Yisaaya 45 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omwaami adoola Siraasi

¹ Omwaami yadoola Siraasi ohuba omutuki, yi yadiiririra neende omuhono muluungi, yaamutuma ohuwangula ebyaalo; neende ohutusa obunyala hu batuki baandi. Omwaami yahamwikulireo emilyaango ky'ebiko yibuleo owaheekale ebiruwa. Omwaami aboolera Siraasi oyo ati:

² “Ese omweene, njia ohuhutekehera engira haandi ngwalaase engulu. Njia ohufunaka-funakamo enjiki ch'ebihomo haandi halake-halake emitaliimbo ky'ebyuuma.

³ Njia ohuhuberesa obuyiinda bwabwiihwa adiiyu haandi obwakiswa mu bituundu bitaamanyihaane, mani ochia ohumanya oti, Niise Omwaami, Nasaae wa Yisiraeli, Niise ohulaanga neende eliita lyao lyeene.

⁴ Olwohuba Yakobbo omuhalaabani waange, neende Yisiraeli omudoole waange, hulaangire neende eliita lyao lyeene, hukuliihe eliita, kata awahaba notaamanyire ese.

⁵ Niise Omwaami syeeng'ene, haandi abulao owuundi. Ese syeeng'ene, Niise Nasaae; njia ohuhuberesa amaanyi kodaha, kata awahaba notaamanyireho.

⁶ Ese holere sino, hu baandu boosi bamanye, ohutule ebukwe neende ohutula emuumbo, bati yibulao Nasaae wuundi ohutusaho Ese; Niise Omwaami, haandi abulao owuundi.

⁷ Niise otaao obulafu haandi ndaloonga esiirima, Niise oleeta omuleembe neende amasira, Niise Omwaami, Niise ohola ebyo byoosi.

⁸ “Ewe ekulu, kwiisa obuluungifu, mani leha bwaanuhe ohutula aakulu bukwe aasi koti efula; leha esyaalo siikuhe, mani obuwonia bumeremo haandi leha obuluungifu bwosi bumeremo; Ese Omwaami, Niise oloongereo esyo.

Omwaami niye Omunyala w'Ebiindu Byoosi

⁹ Chimwakaanire oyo oyiingana neende omuloongi wae, olwohuba ali koti endamu yiyiingania omuloongi wao. Eloba linyala ohuteeba omuloongi w'endamu liti, ‘Oli ohuhola siina?’ Oba esyo sy'oloongere syahuboolera siti, ‘Haba siwehonyeere amakesi?’

¹⁰ Chimwakaanire, oyo oteeba laatang'ene ati, ‘Lwasiina wanjibula?’ Oba yateeba ng'ina ati, ‘Lwasiina ndahuluma?’”

¹¹ Omwaami, Omwoolerefu wa Yisiraeli, haandi Omuloongi wae, ateeba ati, “Muchia ohundeeba ebidiira hu baana baange, kose ohundagira esy'ohuhola?

¹² Niise owaloonga esyaalo, haandi ndaloonga abaandu basiriho. Ndehoonyera obunyala bwaange, mani ndabaamba ekulu, haandi Niise otuka buli siindu siri muukulu.

¹³ Kata Siraasi, Niise omulagiire ohusiingirira mu buluungifu bwaange, haandi njia ohukolola engira chae choosi. Achia ohwoombaha buyaaha esiko syaange haandi yahalehuule abaandu baange ababoywa. Yahasihole n'atakulirwe daawe kata sa naatanyoolereho omukabo daawe.” Omwaami w'Obunyala niye olomaloome.

¹⁴ Omwaami aboolera Yisiraeli ati: “Eby'obuyiinda bya Misiri neende eby'obukusi bya Etiopia byahabe ebyao. Abasaacha baleeyi ba Sebba bachia ohuba abawaambe bao, abeene baheeche mani babe abaandu bao. Bahahuloondeho; baheeche nibaboyerwe eminyororo, mani bahwiinamire. Bahahwekongooye, nibaboola bati, ‘Mubwadyeeri, Nasaae ali naawe weeng'ene, haandi abulao owuundi, abulao nasaae wuundi ohumalaho Ewe.’ ”

¹⁵ Ewe Nasaae wa Yisiraeli, niiwe Omuwonia, mubwadyeeri, oli Nasaae owekisa omweene.

¹⁶ Abo abahola ebiloongaloongwe bibeenamira, boosi-boosi yibakiire, esoni chahabadiire mani baateng'eng'ala endaalo ch'obulamu bwaabwe choosi.

¹⁷ Nae Omwaami niye owahawonie Yisiraeli neende obuwonia butaakama. Eng'we Abaisiraeli, esoni haba sichahabadiire kata sa mwateng'eng'ala daawe endaalo ch'obulamu bweeng'we choosi.

¹⁸ Omwaami, owaloonga ekulu (niye Nasaae). Niye owahola esyaalo mani yaasibuumba (yasihola mani yasyomiisa; haba siyasiloonga ohuba esihaya daawe; yasihola ohumenywamo abaandu.) Omwaami oyo aboola ati, “Niise Omwaami, haandi abulao owuundi.

¹⁹ Haba sinomanomera mu ngiso daawe, kata sa mu syaalo sy'esiirima. Haba simbooleraanga abeechuhulu ba Yakobbo endi, ‘Muungoonyere bihaya.’ Ese, Omwaami nomanoma obwadyeeri, mboolera abaandu ebyadyeeri.”

Omwaami w'esyaalo neende ebiloongaloongwe bya Bbabbilooni

²⁰ Omwaami aboola ati, “Abeene mwebuuse mani mwiiche yi ndi, musude mweesi alala, eng'we abaonereo ab'ebyaalo biindi. Abaandu bakeenda nibakiingire ebiloongaloongwe byaabwe by'emisaala, haandi abekongooya nasaae otanyala ohuwonia, nibo abo abataalimo amakesi.

²¹ Mwiiche mani muleete omusaango kweeng'we; lehe abaloli beeng'we beteebaneho! Wiina mweene owalaanga sino ohutula hale? Wiina owaboola hale ati syahabeeo? Haba siniye Ese, Omwaami? Mani abulao nasaae wuundi, ohutusaho ese, Nasaae muluungifu haandi Omuwonia; abulao owuundi, ohumalaho Ese.

²² “Kobole yi ndi mani muwonisibwe, eng'we abaandu bomu syaalo syoosi! Olwohuba Niise Nasaae, haandi abulao owuundi.

²³ Esyeyamo syaange syadyeeri, mani haba sisichia ohukaluuhanisibwa daawe. Njwichwiisa neende obulamu bwaange bwoosi endi: ‘Buli ehuumbo lyoosi lyahaasigamire, buli lulimi lwahandeyamire ohuunjisamo oluyaali.’

²⁴ “Bahaboole bati mweese Omwaami Syeng'ene, nimwo omuli obuluungifu neende amaani. Nae abo boosi abasyuula esoni chahabadiire mani baawumumala.

²⁵ Mu ese Omwaami, nimwo mu lwiibulo lwa Yisiraeli lwahayiingire haandi lwaanyoola oluyaali.”