Yisaaya 46 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Bbeeli aguunama, nae Nebbo yenamya omutwe aasi, Ebiloongaloongwe byaabwe bikiingirwe hu suhiri neende hu ng'oombe. Ebiloongaloongwe byaabwe bibeenamira, byeholere omugugu hu mikoongo ky'esolo chijoong'ere.

² Ebiloongaloongwe ebyo biguunama, mani byoosi alala byenamirira aasi. Haba sibinyala ohweewonia nae ebyo ebyeene byeeyira mu jeela.

³ “Tekeerese bi mboola, Eng'we ab'enyuumba ya Yakobbo, eng'we mweesi abadoong'ao hu nyuumba ya Yisiraeli, bandakiingaanga hu mabeka ohutula lumwibulwa, bandakiinga ohutula mu nda.

⁴ Kata mwahahula mani mwakofula, Niise sa Oyo, haandi kata amwahamera embuchi, njia ohubaliindaanga. Niise owabaloonga, njia ohubaliinda; njia ohubaliinda haandi mbawonie.”

⁵ Wiina mweene yimwahafwaananie nae haandi mwaanjakanisa nae, haandi wiina yimwakeranisye nae, mbwe hwaakanekane nae?

⁶ Sakira abaandu baboolola emifuuko kyaabwe mani nibatusamo esaabbu. Haandi nibapiima efeesa hu misaani, mani nibatuunga omwiitanyi, mani niyetaanyamo nasaae yibeenamira; mani abaandu baakwa aasi abasiinamira.

⁷ Basyedwiiha hu mabeka, mani nibasikiinga, nibasita abuundu wasyo, mani nisyeema abuundu wasyo. Haba sisinyala hutula abuundu wasyo. Niyibaao omuundu osyekongooya, haba sisinyala humukobolamo daawe kata sa syamuwonia amasira.

⁸ “Yichulise sino mani mweehaliirise, haandi musibaaseho, eng'we abajeemu.

⁹ Yichulise ebiindu byaliwo ohutula hale muno; mumanye muti Niise Nasaae, haandi abulao owuundi; Niise Nasaae, haandi abulao owufwaanana daawe.”

¹⁰ Ohutula muhuchaaka, naangiriraanga nibusisiiri ebiindu byahakweeo Munjakamo, nimboola endi, Bitekehe mani by'ohwolerera abweene, haandi njia ohuhola buli siindu siindaha.

¹¹ Ese mbao naanga omusaacha ohutula mu syaalo sy'eyale. Yahaakuhe ohutula ebukwe naali koti eyoni eyiimi; yeeche ahole esiindu siindaha esyo. Niise olomaloome, haandi njia ohusyooseresa; ese si tekeehe, mani njia ohusyooseresa.

¹² “Tekeerese bi mboola, eng'we ab'emyooyo myoomu, eng'we ababaasa muti muli eyale neende obuwonia.

¹³ Ndi ohusudya aambi oludaalo lw'obuwonia bwaange, haba siluchia huba eyale. Haandi siinjia huhiinda ohuwonia abaandu baange. Njia ohuta obuwonia mu Siyooni, hulwa Yisiraeli sa oluyaali waange.”