Yisaaya 38 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohulwaala hw'omutuki Hesekia neende ohuwona hwae

¹ Olwoola, mu ndaalo echo, Hesekia yalwaala muno, niyoola aambi neende ohufwa. Mani omunabbi Yisaaya omwaana wa Amosi, niyeecha ohumubonaho, naamuboolera ati, “Omwaami aboola ati, ‘Tereesa ebyomuungo wao; olwohuba ochia ohufwa, haba soochia ohuwona daawe.’ ”

² Mani Hesekia yakaluuhana, yatingaalo ena sida, mani yasaba Omwaami,

³ n'aboola ati, “Ewe Omwaami, hwekweeda, yichulisaho bulaanu, obone koti lu ndi omweesikwa mu moni wao, koti lu huhuloongoyalira neende omwooyo kwaange kwoosi, haandi koti lu ndeemaangaho ohuhola ebihusangaasa mu moni wao.” Hesekia n'alira muno.

⁴ Omwaami yaboolera Yisaaya ati:

⁵ Chia mani oboolere Hesekia oti, Omwaami, Nasaae wa Daudi kuukaao, aboola ati, “Mbuliire ohusaba hwao, haandi mbweene amasika kao. Mani bona, njia ohumeeda hu bulamu bwao obwo emyaaka ehumi neende kitaanu.

⁶ Njia ohuhuwonia alala neende esiko sya Yerusalemu, mani hutuse mu mahono k'omutuki wa Asiria, njia ohukayirira esiko sino.”

⁷ “Hano niho ahanaabe ahalolero hao ohutula eyiri Omwaami, ahachia ohuhweekesa hati Omwaami achia ohuhola esiindu sy'ahusuubiise:

⁸ Bona, njia ohuhola esiiniha siri hu Ahabbu, esy'elyuuba lichia ohukwa, Omwaami achia ohusikobosa enyuma, obuleeyi bw'amakulu ehumi.” Mani elyuuba nilikobola enyuma obuleeyi bw'amakulu ehumi, ak'ebiha bi yali n'amalire ohwihirira.

Olweembo lwa Hesekia lw'ohweebasa

⁹ Luno nilwo olweembo lu Hesekia omutuki wa Buyudaaya yandiika n'amalirire ohuwona obulwaae bwae:

¹⁰ Ndali mboola endi mu mwaaka kwa akatikaati w'obulamu bwaange nikwo kuhoyere ohutuliraho mu syaalo muno; njie hu biruwa by'Emakoombe mbeeyo emyaaka kyaange kidoong'ereyo.

¹¹ Ndali nimboola endi, haba siinjia ohubona Omwaami mu syaalo sy'abalamu daawe; haandi siinjia ohubonaho omuundu yeesi mwaabo abamenya hu syaalo huno.

¹² Obulamu butulireo mani bwanduswaho koti esikaali sy'omwaayi; obulamu bwaange buweereo koti engubo hu sicharaani sy'omunabi; buhalaakwe koti oluwuusi sa; ohutula echuli ohwoola esiro, mbwereeremo elalira amaani.

¹³ Esiro syoosi ndekanyiirisa olw'obuchuuni, mbulira koti edalang'i yimenena amakuumba kaange koosi; ohutula esideete ohwoola esiro, Nasaae ali koti omalawo obulamu bwaange.

¹⁴ Ndabechaanga ao nimiinduha koti eyoni, Ndalira koti eguugu. Emoni chaange chooboha olwohutiingaala aakulu. Ewe Omwaami, ndi mu masira. Ewe yiicha wumonie!

¹⁵ Nae ese ndaboole siina syeene? Olwohuba Omwaami amalire ohulomaloma naange, haandi omweene niye osiholere. Endoolo choosi chiimbweeremo olwohuba engisa yiri hu mwooyo kwaange.

¹⁶ Ewe Omwaami, mu biindu bino byoosi nimwo mu baandu banyoola obulamu, haandi mu ebyo byoosi nimwo mu syesi nyoola obulamu. Ewe Omwaami, monie mani mbe omulamu!

¹⁷ Eee, syahoonya muno ohuba neende engisa mbwe ndaaba neende engisa enyiingi; nae ewe Omwaami waawonia obulamu bwaange ohutula mu liina lyohusihirira, olwohuba wundeheremo ebyonoono byaange byoosi.

¹⁸ Olwohuba Emakoombe abulao onyala ohuhweebasa, mu syaalo sy'abafu, abulao onyala ohuhufumia daawe; kata sa abachia aasi mu ng'ani haba sibanyala ohusuubira obweesikwa bwao.

¹⁹ Nae abalamu, abalamu nibo abahweebasa, koti lu ndi ohuhola enyaanga yino Balaataang'ene baana nibo abeekesa abaana obweesikwa bwao.

²⁰ Omwaami achia ohuumonia, mani obulamu bweefwe bwoosi huchia ohuhweemberaanga nihuhubba obuhana, mu nyuumba y'Omwaami.

²¹ Bulaanu Yisaaya yali n'aboolere ati, “Lehe babukule ebyaamo by'omusabbiibbu, mani babisehule, babite hu sikoonjo, mani Hesekia awone.”

²² Hesekia yesi yali nateebere ati, “Halolero siina ahaneekese hati njia ohuniina njie mu nyuumba y'Omwaami?”