Yisaaya 60 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Oluyaali lwa Yerusalemu mu ndaalo chiicha

¹ Ewe Yerusalemu, siingira mani omesamesane koti elyuuba, mani oluyaali lw'Omwaami lumesamesanire mweewe.

² Olwohuba bona, esiirima siribwiiha esyaalo, esiirima sidiiraane syahabwiihe abaandu; nae Omwaami yahahusiingirireho koti elyuuba, haandi oluyaali lwae lwahabonehere mweewe.

³ Mani ebyaalo byoosi byaheeche eyiri obulafu bwao.

⁴ Siingisa emoni chao, otingaale buli abuundu, mani obone; boosi bebuusire alala, ohwiicha yooli. Abaana bao basyaani bahatule eyale mani beeche, haandi abaana bao bahaana bahakiingirwe mu mahono koti abaana badoto.

⁵ Wahabone esyo mani waasangaala, wahateengerehe mani weehoya. Olwohuba obuyiinda bw'ebyaalo byoosi bwaheeche yooli, mani bwaahubbwomoohaho nibubitira mu nyaanja.

⁶ Amaicho k'engamia kahahwiichuleho, engamia ndoto cha Midia neende Efa. Engamia choosi ohutula Seebba chaheeche. Chaheeche nichileeta esaabbu neende obubbaani. Abaandu boosi bahalaangirire efuma y'Omwaami.

⁷ Ebyaayo bya Kedari byahebuusire yooli, emiiku cha Nebbayooti chahahuleeterwe ohuhuhalaabanira. Emiiku echo chahaleetwe hu alutaari mani nichifukiirirwa. Ndahakinie enyuumba yaange y'oluyaali.

⁸ Ni siina byeene bino ebidumuuha koti amaleesi, haandi ebibburuha koti amaguugu nikakobola mu biswi byako?

⁹ Echo nicho emeeri echitula mu byaalo by'eyale. Echitangiiremo nicho emeeri cha Tarisiisi, nichileeta abaandu bao nichibatusa eyale muno. Baleetere efeesa chaabwe neende esaabbu chaabwe, ohwiisa oluyaali mu Omwaami Nasaae weeng'we, haandi Omwoolerefu wa Yisiraeli, olwohuba yeesere oluyaali mu baandu bae.

¹⁰ Omwaami aboolera Yerusalemu ati: “Abateende bachia ohwoombaha buyaaha ebida byao, mani abatuki baabwe balihuhalaabanira.” Etima lyandiira mani nihusaandya, bulaanu ndehubbire mu sirifu mani ndaahukwiira esisa.

¹¹ Ebiruwa byao binabecheenga ebiikule buli siha; esideete neende esiro haba sibinekalweengeo daawe; mani abaandu bahuleetereenge obuyiinda bwomu byaalo byaabwe, abatuki baabwe nibeemereeremo.

¹² Olwohuba esyaalo neende obwaami ebyahahae ohuhuhalaabanira byahasihiriswe. Ebyaalo ebyo byahasihirisirwe elalira.

¹³ Oluyaali lwa Lebbanooni lw'emisaala neende embaao chihiramo obulai byahaleetwe ohuhwoombaha buyaaha, ewe Yerusalemu, neende ohunyirisa enyuumba yaange, mani ndahahole esiko syaange ohuba esy'oluyaali.

¹⁴ Abaana b'abaandu babafwiinyiriraanga baheeche mani babeenamireenge; haandi abo boosi ababalekeresaanga bahasigameenge aasi mu makulu kaabwe. Bahalaangeenge bati, “Esiko sy'Omwaami, Siyooni, Esiko sy'Omwoolerefu wa Yisiraeli.”

¹⁵ Kata awahaba niwasukunwa haandi waasyuulwa, naabulao omuundu ohuhuhalakaniamo, njia ohuhola obe ow'oluyaali haandi omulai muno, abuundu w'esangaalo endaalo neende endaalo choosi pe.

¹⁶ Ebyaalo neende obwaami byahahuliinde, koti lu ng'ina mwaana aliinda omwaana wae. Mani olimanya oti Ese, Omwaami niise Omuwonia wao haandi Omuwabini wao, ow'Obunyala Mweene wa Yakobbo.

¹⁷ “Mubweyaango bw'esikomo, ndahaleete esaabbu, haandi mu bweyaango bw'esyuuma, ndahaleete efeesa, mu bweyaango bw'olubbaao, ndahaleete esikomo, mu bweyaango bw'amakina, ndahaleete esyuuma.” Ndahahole abahutuka babe n'omuleembe haandi abahutuka ndahabahole babe abaluungifu.

¹⁸ Amakono k'obwaalaba haandi sikahawulirihane mu syaalo syao, haandi esyaalo syao haba sisyahebwaabe kata sa syasihirisibwa. Ebida byao byahalaangwe biti: “Obuwonia, haandi ebiruwa byao biti: ‘Ohufumia.’”

¹⁹ “Elyuuba haba sinilyo elyahahwaaduhire esideete, oba omwoosi kwaaba obulafu bwao mu siro; nae Omwaami niye ochia ohuba obulafu bwao endaalo choosi, haandi Nasaae wao niye ochia ohuba oluyaali lwao.

²⁰ Elyuuba lyao haba siryahakwe haandi, kata sa omwoosi kwao kwaatulao. Olwohuba Omwaami niye ochia ohuba obulafu bwao butaakama, mani endaalo chao ch'ohulira chiriba nichakaame.

²¹ Abaandu bao boosi bahabe abaluungifu; esyaalo syao syahabe esyaabwe endaalo choosi. Bahabe esaga li mweene ndataaka, haandi omulimo ku Ese Mweene ndahola, hu nyale ohubereswaanga oluyaali.

²² Mani amadaala kahiramo obudiidi kaheehole enono, haandi ako akabula obuchiiro, kaheehole esyaalo sy'amaani. Niise Omwaami; mani ebiha byasyo nibyahoole, ndahasyaanguye ohwoolerera.”