Yisaaya 36 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abasiria batiisa-tiisa Yerusalemu

¹ Olwoola, mu mwaaka kw'ehumi neende kine Hesekia naali omutuki wa Buyudaaya, Senakeribbu omutuki wa Asiria yaseeta ebiko byoosi ebya Buyudaaya ebyali nibyasitwa olukaka lw'amaani mani yaabiingira.

² Mani omutuki wa Asiria yatuma Rabbusake omubalabanu muhuluundu w'eye lyae, atule Lakisi achia Yerusalemu eyiri omutuki Hesekia, neende eye hoongo. Mani Rabbusake niyolayo, yeema hu ndulo w'omutaro kw'ediba ly'amaachi ly'emukulu, eliri hu ngira hoongo eyichia mu Mukuunda kw'Omuholi w'Engubo.

³ Mani abachweenufu Bayudea badatu beecha ohumwaakaanira: Eliakimu omwaana wa Hilikia, owali n'ahulira edooho, neende Sebbina, omwandiika mu dooho, neende Yowa omwaana wa Asafu, owali omubiihi w'ebyandiiko.

⁴ Mani Rabbusake yababoolera ati, “Boolere Hesekia muti, ‘Omutuki muhuluundu, omutuki wa Asiria ahuteeba ati: Obugumu bwao obwo bweemere hu siina syeene?’”

⁵ Ewe obaasa oti ohulomaloma emboosi choong'ene nihwo ohunaakobole mu bweyaango bw'amakesi neende amaani k'ohulwaana ebiita? Wiina mweene yi weesika okera woola ohunjeemera?

⁶ Bona, oli ohweesika Misiri, omudiiro kw'ekada lyafuniha elyo, elichia ohufumita omuhono kwa buli muundu yeesi olyesiraho; omutuki wa Misiri ali atyo eyiri buli muundu yeesi omwesika.

⁷ Nae niwumboolera oti, “Hweesika Omwaami Nasaae weefwe,” oyo haba siniye yi Hesekia yatusaho obweyaango buhoongo bu beenamiraangamo, neende alutaari chae, Hesekia oyo yaboolera abaandu bomu Buyudaaya neende abomu Yerusalemu ati, “Munenamiraanga mu moni wa alutaari yino yoong'ene”?

⁸ Mani bulaanu haambawosereyo mu liita ly'Omwaami waange, omutuki wa Asiria; njia ohuhuberesa efaraasi elifu chibiri, ewe n'onyala ohunyoola abeerusi b'efaraasi echo.

⁹ Ewe otanyala ohulwaania kata mulala hu bachweenufu b'omwaami waange omaliirihayo obukata, mani niweesika Misiri olwohuba ebigaari neende olwohuba abeerusi b'efaraasi?

¹⁰ Mani obaasa oti Omwaami siniye owuhoonyera ohuseeta esyaalo sino mani sisihirise? Omwaami yamboolera ati, Chia oseete esyaalo sino, mani osisihirise.

¹¹ Mani Eliakimu, Sebbina, neende Yowa nibaboolera Rabbusake bati, “Huhwekweeda, olomalome naafwe mu, olwohuba hulumanyire; nae otalomalomaho naafwe mu Luibburania abaandu bali hu sida nibawulira.”

¹² Nae Rabbusake n'akobolamo ati, “Mubaasa muti omwaami waange niye owaandumire ohuboolera omwaami weeng'we neende eng'we mweng'ene emboosi chino? Yaandumire ohuboolera neende abasaacha behaale hu sida, abanoole ohulya obunyaka bwaabwe bweene haandi neende ohung'wa amaanyi kaabwe keene koti lu eng'we muchia ohuhola.”

¹³ Mani Rabbusake n'asiingira niyeema mani nahuumulira mu kono ly'aakulu mu lulimi Luyiibburania ati: “Wulire omutuki muhuluundu, omutuki wa Asiria by'aboola!

¹⁴ Omutuki oyo abalabula ati: Hesekia alehe ohubabachirisa, olwohuba haba saanyala ohubawonia.”

¹⁵ Haandi Hesekia ahaye ohubaseendaseenda ohweesika Omwaami n'aboola ati, “Omwaami achia ohubawonia haandi esiko sino haba sisinaakwe mu mahono k'omutuki wa Asiria.”

¹⁶ Mutatekeeresa ebya Hesekia, olwohuba omutuki wa Asiria aboola ati: “Mube silala naange mani mutule erwaanyi w'esiko mwiiche yi ndi; buli muundu hweeng'we achia ohulya ebyaamo by'omutuli kwae, neende ebyaamo by'emisabbiibbu kyae, haandi buli muundu achia ohung'wa amaachi komu sulo chae cheene;

¹⁷ ohwoola lu ndaheechere mani ndabayira mu syaalo sifwaanana neende esyaalo syeeng'we, esyaalo sirimo engaano neende efiini, emigaati neende endalo ch'emisabbiibbu.”

¹⁸ Mweliinde, ataali ao, Hesekia achia ohubakosya-kosya n'aboola ati, “Omwaami achia ohutwonia.” Yiruwo hu banasaae bomu byaalo owali nawonisyeho esyaalo syae ohutula mu mahono k'omutuki wa Asiria?

¹⁹ Bali yeena bweena banasaae ba Hamati neende Aripaadi? Bali yeena banasaae ba Sefarifaimu? Abo banasaae ba Samaria, bawoniaho esyaalo syaabwe mani basiindusa mu mahono kaange?

²⁰ Wiina mweene hu banasaae bomu byaalo ebyo owali nawoneeseho esyaalo syae ohusitusa mu mahono kaange, hu Omwaami anyale ohuwonia Yerusalemu ohusitusa mu mahono kaange?

²¹ Mani nibawuleera nibatakobolamo kata emboosi ndala, olwohuba omutuki yali n'abalagiire ati, “Mutamukobolamo kata nabudiidi.”

²² Mani Eliakimu, omwaana wa Hilikia, owali omuhuluundu w'edooho, neende Sebbina, omwandiiki, neende Yowa omwaana wa Asafu, owali omubiihi w'ebyandiiko, nibeecha eyiri Hesekia nibatanduule engubo chaabwe, mani nibamuboolera emboosi chi Rabbusake yalomaloma.