Yisaaya 44 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omwaami yeeng'ene niye Nasaae

¹ Omwaami aboola ati: “Bulaanu ewe Yakobbo omuhalaabani waange, tekeeresa owulire, eng'we Abaisiraeli ba ndedoolera.

² Ese Omwaami owabaloonga, owabata mu nda ya ng'ina yeeng'we, haandi owabahoonya, mboola endi: Otatya daawe, ewe Yakobbo omuhalaabani waange, Yesuruuni, yi ndaheera.

³ Olwohuba ndahachuhe amaachi mu syaalo syomeranu, haandi emyaalo kyahahulukuse hu loba lyoomu. Mani ndahate Mwooyo waange hu baandu b'olwiibulo lwao, haandi ndahaberese abeechuhulu bweeng'we ehabi yaange.

⁴ Bahahule bulai koti obunyaasi bwamera aambi neende amaachi, bahalohe koti ebimuli biri huundulo w'emyaalo kihulukusa.

⁵ Yiriwo oyo ochia ohuboola ati, ‘Ese ndi ow'Omwaami.’ Owuundi yahekulihe eliita lya Omwaami, haandi owuundi yaheyandiike hu muhono kwae ati, ‘Ndi ow'Omwaami,’ mani omweene yahebalire sa mu Baisiraeli.”

⁶ Omwaami, Omutuki wa Yisiraeli haandi omuwonia wae, Omwaami w'Obunyala aboola ati: “Niise owaamberi haandi Niise owakamayo; haandi abulao nasaae wuundi ohumalaho Ese.

⁷ Mani wiina mweene oli koti Ese? Lehe omweene atuleyo yelaangirire, lehe omweene asilomalome mani asileete mu moni waange. Wiina ohutula hale owali n'alagiire ebyahabeeo mani nibimala nibibaao? Lehe aboolere abaandu ebiindu byahabeeo mu ndaalo chiicha.

⁸ Mutatya daawe, haandi mutawaamo amaani. Mumanyire ohutula hale haandi neende ohwoola buti, mbabooleraanga sa ebyahabeeo mani byoola bibaao. Haandi niing'we abaloli baange. Mani yiriwo nasaae wuundi ohumalaho Ese? Ese syeeng'ene Niise Olwaanda, haba siimanyireho owuundi.”

Ohwiinamiraanga ebiloongaloongwe huchalaalaasibwa

⁹ Abo boosi abahola ebiloongaloongwe bibeenamira, babula obuhoonyi. Haandi banasaae babeehoyeramo, bibulamo engaanga yoosi. Mani abo ababiinamira sibulao sibabona haandi sibulao sibamanyire, haandi ebiindu bi bahola byahabadiise esoni abeene.

¹⁰ Wiina owali naaholereho nasaae kata sa yetaanya esifwaanani, mani yahaya ohuba nanyahaniire buhaya?

¹¹ Bone, olisiinamira yahadiiswe esoni omweene. Haandi abo abahola ebiloongaloongwe ebyo ngaandi baandu sa, sibulao esiindi. Bahoyere boosi baleetwe, mani beeme alala, batemwaatemwe. Bahatye haandi badiirwe esoni abeene.

¹² Omwiitaanyi niyetaanya esifwaanani siinamirwa, aleeta esyiibia mani nasifunihaho amaanda, mani nasihuya neende enyuundo, niyehoonyera omuhono kwae kw'amaani. Naamala ohuhola atyo, alumwa enjala, yaalumwa obuluwo mani yajoong'a.

¹³ Nae omubaachi, apiima obuleeyi bw'olubbaao, mani yaalutaaho obulolero neende ekalaamu. Araanda olubbaao neende eraanda, mani yalupiima neende esyuuma syae sipiima, mani yaaluholamu esifwaanani silai syeene, esifwaanani siri koti omuundu mani yaasigeeng'a mu nyuumba yi sibaamo.

¹⁴ Anyala ohutema omusisi, oba yaheengao ohutema omuseengese oba omusaala kuundi kwoosi okuli mu sichaha. Oba anyala ohutaaka omusisi, efula yaakwa mani kwaahula.

