Yisaaya 40 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Emboosi chikobosamo esuubi

¹ Gumye, gumye abaandu baange, Nasaae weeng'we nilwo lu aboola.

² Muboolere abaandu abomu Yerusalemu emboosi chibakobosamo esuubi, mani mubaboolere muti ohusaanda hwaabwe bulaanu hwakaame, muti ebyonoono byaabwe bireheerwemo. Mubaboolere muti Omwaami abasaandiisye olumala hulw'ebyonoono byaabwe.

³ Ekono lihuumula niliboola liti. “Mutereesere Omwaami engira mu siparara, mukololosere Nasaae weeng'we engira ya naahuluungu mu sichiimi.

⁴ Buli liina liichuswe, haandi buli lugulu neende buli sigulu bikwalaaswe; neende buli abuundu ataali akololofu akololoswe, haandi buli abuundu ataali akwalaafu akwalaaswe.

⁵ Ao mani oluyaali lw'Omwaami luchia ohwekeswa, buli muundu yeesi yahalubone, olwohuba Omwaami mweene niye oboolere.”

⁶ Ekono liboola liti, “Huumula!” Mani ese nindeeba endi, “Siina syeene sindahuumule?” Nilikobolamo liti, “Huumula oti abaandu boosi bali koti obunyaasi, haandi ohunyirira haabwe hwosi huli koti esimuli syomu siino.”

⁷ Obunyaasi bwooma, esimuli syahooha, Omwaami yatuma omuyaka ohubiwuuchaho; mubwadyeeri abaandu bali koti obunyaasi.

⁸ Obunyaasi bwooma, esimuli syahooha; nae emboosi ya Nasaae weefwe yiyiindira sa endaalo choosi.

⁹ Ewe boolera Siyooni emboosi ndai, niina hu lugulu luleeyi; ewe oboolere Yerusalemu emboosi ndai, siingisa ekono olomalome neende amaani, otatya daawe; boolera ebiko bya Buyudaaya muti, “Bone, Nasaae weenge nguno yoolere!”

¹⁰ Bone, Omwaami Nasaae weeng'we nguyo yeecha neende obunyala, haandi obunyala bwae bweene bumutukira; bone, ali neende omukabo kwae, haandi ali neende omusaara kwae.

¹¹ Achia ohuliinda ebyaayo byae koti omwaayi; achia ohubuusa alala amakoondi madoto, mani akalere mu mahono kae, achia ohukakiingira hu sirifu syae, mani yeemisiremo amadwaasi kebuule niyehaliirisa bulai.

Obunyala neende amakesi ka Nasaae wa Yisiraeli

¹² Wiina mweene owali napiimire obuungi bw'amaachi komu nyaanja mu syaaba sy'amahono kae oba yapiima ekulu neende obuleeyi bw'esirifu syae? Wiina owali n'ateere olufu lwohu syaalo hu latiri ohulukera kata sa owakeraho engulu hu latiri haandi yapiimiraho obugulu hu latiri?

¹³ Wiina owali nabooleere Mwooyo w'Omwaami esy'ohuhola, kata sa owali n'amubereese amakesi namukerakira?

¹⁴ Nasaae yali niyeteebere hu wiina, n'amusaba amuberese amakesi? Wiina owali namwekeseho emera y'obwadyeeri haandi yaamweekesa engeri yohuholeramo ebiindu, haandi wiina owamweekesaho engeri y'ohumanya?

¹⁵ Bone, eyiri Omwaami, ebyaalo biri koti etoonde ly'amaachi hu syoongo, biri koti olufu luli hu latiri; bone, ayira ebisiinga koti esiindu sidiidi muno.

¹⁶ Ebichaha bya Lebbanooni byoosi haba sibinyala ohutulamo eehwi chinyala ohumala Omwaami daawe. Kata esolo chamwo, haba sichinyala ohuba ebiyaanwa bisaambwa.

¹⁷ Ebyaalo byoosi haba si siindu mu moni w'Omwaami, biri koti ebihaya byeene, omubula esiindu.

¹⁸ Mani Nasaae munamukeranisye hu wiina, kata sa siina syeene simunamufwaananie nasyo?

¹⁹ Esiloongaloongwe si muundu aloonga, neende esiindu si muundu yetaanya mani yabahaho esaabbu, neende esyo siyetaanya neende eminyororo ky'efeesa.

²⁰ Nae omumanani otanyala ohunyoola efeesa kata sa esaabbu ebyohu yaana, adoolamo omusaala kutanyala hufuunda; mani yakoonya omubaachi w'amakesi yataawo esifwaanani syomiifu esitanyala hudengaanisibwa.

²¹ Eng'we haba simumanyire? Haba simuwulirangaho? Haba sibababooleraanga ohutula hale? Mwali nimutaamanyireho ohutula esyaalo nisiloongwa?

²² Nasaae niye oyo owamenya aakulu w'esyaalo syebodoohaanie, mani abaandu basiriho badiidi koti amadeede. Yabaambula ekulu koti olutiimba, haandi yalibaamba koti eyeema ly'ohumenyamo.

²³ Aloongoyasa abatuki b'amaani, mani yabahola koti abataaliho neende esiindu daawe.

²⁴ Bali koti emisaala kibahataaka sa esiha esyo, ki bisina byaakio bisisiiri ohwiisa emisi mu loba. Omwaami lwaatuma sa omuyaka ati, nikihooha, nikuwuuchaho kuti nikidumuuha koti amakada.

²⁵ Omwoolerefu Mweene ateeba ati, “Munyala ohuungeraania neende wiina, yi nyala ohufwaanana nae?

²⁶ Mutingaale aakulu mani mubone. Wiina mweene owaloonga ebyo byoosi ebiriyo?” Niye oyo olagira byaatulayo koti eye, n'alaanga buli situlayo neende eliita lyaasyo; neende obunyala bwae buungi, mani olwohuba ali neende amaani maangi sibulao esitaaliwo.

²⁷ Eng'we abeechuhulu ba Yakobbo, mboola eng'we Abaisiraeli, munyala mutye ohwekanyiirisa nimuboola muti, “Omwaami haba saamanyire obudinyu bweeng'we, haandi muti Nasaae weeng'we haba sadeebayo daawe”?

²⁸ Haba simusimanyire? Haba simusiwuliraangaho daawe? Omwaami niye Nasaae w'endaalo choosi, Esyaalo syoosi koti lu syaakiire, niye owasiloonga. Haba sawaamo amaani haandi saajoong'a, amakesi kae haba sikamanyihana daawe.

²⁹ Abeyendehereere, ababeresa amaani, haandi ababula obunyala, aboongeraangamo amaani.

³⁰ Abaraaga bosi beyendeherera mani baajoong'a, haandi abasyaani baraaga bosi baweechaangamo amaani mani baakwa aasi bauchuluha.

³¹ Nae abo abeesika Omwaami ohubahoonya, ababeresaanga amaani mayaaha, babburuha aakulu neende embaya koti eeswi beeruha nae baahaya ohujoong'a, bakeenda nae baahaya ohujoong'a.