Yisaaya 22 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Emboosi chidiira hu Yerusalemu

¹ Yino niyo emboosi yidiira hu Hooho ly'Ohuboneherwa. Siina esiboolereho, esikera mwaniina aakulu, hu birama by'enyuumba, eng'we mweesi?

² Ewe esiko sichuule esiyoka, esihayuuhe, haandi esichuulemo esangaalo. Abaandu bao abeeterwe, haba sibeeterwe neende olugaanga kata bafwiira mu biita.

³ Abeemeresi bao boosi beeruhire alala, mani bawaambirwe nibasisiiri ohulasaho ahasaale kata halala hati. Abo boosi babanyoolere bawaambirwe, kata abahaba niberuuhe boola eyale muno.

⁴ Mani sakira ndaboola endi: “Mutuleyo, haba simundingaalaho daawe, muundehe ndire amasika kaange, mutateemaho ohuunemya omwooyo daawe olw'ohusihiriswa hw'abaandu baange.”

⁵ Luno nilwo oludaalo lw'ohuteengereha, ohuyiingirwa, neende ohudiikaana mu Hooho ly'Ohuboneherwa, lu Omwaami Nasaae w'Obunyala atukwiisireho. Ebida by'esiko syeefwe bifunaakwe, haandi ohulira hw'abaandu badaha obuhoonyi huwuliirihanire mu ngulu.

⁶ Mani abalwaani b'amaye abomu syaalo sy'Elamu badiirire obuyiingo neende obusaale beechera hu bigaari neende hu faraasi, haandi abalwaani b'amaye ba Kiiri beecha nibaboloole engabo chaabwe.

⁷ Mani amahooho k'Abayudaaya akahiramo obulai, amahooho keechulamo ebigaari abasikaari beerusa efaraasi nibeema mu moni w'esiruwa sy'esiko sya Yerusalemu.

⁸ Mani ao nibamala ohwaambula ebilwaaniso byoosi ohutula hu Yuda. Mani ebyo nibyali nibiweere, ewe wakisulayo ebilwaaniso ebyali nibyeekisa mu sichiimi.

⁹ Mwabona ebituli ebiingi ebyadomolwa hu sida sy'esiko sya Daudi ebyali nibidaha ohutereeswa, mwachia mwaadaya amaachi kali mu sidiba sy'aasi.

¹⁰ Mwabala enyuumba chali mu Yerusalemu choosi, haandi nimweemao nimulikula-likula echiindi hu munyale ohunyoola ebiindu bimwehoonyera ohwoombaha esida sy'esiko syalikuha.

¹¹ Mani nimuyaba omwaalo akatikaati w'ebida byoombi, yimubuusira alala amaachi komu sidiba sihale. Nae haba simwakoonya oyo owahola sino, kata mwadeebaho hu oyo owatekeha hale sino.

¹² Ebiha ebyo nibyahoole, Omwaami Nasaae w'Obunyala niye olibalaanga eng'we ohulira amasika haandi ohuba neende esibeera, mweebeke efwiiri haandi mwefwaale ebigunia.

¹³ Nae bone, mu siha sy'ebyo, eng'we muchaakire ohusangaala neende ohwehoya, ohusiinja eng'oombe neende ohwiita amakoondi, ohweliira enyama neende ohweng'weera amalwa, nimuboola muti, “Lehe hulye haandi hung'we, olwohuba hunyala ohwefwiira muchuli.”

¹⁴ Omwaami w'Obunyala omweene niye owumbooleere ati: “Mubwadyeeri bweene, esyonoono sino, eng'we haba sisyahabaleherwemo daawe, ohwoola lu mulifwa,” Omwaami Nasaae w'amaye nilwo lu aboola.

Ohulabula Sebbina

¹⁵ Omwaami Nasaae w'Obunyala aboola ati, “Yicha mani ochie eyiri omuliindi wuno, ochie eyiri Sebbina, omuliindi ohulira edooho ly'omutuki, mani omuboolere oti:

¹⁶ ‘Oli neende siina ano, haandi oli neende wiina ano, hu onyale omweene ohweyabira eng'ani ano, ewe oweyabira eng'ani aakulu, haandi omweene werimira obumenyero mu lwaanda?

¹⁷ Nae Bona, Omwaami achia ohuhusihulayo neende amaani, mani ahusukune eyale muno. Ewe omusaacha w'amaani. Achia ohuhudiira ahwomiise,

¹⁸ mani ahuwuube, mani ahuduruuse koti omupiira mu syaalo sibaambalafu. Eyo niyo yiwahafwiire, haandi eyo niyo yi bigaari bi wesikaanga yi byahadoong'e. Wahadiise esoni ab'enyuumba y'omwaami wao.

¹⁹ Omwaami achia ohuhutusa hu mulimo kwao, mani ahwaanula ohutula abuundu wao w'aakulu.’ ”

²⁰ Omwaami aboolera Sebbina ati, “Ebiha ebyo nibyahoole, ndahalaange omuhalaabani waange, Eliakimu, omwaana wa Hilikia,

²¹ mani mufwaale engubo chao, haandi muboye neende oluhoba lwao, mani muberese obunyala bwao. Yahabe laatang'ene abaandu bali mu Yerusalemu neende mu Buyudaaya.”

²² Ndahamuberese obunyala bwoosi ohuliinda abomu nyuumba ya Daudi; haandi ndahamuberese obufuunguo, mani n'afungula, abulao onyala ohufuunga; haandu nafuunga, abulao onyala ohufuungula.

²³ Njia ohumwomiisa mu bwiihalo bwae obwo, koti esihoongo, mani abomu nyuumba ya laatang'ene bamwiisemo oluyaali.

²⁴ Nae bamwanaang'ina neende abanaluyia bae boosi bahamuteeho buli sidinyu syomu nyuumba ya laatang'ene. Bahamulereechereho koti endamu neende enuungiro birereechera hu lusereeswa.

²⁵ Omwaami w'Obunyala aboola ati, “Ebiha ebyo nibyahoole, esihoongo esyali nisyahomwa nisyomiirire, syahasihulwe; syahatemwe syaakwa aasi, haandi omugugu musito okwali hu mabeka kae kuchia ohudwiihulirwa elalira.” Olwohuba Omwaami niye olomaloome.