Yisaaya 32 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omutuki w'esitiibwa

¹ Bone, ebiha bichia ohwoola yibeeo omutuki otukira mu buluungifu, haandi abahoongo bae bachia ohuloondakana neende obwadyeeri.

² Buli otulayo yahabe koti obweyikamo bw'ohuwona omuyaka haandi abuundu w'ohuwoneramo esiifuusye. Bahabe koti emyaalo ky'amaachi mu syaalo sy'esiparara. Bahabe koti esiiniha sy'olwaanda luhoongo mu situundu sy'esyaalo syoomu.

³ Emoni ch'abaandu babona haba sichahaliimbe chaahaya ohubona ebiindu bi baandu badaha, haandi amatwi k'abaandu bawulira haba sikahadiimbe baahaya ohuwulira bi baandu bababoolera.

⁴ Mani ebibaaso by'abaandu bataali neende ohwesimirisa byahaakame, mani bachaaka ohuhola ebiindu byeekesa biti bachuunirwa abaandu basyaabwe. Ab'esirimi, bahanyale ohulomaloma bulai emboosi chimanyihana.

⁵ Omuundu musiru haandi siyahalaangwe ow'oluyaali, oba omuliichaki ohulaangwa omuhunuufu.

⁶ Olwohuba omusiru alomaloma eby'obusiru, haandi ebibaaso byae biri mu huhola ebyonoono; ohuhola ebifwoola Omwaami, neende ohulomaloma emboosi chinyeka Omwaami, ohuleha abaandu enjala niyibaluma, haandi abo abalumwa obuluwo ohutababeresa esyohung'wa.

⁷ Omuliichaki muundu mubi niye; haandi ebiindu bi ahola haba si bilai nibyo; abaasa ohusihirisa abamanani niyehoonyera obubacha, kata abahaba nibasaba ebibahoyera.

⁸ Nae omuundu w'oluyaali abaasa ohuhola ebiindu bilai, haandi yomiirira hu biindu bilai.

Ohuheenga omusaango haandi neende ohuwonia.

⁹ Siingire, eng'we abahasi bataali neende esiindu syoosi simweyendeherera, mani muwulire ekono lyaange; neende eng'we abahaana batadeebayo daawe, mutekeerese muwulire enomanoma yaange.

¹⁰ Mu biha bidiidi muno ebihiraho omwaaka mulala eng'we abahasi batadeebayo, muchia ohuheeherwa; olwohuba emisabbiibbu haba sikichia ohwaama, haba simuchia huba neende eekesa.

¹¹ Teengerehe, eng'we abahasi bali mu bulamu bulai, mukweemo oluteengo, eng'we abatadeebayo; mwefwaalulemo engubo cheeng'we, mudoong'e syeekenye, mani mweboye ebigunia mu bibuno mweekese engisa yeeng'we.

¹² Mwehuye hu birifu nimweekesa engisa yeeng'we, olwohuba endalo ndai ch'emisabbiibbu kisihiriiswe.

¹³ Mani esyaalo sy'abaandu baange simereremo amawa neende olunani; mulirire enyuumba choosi chi baandu basangaaliraangamo neende mu biko bi baandu besangaasiraangamo.

¹⁴ Olwohuba edooho lyaheebwaabe, esiko syali nisyeechulamo abaandu syahadoong'e esihaya syeene. Esigulu neende omunara ku baliindiraho byahasihiriswe endaalo choosi, yi suhiri ndeende chahang'alaalire, haandi ebyaayo byahayireenge.

¹⁵ Nae ebiha byahoole mani Nasaae yahatuberese Mwooyo wae ohutula aakulu, mani esiparara syahehole eloba lai, mani obulai bw'endalo ndai byahabe koti obw'esichaha.

¹⁶ Buli abuundu mu syaalo wahabeeo obwadyeeri, haandi obuluungifu bwahabe mu syaalo syoosi.

¹⁷ Mani obuluungifu bwahaleete omuleembe, mani ebyahatule mu buluungifu nihwo ohuyenjeera neende obweesikwa endaalo choosi.

¹⁸ Abaandu ba Nasaae bahamenye mu muleembe mu syaalo syaabwe, bahamenye mu madaala kaabwe mu muleembe, neende mu bituundu by'ohuwuluuhiramo.

¹⁹ Nae amakina k'efula kahahuye esichaha esyo mani syaweera aasi neende esiko syahakwisirwe aasi elalira.

²⁰ Nae muli neende ehabi eng'we abataaka hu ndulo w'emyaalo, eng'we abali neende obwayiro buli abuundu yimwayira eng'oombe neende esuhiri nimutahungiire.