Yisaaya 55 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omwaami akwiira abaandu esisa

¹ Omwaami aboola ati: “Buli muundu olumwa obuluwo, leha yeeche ang'we amaachi; kata ayahaba nataali neende eseende, yiche, mani mweesi mukule haandi mulye.” Mwiiche, mukule amalwa neende amabeere ataali eseende yoosi kata sa ohutuunga esiindu siindi syoosi daawe.

² Lwasiina munyaasa eseende hu biindu bitaali ebyohulya, haandi ohuhalaabanira ebiindu bitabeekusa daawe? Tekeerese bulai bi mboola, mani mulicheenge bulai haandi musangaaleenge.

³ “Muteke amatwi, mani mwiiche yiindi; muwulire mani munyoole obulamu.” Njia ohuhola naang'we endagaano yitaakama, ey'ohudaha hwaange hutaakama, ohudaha hwadyeeri koti hu ndadahiramo Daudi.

⁴ Ndamubitiramo ohweekesa ebyaalo biindi obunyala bwaange, niimuhola ohuba omwiimirisi haandi omutuki w'amaani w'ebyaalo biingi.

⁵ Bone, mwahalaange ebyaalo bi mutaali nimumanyire ohwiicha yi muli, haandi ebyaalo byali nibitaabamanyire, byaheruhire yi muli. Olwohuba Omwaami, Nasaae weeng'we, haandi Omwoolerefu wa Yisiraeli, ohubaberesa oluyaali.

⁶ Koonye Omwaami nasiinyolehana, mumulaange, n'asisiiri aambi.

⁷ Leha omwonooni, alehe esaambo chae embi, haandi otali omuluungifu akaluuhanie ebibaaso byae. Leha akobole eyiri Omwaami, mani Omwaami oyo anyale ohumukwiira esisa; akobole eyiri Nasaae weefwe, olwohuba w'esisa niye haandi alehereramo elalira ebyonoono.

⁸ Omwaami aboola ati: “Ebibaaso byaange sibiri koti ebibaaso byeeng'we daawe, haandi engeri chaange haba sichiri koti engeri cheeng'we daawe.

⁹ Koti ekulu liri aakulu w'esyaalo, nilwo lu engeri chaange chiri aakulu ohuhiraho echeeng'we haandi ebibaaso byaange biri aakulu muno ohuhira ebibaaso byeeng'we.

¹⁰ “Koti sa lu efula neende amakina k'efula bikwa ohutula aakulu, mani byaahaya ohukobolayo aakulu nae byachuhiirisa eloba, nibikera ebimera byamwo nibimera, mani nibyaamaho ebyaamo, nibiberesa omulimi emwo neende ebyohulya byaalya.

¹¹ Mani nilwo lu mboosi yi nomanoma yiri; haba siyikobolaanga yi ndi niyitaaholere omulimo kwayo daawe. Nae yiholaanga ebyo bi mba nindaha, haandi yooseresaanga bi yitumire ohuhola.

¹² “Olwohuba mwahatule mu Bbabbilooni neende esangaalo, haandi mwahayirwe neende omuleembe nimutulayo. Engulu neende obugulu biri mu moni weeng'we byahatuunduhe mani byachaaka ohweemba, neende emisaala kyomu siino kyoosi kyahapaame mu mayu hulw'esangaalo.

¹³ Emisyoola kyahamere yi mawa kabeere; haandi emwaanyi chahakobole abuundu w'olunani. Mani aho hahabe ahalolero h'endaalo choosi, aheechulisa ebiindu bi Ese Omwaami holere.”