Yisaaya 62 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohugumya Yerusalemu

¹ Hulwa Siyooni, haba siinjia hubuleera, haandi hulwa Yerusalemu, haba siinjia huwuluuha, ohwoola lu syahanunulwe koti obulafu, haandi obuwonia bwasyo bwaaduha koti omuliro.

² Yerusalemu, ebyaalo byahabone ohununulwa hwao, haandi abatuki boosi bahabone oluyaali lwao. Mani ochia ohulaangwa eliita yaaha, Omwaami mweene ly'ahukuliihe.

³ Wahabe ekofya y'obuyaayi ndai mu muhono kw'Omwaami, haandi ekofia y'obwaami mu muhono kwa Nasaae wao.

⁴ Haba sosilaangwa ehabi liindi oti, “Owajwaang'wa,” haandi esyaalo syao haba sisyahalaangwe, “Esyasiha” daawe, nae ochia ohulaangwa oti, “Nasaae yi yasangaalira,” haandi esyaalo syao syahalaangwe siti, “Esyadeeha.” Olwohuba Omwaami ahusangaaliramo, haandi niye yi syaalo syao syahadeehere.

⁵ Olwohuba koti omusyaani muraaga adeehya omuhaana osisiiri ohumanya eby'abasaacha, nilwo lu basyaani bao bahahudeehye, haandi koti omusaacha odeehiisye asangaalira omweeya wae, nilwo lu Nasaae yahahusangaalire.

⁶ Ewe, Yerusalemu, ndeere abaliindi hu bida byao. Esideete syoosi neende esiro syoosi haba sibachia hubuleera daawe. Eng'we abeechulisa Omwaami ohwooseresa ebiindu bi yasuubisa, mutawuluuhaanga daawe.

⁷ Mani mutamufukiiriraanga ohuwuluuha daawe ohwoola lu yahateeo Yerusalemu buyaaha mani yaasihola esy'oluyaali mu syaalo.

⁸ Omwaami yeechubire neende omuhono kwae muluungi haandi yeechubire neende obunyala bwae ati: “Mubwadyeeri bweene haba siinjia hukobolamo ohuwaayo engaano yao abasuku bao bayilye daawe, haandi abateende haba sibachia hung'wa efiini yao ewe yi wadidikanira otyo.

⁹ Nae abo abayitaaka haandi baayikesa nibo abahayirye mani niinginia Omwaami; haandi abo abanoka emisabbiibbu nibo abahang'weere efiini yaacho mu lwaanyi lw'abuundu waange woolerefu.”

¹⁰ Eng'we abaandu bomu Yerusalemu, mubitire, mubitire mu biruwa, mutereesere abaandu engira; mulime, mulime engira ya naahuluungu, mutusemo ebikina-kina, musiingisire ebyaalo ahalolero bamanye.

¹¹ Bone, Omwaami alangiriire ohwoola hu njakamo y'esyaalo ati: Muboolere abomu Siyooni muti: “Bone, Omuwonia weeng'we yeecha; bone, ali neende omukabo kwae mu mahono, haandi yemiise omusaara kwae mu moni wae.”

¹² Mwahalaangwe, “Abaandu boolerefu.” “Abanunule b'Omwaami;” haandi mwahalaangwe “Esiko si Nasaae adaha,” “Esiko sitajwaang'wa.”