Yisaaya 27 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Ebiha ebyo nibyahoole, Omwaami yahabukule olugaanga lwae lw'amaani haandi olwooki mani asaandye Lefiataani, okuyuha kwekata engata, haandi okwekonioola (Amahuluundu ka Lefiataani maangi niko, ohwanjira elalira hu kunaamiindi kwohu syaalo ohwoola hu kusyuuhira banaabi kwomu nyaanja); yaheete okunamiindi kwamenya mu nyaanja.

² Hu ludaalo olwo, Omwaami yahaboole ati: “Mubone endalo yaange y'emisabbiibbu ndai, muyeembe!

³ Niise omuliindi wao; haandi buli siha njichuhiirira amaachi. Njiliinda esiro neende esideete, abuleo omuundu yeesi oyinyaasa.

⁴ Ndeheere ao ohuba neende etima. Mba ninwaania amawa neende olunani! Ndahabiseetere, ndahabisambiire alala byoombi.

⁵ Nae abasuku b'abaandu baange nibadaha mbaliinde, lehe bateeo omuleembe naange, lehe bateeo omuleembe naange.”

⁶ Mu biha biicha ebyo, Abaisiraeli, abeechuhulu ba Yakobbo, bahamere emisi koti omusaala, Yisiraeli syahamulihe mani syaloha amasaga, mani syechusa esyaalo syoosi neende ebyaamo byasyo.

⁷ Omwaami haba sasandiisye Yisiraeli koti lu yasaandya abasuku basyo, kata bafwiirwa abaandu baabwe baangi daawe.

⁸ Omwaami yasaandya abaandu bae n'abayira mu jeela; yabayira mu jeela mu ndaalo ch'omuyaka kw'amaani okutula ebukwe.

⁹ Mani sakira ebyonoono bya Yisiraeli bichia ohuleherwamo, mani sino nisyo esyahekese siti ebyonoono byaabwe bireheerwemo: Abaisiraeli nibahasaasakule alutaari cha banasaae bateende bachisasaakula chaaba koti olufu, alutaari cha Asyerimu, nasaae muhasi, neende alutaari ch'ohuniooheseraho obubbaani chaahaya ohubaao.

¹⁰ Olwohuba esiko siriho olukaka sisihiriire. Abaandu basyo beruuhemo haandi basyebwaabire, bulaanu siri koti esichiimi. Syeholere olwayiro lw'eng'oombe, yi mayicho k'eng'oombe kawuluuhira, mani kaaya amasaga k'emisaala.

¹¹ Nae amasaga k'emisaala nikahahoohe mani kooma, bahakafunake; abahasi baheeche bakaasyaakemo eehwi. Olwohuba abaandu bano babulamo amakesi; sakira oyo owabaloonga haba saachia hubaleheramo, oyo owabaloonga haba saachia hubakwiira esisa.

¹² Oludaalo olwo nilwahoole, Omwaami achia ohubuusa alala abaandu bae Abaisiraeli, ohutula hu Mwaalo Ewufuraate ohwoola hu haalo hali hu lwaaho lwa Misiri, koti lu muundu yahasereecha engaano n'atusamo omuhuuchi.

¹³ Oludaalo olwo nilwahoole, eturumbete hoongo yahoobbwe, ohulaanga Abaisiraeli abo abahabe nibakotera mu syaalo sya Asiria neende abo abali nibayirwa mu syaalo sy'e Misiri, baheeche mani beenamira Omwaami hu Lugulu Lwoolerefu mu Yerusalemu.