Yisaaya 23 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Emboosi yidiira ku Foenisia

¹ Yino niyo emboosi yidiira hu Tiiro. Muhubbe embuungu eng'we abeerusi b'emeeri cha Tarisiisi olwohuba esiko syeeng'we sya Tiiro sisihiriire, sibulamo enyuumba kata sa omwaalo. Emboosi echo chiboolereho nichitula mu syaalo sya Saipurasi.

² Mwewunamire hulw'engisa, eng'we abamenya hu ndulo w'enyaanja, eng'we abachurusi ba Sidoni; bawamwaanda beeng'we bambuuhe enyaanja

³ bambuuhe amaachi k'olusiba. Babakuliire engaano ohutula Misiri, neende ebyaamo byohu mwaalo kwa Naili; bi babisira hu nyaanja, mani mwanyoola engaanga enyiingi nimukusa ebyaalo biindi.

⁴ Nae bulaanu esoni chihudiirire, ewe Sidoni, esiko sy'amaani syohu nyaanja, olwohuba wekaanire noboola oti: “Simbuliraangaho obuchuuni bw'ohwiibula, haandi sinjibulaangaho omwaana yeesi, haba sinuniaangaho omwaana musyaani daawe, kata sa ndaahusaho omwaana muhaana daawe.”

⁵ Emboosi chidiira hu Tiiro nichahoole Misiri, abaandu bayo baheyendehereere muno.

⁶ Mutume emboosi yichie Tarisiisi, muhubbe embuungu, eng'we abaandu bamenya hu bisiinga.

⁷ Sino nisyo esiko syeeng'we esyabasangaasaanga, si mwoombaha mu ndaalo cha hale? Esyatumaanga abaandu basyo ohuchia ohuba mu byaalo by'eyale?

⁸ Wiina mweene owatekeha ohuhola esiindu sino hu Tiiro, esiko siihasa abatuki, abachurusi baamwo bali abahunuufu, haandi abakusi baamwo bali abaandu babeesamo oluyaali hu syaalo?

⁹ Omwaami w'Obunyala niye owatekeha sino, omalao ohweniinia huli mu luyaali lwoosi, haandi owiisa aasi abahunuufu bohu syaalo.

¹⁰ Muchie mwiichule mu syaalo syeeng'we eng'we abaandu ba Tarisiisi, mube koti omwaalo kwa Naili; abulao haandi onyala ohubakayira.

¹¹ Omwaami akololeere omuhono kwae hu nyaanja, mani yadengaania obwaami bwohu syaalo; Omwaami atusire emboosi yidiira hu Fonisia ohusihirisa ebiko byasyo.

¹² Mani aboolere ati: “Ewe esiko sya Sidoni, ohusangaala hwao hwakaame, haandi abaandu bao bafwiinyiriirwe; haandi kata mwaheeruhira Saipurasi, eyo yosi haba simuchia hunyoolayo obuwuluuhiro daawe.”

¹³ Bone esyaalo sya Bbabbilooni! Bano nibo abaandu bakera Tiiro syaaba esolo chomu siino, ataali Abasiria. Nibo abasyoombahaho eminaara ohusyebodoohania, mani basihirisa amadooho kaabwe.

¹⁴ Eng'we abeerusi b'emeeri cha Tarisiisi, muhubbe embuungu, olwohuba esiko syeeng'we sy'amaani sisihiriiswe.

¹⁵ Ebiha ebyo nibyahoole, Tiiro syahebirirwe ohumala embaka y'emyaaka amahumi kataanu-na-kabiri, koti chi omutuki mulala chayiindira. Emyaaka amahumi kataanu-na-kibiri nikyahawe, ebyahabe mu Tiiro biriba koti ebiri mu lweembo ludiira hu muhasi mucheke:

¹⁶ “Bukula obuhana, mani okeende mu siko, ewe omuhasi mucheke webirirwa! Hubba obuhana bilai, niweemba olweembo lwao lulai, hu baandu bahwiichuliise.”

¹⁷ Emyaaka amahumi kataanu-na-kabiri nikyahaweeho, Omwaami yahalehe Tiiro sichaake ohuhola ebiindu bisyaholaanga hale. Syahachaake ohuchurusaanga neende obwaami bwoosi bwohu syaalo.

¹⁸ Obuchurusi bwasyo bwoosi, neende engaanga yi si nyoola yoosi byahabe eby'Omwaami. Haba sisyahedoong'isye oba syebiihira mu maliindiro, nae abo abeenamira Omwaami nibo abahehoonyere eby'obuchurusi byaabwe ohukula ebyohulya bibamala neende engubo ndai.