Yisaaya 61 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Emboosi ndai ch'ohununulwa

¹ Mwooyo w'Omwaami Nasaae yaandimo, olwohuba Omwaami yandoolere yaanduma ohuyaalira abamanani emboosi ndai. Yaandumire ohulemya emyooyo kileeya-leeya, ohuyaalira abawaambe endi bachia ohunulwa, neende eyiri ababoye endi bachia ohuboololwa.

² Omwaami yaandumire ohuyaala endi, ebiha byoolere bi Omwaami achia ohuwonisiramo abaandu bae, neende oludaalo lw'ohuyiingiriraho abasuku beefwe. Yaandumire ohulemya emyooyo ky'abaandu balira.

³ Ohuberesa abo abalirira mu Siyooni, esangaalo neende ohweehoya ataali amanyoolero, olweembo lufumia ataali ohwelalihirira. Bachia ohubechaanga koti emisaala ki Omwaami mweene yataaka. Bosi bachia ohuholaanga ebihoyera, Mani Omwaami anyale ohufumisibwa hu biindu byaaba naaholere.

⁴ Bachia ohwoombaha buyaaha ebiko byasihiriswa hale, bahakaluseo ebiko byali nibyeehola amakuunda. Bahatereese ebiko byasihiriswa, ebyanyaaswa mani nibimala emyaaka-ne myaaka.

⁵ Abateende bahasiingire mani babahalaabanireenge, nibo abahaayeenge ebyaayo byeeng'we mani nibo abahabalimireenge haandi batemerere emisabbiibbu kyeeng'we.

⁶ Nae eng'we mwahalaangweenge muti abalaamisi b'Omwaami. Mwahalaangweenge muti, abahalaabani ba Nasaae weefwe; Niing'we abahalicheenge emyaandu kyohu syaalo, haandi mwahasangaalireenge mu buyiinda bwaabyo.

⁷ Mubweyaango bw'ohudiirwa esoni neende ohuchalaala, muchia ohunyoola omukabo amahabi kabiri. Mubweyaango bw'ohutuswamo oluyaali, muchia ohwehoyera mu buyiinda bweeng'we. Mani sakira, munaabecheenge mu syaalo syeeng'we, obuyiinda bweeng'we bwemeede amahabi kabiri. Esangaalo lyeeng'we lyahabe ely'endaalo choosi.

⁸ Omwaami aboola ati: “Ese ndaheera obwadyeeri, ndasyuula ohunyaka neende ohuhola ebitahoyera. Ndahaberese abaandu omukabo kwaabwe mubwadyeeri, haandi njia ohuhola nabo endagaano y'endaalo choosi.

⁹ Abeechuhulu baabwe bahamanyihane mu byaalo, haandi abaana baabwe bahamanyihane mu baandu baangi. Buli muundu wahababone yahafukiirire ati, abo nibo abaandu ba Ese, Omwaami ndaberesa ehabi.”

¹⁰ Esiko sya Yerusalemu siboola siti: “Njia ohusangaalira muno mu Omwaami, haandi njia ohwehoyera muno mu Nasaae waange.” Olwohuba yafwaasire neende ebyefwaalo by'obuwonia, mani yambwiiha neende ekaanju ly'obuluungifu, koti oyo odehiisye omweeya lu yefwaala, haandi koti omweeya yesyaaya emigasa king'enaang'ena.

¹¹ Olwohuba koti eloba limesa ebimera byaalyo, haandi koti lu ndalo yihusa ebitaakirwemo, nilwo lu Omwaami Nasaae achia ohununula abaandu bae. Mani ebyaalo byoosi bichia ohubafumia.