Yisaaya 26 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omwaami yahakere abaandu bae bayiingira

¹ Oludaalo lwahoole beembe olweembo luno mu syaalo sya Buyudaaya: “Huli neende esiko sy'amaani; Nasaae mweene niye owasitaaho esida neende olukaka ohutuwonia.

² Mwiikuleo ebiruwa by'esiko, abaandu bomu byaalo biluungifu haandi ebyeesikwa banyale ohwiingira.

³ Ewe Omwaami oliindira mu muleembe kw'elalira abo abata esuubi lyaabwe mweewe, olwohuba bahweesika.

⁴ Mweesikeenge Omwaami endaalo choosi, olwohuba Omwaami Nasaae niye olwaanda lutuliinda endaalo choosi.

⁵ Olwohuba aloongoyaase abo abali nibehuduumbasa, haandi yasihirisa esiko syaabwe sy'amaani. Omwaami asikwiisire aasi, syakwiira elalira hu loba, asinyonyoboole syehola olufu.

⁶ Bulaanu siseenakirwa neende amakulu k'abamanani, neende ak'abo abali mu ngisa.”

⁷ Engira y'abaluungifu ngololofu niyo; haandi ewe Omwaami niiwe okwalaasira abaluungifu engira.

⁸ Huloondakana neende eheenga yao y'emisaango, Ewe Omwaami, niiwe yihusuubiramo; haandi mu hwiichulisa eliita lyao nimwo mu hunyoolera buli siindu si hwekoomba.

⁹ Mu siro, omwooyo kwaange kuhwekoomba, omwooyo kwaange kuhukoonyera elalira. Olwohuba noheengao omusaango mu syaalo, nilwo lu baandu bali mu syaalo beeka obuluungifu.

¹⁰ Kata awahakwiira ababi esisa, haba sibeeka obuluungifu. Kata mu syaalo sy'abaluungifu, mwoosi baholeramo ebidoondobanu haandi sibabona obuhunuufu bw'Omwaami.

¹¹ Ewe Omwaami, osingiise omuhono kwao ohubasaandya, nae haba sibasibona daawe. Leha babone koti lwochuunirwa abaandu bao, mani esoni chibadiire. Leha banyoole esinyaaso siwabiihira abasuku bao.

¹² Ewe Omwaami, niiwe otuberesa omuleembe, haandi ebiindu bihunyoolere byoosi bitula yooli.

¹³ Ewe Omwaami Nasaae weefwe, abaami baandi abataali ewe batutukaho, nae ewe weeng'ene niiwe yi humanyire koti omutuki weefwe mweene.

¹⁴ Nae bulaanu, abo bamala ohufwa, haba sibalamu daawe; beehola emisaambwa, haba sibahakaluhe daawe. Wabaseeta mani wabasihirisa haandi abulao oyo yeesi obeechulisa.

¹⁵ Ewe Omwaami, obaambaliiye esyaalo syeefwe syaaba esihoongo, obaambaliiye esyaalo syeefwe syaaba esihoongo; wiiswamo oluyaali; obaambaliiye enjaho ch'esyaalo syeefwe.

¹⁶ Ewe Omwaami, abaandu bao nibanyoola ebidinyu, beeruhira yooli, nibahusaba nibali nibasaandisibwa.

¹⁷ Koti omuhasi oduuhire ohwiibula, lu alumwa mani yalira olw'obuchuuni bw'engasi ebiha byae by'ohwiibula nibiri aambi, fweesi nilwo lu huli mu moni wao, ewe Omwaami.

¹⁸ Hwaali asito, mani hwaalumwa, nae yibulao esiindu si hweebula daawe. Sibulao esiindu sy'obuhoonyi si huholere mu syaalo, haandi sibulao esilai sihwekeese abaandu.

¹⁹ Abaandu bafwa bahakobolemo obulamu, emibiri kyaabwe kyahasyuuhe. Eng'we mweesi abachia emakoombe, siingire mani mweembe hulw'esangaalo! Koti olume ludoonya mani lwaanyisa eloba, nilwo lu ewe Omwaami wahakaluse obulamu mu baandu bao bafwa.

Ohuheenga omusaango neende ohukaluswa buyaaha.

²⁰ Eng'we abaandu baange, mwiiche mani mwiingire mu biseenge byeeng'we, mani mweyikaliremo; mumale ebiha nimweekisire ohwoola lu tima lya Nasaae lu lyahawe.

²¹ Bone, Omwaami nguyo atulireyo ali ohwiicha naatula mu bwiihalo bwae ohwiicha ohusaandya abaandu hu syaalo hulw'ebibi byaabwe, mani obutemo bwaholwa hu syaalo mu bweekisi buchia ohumanyihana alafu.