¹⁵ Nikuba nikuhulire, omuundu oyo anyoolamo eehwi. Abukulaho eehwi chiindi yaachiyaambisa omuliro, mani yoota, haandi n'adehera ebyohulya. Esituundu sidoong'ereho, asiholamo nasaae wae, mani nasiinamira, mani nasaae mubaache sa oyo amukwa mu makulu haandi yaamwiinamiraanga sa.

¹⁶ Eehwi chiindi achaadusira omuliro, eehwi chiindi yaachisaambira enyama yaalya. Mani niyoota omuliro nahwahwaanuha mbwe ati, “Ha-ha-haa, omuliro kuno nga mulai muno, nga kuumbasa bulai!”

¹⁷ Esituundu sy'omusaala sidoong'ereo, asibaachamo nasaae, esiloongaloongwe syae; mani aakwa aasi yaasiinamira mani yasyekongooya n'aboola ati, “Ewe nasaae waange, monie!”

¹⁸ Abaandu abo haba sibamanyire, haandi haba sibabaasa daawe; olwohuba baliimbya emoni chaabwe, mani baahaya ohunyala ohubona, haandi beekala emyooyo kyaabwe, mani baahaya ohumanya kata nabudiidi.

¹⁹ Omubaachi w'esifwaanani yeebirira, haandi yaahaya ohwehaliirisa bulai mani yaboola ati, “Esituundu sy'omusaala okwo ndasyaadusaho omuliro, mani haandi ndaadeeheraho ebyohulya hu maanda kakwo, ndaasaambiraho enyama ndaayirya. Esituundu syadoong'aho, nisyo sindabaachamo nasaae waange, mani njia endye ohwiinamira esituundu sy'omusaala esyo?”

²⁰ Omuundu oyo aba naalya sa ekohe. Aba ali omwiibirisa mweene haandi owakota. Omweene haba saanyala ohweewonia omweene daawe, kata sa yaboola ati, “Esifwaanani si ndiirire sino mu muhono kwaange muluungi, haba sisyobubacha daawe?”

Omwaami niye omuloongi haandi omuwonia

²¹ Omwaami aboola ati, “Ewe Yakobbo, yichulisa ebiindu bino, neende ewe Yisiraeli, olwohuba oli omuhalaabani waange. Ndahuloonga obe omuhalaabani waange. Ewe Yisiraeli, haba siinjia huhwiibirira daawe.

²² Njeyereo ebyonoono byao byoosi mani byaahamyuuhao koti ebireesi, haandi ebyonoono byao byaakotao koti enang'oong'o. Kobola yiindi, olwohuba ndahununula.”

²³ Ewe ekulu, yemba, olwohuba Omwaami niye oholere esyo. Muhuumule, ewe ebituundu by'esyaalo by'aasi. Eng'we engulu, muchaake ohweemba; neende eng'we, ebichaha, neende buli musaala okubalimo; olwohuba Omwaami yanunula abeechuhulu ba Yakobbo, haandi achia ohweekesa oluyaali lwae mu Baisiraeli.

²⁴ Omwaami owahununula, haandi owahuloonga mu nda ya maakoo aboola ati: “Niise Omwaami owahola ebiindu bino byoosi. Niise syeeng'ene owabaamba ekulu, niise owatabaasa esyaalo, abulao owandirihaho daawe.

²⁵ Niise omalao ebiwuukisa bi banabbi bobubacha bahola, haandi ndabbuungaasa abalakusi. Ese niise onyaasa emboosi ch'abakesi, mani ndaahola ebiindu bi balaanga bati eby'amakesi byaaba eby'obusiru.

²⁶ Nae niise owomiisa bi muhalaabani waange alomaloma, haandi njoseresa bi wamwaanda waange alagira. Mboola endi, ‘Yerusalemu syahamenyemo abaandu,’ haandi hu biko bya Yuda mboola endi, ‘Byahoombahwe buyaaha’.

²⁷ Niise olagira ebusiba w'enyaanja yaambulira nimboola endi, ‘Hama, mani njia ohuhamya emyaalo kyao’.

²⁸ Niise olomaloma hu Siraasi endi, ‘Oyo niye omwaayi waange, achia ohwooseresa ebyo byoosi biindaha’. Niise olagira Yerusalemu endi, ‘Sichia ohwombahwa buyaaha,’ haandi Enyuumba ya Nasaae endi, ‘Emisiingi kyao kyoombahwe.’ ”