Yisaaya 50 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae Agumya Yisiraeli

¹ Omwaami ateeba ati: “Ebbarwa yindandiika ohwiirusa ng'ineeng'we yiri yeena, eyakera ndamwetusaho? Oba wiina mweene oyimaanja yindakusa eng'we ohuba abawaambe? Bone, eng'we mwakuswa hulwa ebyonoono byeeng'we abeene, haandi obudoondobanu bweeng'we abeene nibwo obweerusa ng'ineeng'we.

² Nindeecha ohubawonia, lwasiina haba sindanyolao omuundu kata mulala? Nindalaanga, lwasiina abulao owakobolamo? Omuhono kwaange kwiimbikitaane, sakira kutanyala ohubanunula? Oba mbulamo amaani mani ndahaya ohubawonia? Bone, niihabuhira enyaanja, niyihama. Hola emyaalo kyaaba esiparara; eng'eeni chamwo chaahaywa amaachi, chaafwa obuluwo mani chawunya esifuundu.

³ Nyala ohukera ekulu lyaamaliya, mani lyaaba koti liifwaasire ebigunia by'ohulira.”

Obuwulisi bw'omuhalaabani w'Omwaami

⁴ Omwaami Nasaae yaambereese olulimi lw'abeeki, hu nyale ohuba neende emboosi yohugumya oyo oba n'ajoong'ere. Yaasimusa buli chuli, mani yaateka amatwi kaange kaatekeeresa koti ak'abeeki.

⁵ Omwaami Nasaae yaanjikuule amatwi, mani ndaahaya ohujeema, ndakobola enyuma ohumutulaho.

⁶ Ndalehera omukoongo kwaange abo abaahuya, neende amatama kaange abo abamaanyulaho ebirefu. Haba sindakisa obweeni bwaange ohuhaya ohudirwa esoni neende ohufuuchwaho.

⁷ Olwohuba Omwaami Nasaae niye owahoonyaanga; mani sakira sindeeba hu bujoogi hwaabwe obwo, haandi manyire endi haba siinjia ohudirwa esoni.

⁸ Oyo owuhoonya ali aambi naange. Wiina owufunaana omusaango? Lehe, hweemeo nae huwosanie. Owunyemereho niye wiina? Leha mani asude aambi naange.

⁹ Bone, Omwaami Nasaae niye owuhoonya; wiina mweene onaheengere omusaango ohuuhira? Bone, abo boosi bahakofule koti engubo sa; mani amasiriri kaachirya.

¹⁰ Buli muundu hu eng'we yeese mu Omwaami oluyaali haandi awuliire ekono ly'omuhalaabani wae, kata ayahakeendera mu siirima haandi yaabula obulafu bwoosi, nae yeekisa mu liita ly'Omwaami haandi yomirira hu Nasaae wae.

¹¹ Bone, eng'we mweesi abayaambya omuliro, abaadusa ebikeenga. Mulikeendera mu bulafu bw'omuliro kweeng'we, neende mu bikeenga bimwaduuse! Omwaami mweene niye owosereese sino; mani nimufwiira mubuchuuni.