'Asiiria, mani achia ohubeka efwiiri lyohu mutwe, esirefu neende obwooya bwohu mubiri bwosi.

²¹ Ebiha ebyo nibyahoole, omuundu niyahabe nadoong'iisye eng'oombe neende amakoondi kabiri;

²² haandi olwohuba amabeere kachio maangi muno, achia ohusacha anyoolemo amafuta; olwohuba buli muundu owahawoneo mu syaalo esyo, yahalicheenge amafuta neende obuuhi bw'enjuhi.

²³ Ebiha ebyo nibyahoole, buli abuundu awabechaanga emisabbiibbu elifu ndala, buli kutula nikukulwa ebituundu by'efeesa elifu ndala (1,000), yahasihe yaameramo olunani neende amawa.

²⁴ Abaandu baheengireengemo neende obuyiingo neende obusaale ohuyiima, olwohuba esyaalo syoosi syaheehole olunani neende amawa mahaya.

²⁵ Olwohuba ebigulu byoosi ebyalimwaanga, byahabe nibyasiha abaandu nibatya ohuchiamo olwohuba olunani neende amawa byahabe nibididiisye; nae yahabe yibalehuulira eng'oombe ohwaayao neende amakoondi ohuseenakira.