Yisaaya 24 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Omwaami achia ohusihirisa esyaalo

¹ Bone, Omwaami achia ohutusa mu syaalo buli siindu, achia ohusisihirisa mani asirehe bihaya, yahasifuunihe mani asalaanie abaandu basyo.

² Ebiha bichia ohwoola ayire buli muundu nasilala; abaandu ba buli ludaalo, banyoole omukabo nasilala neende abalaamisi; abawaambe, neende abaami baabwe; abakuli, neende abakusa; abeeyola, neende abeeyosa; abatuunga, neende abo abatuungwa.

³ Esyaalo syahatuswemo buli siindu mani syadoong'a bihaya; olwohuba Omwaami niye olomaloome emboosi yino.

⁴ Esyaalo syoosi syoomere, haandi buli siindu siriho sihoohere, esyaalo siweeremo amaani haandi sihoohere; ekulu neende esyaalo byoombi, biweeremo amaani.

⁵ Abaandu banyaasire esyaalo; olwohuba bafunaake amalako k'Omwaami, haandi haba sibooseresa by'alagira, mani bafunaake endagaano yae eyitaakama.

⁶ Mani sakira esyaalo sibwaabirwe, haandi abaandu baamwo nibahirwa omusaango; mani sakira abaandu baamwo basihiriiswe, abaonereo, badiidi muno.

⁷ Emisabbiibbu kihoohere, amalwa kahendeerere. Abali nibasangaala, bulaanu bayuuya-bwayuuya.

⁸ Ekono lai ly'obuhana liweereo, neende esiyoka sy'engalaakasa syakaame, ekono ly'aduungu liweereo.

⁹ Haba sibasyeemba nibang'wa amalwa; abali nibang'wa amalwa kameesa, bulaanu kabahahaata nibakang'wa.

¹⁰ Esiko siyobere, buli muundu yeyikaliire mu nyuumba yae, haandi saafukiirira omuundu yeesi ohwiingira.

¹¹ Abali hu ngira bayokera, olwohuba haba sibali neende amalwa k'ohung'wa. Esangaalo lyoosi lyakaame; ebidyaalo byoosi byaakama hale.

¹² Esiko sisihiriiswe, ebiruwa byasyo bifunaakwe.

¹³ Mani byahabe biti mu syaalo syoosi, mu byaalo byoosi. Byahabe koti lu bibechaanga ekesa niliweere, ebyaamo byoosi nibimalire ohunokwa hu misaala, haandi emiseituuni nikiweereho.

¹⁴ Abo abaliba nibaonereo, baheembere mu kono ly'aakulu, nibeemba neende esangaalo liingi, nibali emuumbo, nibafumia oluyaali lw'Omwaami.

¹⁵ Mani sakira, eng'we abali ebukwe, mwiise oluyaali mu Omwaami; abo abali aambi neende enyaanja, mukinie Omwaami Nasaae wa Yisiraeli.

¹⁶ Huwulira enyembo chifumia nichitula hu njakamo y'esyaalo, nichifumia Omuluungifu Mweene. Nae ese mboola endi, “Mbweerera sa, mbwereeremo elalira. Chinjakaanire! Olwohuba abalyaamo olukwe, bemeeda sa ohulyamo olukwe, haandi ohulyamo olukwe hwaabwe hwemeeda sa bwemeeda.”

¹⁷ Ewe omuundu womu syaalo, ebitiisa, neende ameena, neende omuteego, bihutekere!

¹⁸ Mani buli muundu oliiruha ohweewonia ebitiisa yahakwe mu liina; haandi oyo owahasiingire mani yaatula mu liina, yahadiirwe neende omuteego. Olwohuba efula y'amaani yahakwe ohutula mu ekulu, haandi emisiingi ky'esyaalo kyahadengaane.

¹⁹ Esyaalo syahaadihaniremo elalira, esyaalo syahamekuhemo elalira, esyaalo syahadenganisibwe elalira.

²⁰ Esyaalo sidandaamira koti omumeesi, esyaalo sidengaana koti esikaali; obusito bwasyo nibwo ebyonoono byasyo, mani nisyahakwe, haba sisyahasiingire haandi.

²¹ Ebiha ebyo nibyahoole, Omwaami yahasaande, ab'obunyala bali aakulu, muukulu, neende abatuki bomu syaalo, hu syaalo.

²² Ab'obunyala abo, neende abatuki abo, bahabuungihwe alala koti ababoye babasukuuwe mu liina; baheekalirwe mu jeela, mani bahasaandisibwe endaalo nyiingi nichibitireo.

²³ Ao mani esiirima syahadiire elyuuba, haandi omubasu kwahahae ohufwa; Olwohuba Omwaami w'Obunyala niye ochia ohuba omutuki hu Lugulu lwa Siyooni neende mu Yerusalemu mani mu moni w'abeemeresi, achia ohweekesa oluyaali lwae.