Yisaaya 52 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae achia ohwaabina Yerusalemu

¹ Siingira, ewe Siyooni, siingira haandi okobolemo ohuba ow'amaani; Ewe Yerusalemu, esiko syoolerefu, wefwaale engubo chao ndai; olwohuba abaandu batahebwa neende abataali abaluungifu haba sibaheengire mu biruwa byao ehabi liindi.

² Ewe Yerusalemu, siingira wehuhumuleho olufu, mani wiihale hu sisaala sy'obutuki. Weboolole eminyororo kihuli mu kosi, Ewe esiko sya Siyooni syawaambwa.

³ Olwohuba Omwaami aboola ati: “Mwaholwa abawaambe ebihaya ataali otuungirwaho eseende yoosi, haandi mwahanunulwe bihaya byeene abula eseende yoosi.”

⁴ Olwohuba Omwaami Nasaae aboola ati: “Abaandu baange bataangira ohuchia Misiri koti bawalukeenda, mani Abasiria nibabasaandya ataali esifune syoosi.

⁵ Mani sakira Ese Omwaami mboola endi: Bulaanu ese ndahahole siina syeene, nimbona abaandu baange nibayirwa bihaya byeene? Omwaami aboola ati, abatuki baabwe beepaaha, haandi buli ludaalo bemeeda ohuchalaasa eliita lyaange.

⁶ Mani sakira abaandu baange bahaamanye. Oludaalo olwo bahaamanye bati Niise, Niise Omweene; Niise olomaloome.”

⁷ Sy'esangaalo liingi muno ohubona wamwaanda nahalania engulu n'aleeta emboosi ndai, emboosi ndai chilaangirira omuleembe, oleeta emboosi ndai, echilaangirira obuwonia, wamwaanda oboolera Siyooni ati, “Nasaae weeng'we niye otuka.”

⁸ Tekeerese, abaliindi b'esiko syeeng'we bahuumula mu kono ly'aakulu, beembera alala olw'omwehoyo; olwohuba babonera elalira neende emoni chaabwe koti lu Omwaami akobola Siyooni.

⁹ Eng'we ebituundu bya Yerusalemu ebibeere nibyeeholere amakuunda, mutuunduhe neende esangaalo; olwohuba Omwaami alemya emyooyo ky'abaandu bae, anunuule Yerusalemu.

¹⁰ Omwaami achia ohwehoonyera obunyala bwae bwoolerefu; achia ohuwonia abaandu bae mani abaandu boosi bahabone obuwonia bwa Nasaae.

¹¹ Mutule, mutule, tule Bbabbilooni. Mutadiiraho kata hu siindu silala esitaali esyoolerefu; eng'we abakiinga ebiindu byoolerefu ebyomu nyuumba ya Nasaae. Mutule nimuli aboolerefu.

¹² Olwohuba haba simuchia ohutulayo nimubbibbiirihana daawe, haandi simuchia hutulayo nimwiiruha embiro daawe, olwohuba Omwaami niye ochia ohubeemereramo, haandi Nasaae wa Yisiraeli niye ochia ohubaloondaho enyuma n'abaliinda.

Ohusaanda hw'omuhalaabani w'Omwaami

¹³ Omwaami aboola ati: “Bone omuhalaabani waange, buli sy'ahola simuchiira bulai. Achia ohwiiswamo oluyaali luhoongo haandi yahakinisibwe muno.

¹⁴ Koti lu baandu baangi bawuka muno nibamubweene obweeni bwae nibunyaalirwe, n'atabonehana koti omuundu, haandi efwaani yae niyitaali koti ey'abaandu

¹⁵ olwo nilwo luyahawukise ebyaalo biingi. Abatuki bahahaywe esy'ohulomaloma, mani baliteng'eng'ala sa; olwohuba bahabone esiindu sibatababoolereraangaho daawe, haandi bahamanye esiindu sibatawuliraangaho.”