Yisaaya 66 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omwaami aheengera ebyaalo biindi omusaango

¹ Omwaami aboola ati: Ekulu nilyo esisaala syaange sy'obutuki haandi esyaalo nisyo esiteeni siimbuluusira amakulu kaange. Mani, nyuumba ya ngeri siina yimulinyoombahira? Haandi bweyaango bwa ngeri siina bundiwuluuhiramo?

² Ebiindu bino byoosi, Niise owabiloonga, mani byosi-byoosi byaange nibyo, Omwaami nilwo lu aboola.

³ “Buli muundu aheengao esy'ohuhola, haandi yibulao enjawuhana yibabonamo. Oyo oyaana esurusi, ali nasilala neende oyo oyaana omuundu. Oyo oyaana ekoondi doto, ali nasilala neende oyo ofunaka eekosi ly'embwa; oyo oleeta esiyaanwa esy'emere y'emwo, ali nasilala neende oyo oleeta amabaanga k'embiichi. Oyo onioohesa obubbaani, ali nasilala neende oyo owekongooya esifwaanani siloongwa-loongwe simuberese ehabi. Bi badaha nibyo bi bahola, haandi basangaalira mu biloongaloongwe bi bahola.

⁴ Mani syesi njia ohubakwiisaho amasira ako keene kabatya; olwohuba, nindabalaanga, abulao owakobolamo. Nindalomaloma, abulao owadeebayo ohutekeeresa; nae baholera ebibi mu moni waange bweene, mani nibaheengao ohuhola ebyo ebitasangaasa.”

⁵ Muwulire emboosi y'Omwaami, eng'we abataaho omwooyo ohuhola by'alagira: “Abasyeeng'we babasyuula haandi babeerusa muli abeesikwa yi ndi babadyaabuhira nibaboola bati, ‘Leha Omwaami akinisibwe, mani hunyale ohubona esangaalo lyeeng'we;’ nae abeene nibo abachia ohuchalaala.

⁶ “Wulire! Esiyoka situla mu siko, ekono litula mu nyuumba ya Nasaae! Ekono ly'Omwaami n'asaandya abasuku bae!

⁷ “Esiko syaange syoolerefu siri koti omuhasi wibula n'asisiiri ohulumwa. Engasi chiba nichisisiiri ohumuluma n'atulao omwaana musyaani.

⁸ Wiina mweene owali nawulireho sino? Wiina mweene owali n'abweneho sino? Esyaalo sichakwaanga mu ludaalo lulala? Syaalo siibulwaanga mu siha silala? Olwohuba Siyooni nisyali hu silumwa sa siti nisiibulirao abaana basyo.

⁹ Ndahoose abaandu baange mu biha by'ohwiibuliramo mani ndaahaya ohubaleha beebula? Omwaami niye oboola; Ese niise okera nibeebulwa, mani ndahabaleha badoong'a mu nda? Nasaae weeng'we niye oboola.

¹⁰ “Sangaalire alala neende Yerusalemu, haandi mwehoye hulwae, eng'we mweesi abamuheera. Mwehoye alala nasyo mu sangaalo, eng'we mweesi abasichuunirwa.

¹¹ Muchia ohunuuna mani mwiikute embeere chaasyo chiichuule amabeere; mani muchia ohuwulira esangaalo ly'amaani ohutula mu luyaali lwasyo lubitiirifu.”

¹² Olwohuba Omwaami aboola ati: “Bone, njia ohwiichusa mu Yerusalemu ebiindu bilai bihulukuse koti omwaalo, haandi obuyiinda bw'ebyaalo bwahedihemo koti omwaalo kwichuule.” Ao mani mwahabe koti omwaana muyere yi ng'ina anuunia. Mwahalerwa luleeyi haandi mwahadeembereserwa luleeyi hu makulu kae.

¹³ Koti lu muhasi adeemberesa omwaana wae, syeesi njia ohubadeemberesa, njia ohubadeemberesera mu Yerusalemu.

¹⁴ Esyo mwahasibone, mani mwasangaala; mani syahabakobosemo omwooyo neende amaani. Ao mani mwahamanye muti Ese Omwaami hoonya abo abaambulira, haandi nyoolerera abasuku baange.

¹⁵ Mani bone, Omwaami yaheeche neende omuliro, haandi ebigaari byae byahabe koti omuyaka kw'amaani, ohweekesa etima lyae lyaaduha, neende ohusaandya niyehoonyera enimi ch'omuliro.

¹⁶ Olwohuba Omwaami achia ohusaandisira abaandu bae neende omuliro, haandi neende olugaanga lwae, yahasaandye abaandu boosi. Mani bayaheete, bahabe abaangi muno.

¹⁷ Omwaami aboola ati: “Abo abeelabya mani beeyolobya, nibachia mu ndalo nibeyaanjire enyiriri, ohwiinamira banasaae, haandi nibalya enyama y'embiichi neende embeba, neende eby'emisiro biindi, bahasihirisirwe alala.”

¹⁸ “Olwohuba Ese manyire bi bahola neende bi babaasa. Esiha siicha ohwoola, lu ndahabuuse alala ebyaalo byoosi neende enimi choosi. Mani nibaheeche, bahabone oluyaali lwaange.

¹⁹ Mani ndahabateeho ahalolero. Abo abahawoneo, ndahabatume mu byaalo neende mu bisiinga by'eyale muno ebitauliraanga efuma yaange, kata ohubona oluyaali lwaange. Puti neende Ludi bahachie Tarisiisi eyiri abo abaleega obuyiingo neende obusaale. Bahachie Tubbali neende Yafaani, mani nibalaangirira oluyaali lwaange.

²⁰ Mani bahaleete abebulanwa beeng'we boosi ohutula mu byaalo, koti esiyaanwa eyiri Omwaami, hu Lugulu lwao Lwoolerefu Yerusalemu. Bahabaleetere hu faraasi neende mu bigaari neende hu suhiri njere neende hu solo chiiruha muno. Ao Abaisiraeli bahaleete eyiri Omwaami ebiyaanwa byaabwe by'emwo mu bikiingiro byoolerefu.

²¹ Mani abaandi hu baandu abo, ndahabahole abalaamisi neende Abaleefi, Omwaami nilwo lu aboola.

²² “Mani koti ekulu yaaha neende esyaalo siyaaha bi ndahaloonge byahayiindire mu moni waange, lwosi nilwo lu lwiibulo neende eliita lyaange byahayiindire.” Omwaami nilwo lu aboola.

²³ “Buli lu mwoosi kunaboneheraanga neende hu buli Sabbaato, abaandu boosi banecheenge ohunyinamira.” Omwaami nilwo lu aboola.

²⁴ “Mani nibahabe nibatulayo, bahaboneenge emilaambo ky'abaandu banjeemera. Olwohuba enyeende chikirya haba sichahafwe daawe, haandi omuliro kukisaamba haba sikwahasiime daawe. Mani kyahabe esitiisa eyiri abaandu boosi.”