Yisaaya 18 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Nasaae achia ohusaandya Etiopia

¹ Aaa, engereha w'emyaalo kya Etiopia siriyo esyaalo siwulirihanamo ekono koti ely'embaya chipapala.

² Esyaalo esyo sichia ohutulamo bawamwaanda nibechera hu mwaalo kwa Naili, mu maato k'ebidutu nibaboola bati, Muchie bwaangu, eng'we bawamwaanda, mu syaalo sy'abaandu baleeyi haandi abanyirifu, esyaalo si byaalo byoosi bitya, esyaalo sy'amaani haandi esiyingira ebyaalo byoosi, esyaalo si myaalo kikabuhaniramo.

³ “Tekeerese, eng'we abaandu bamenya hu syaalo, abaandu bali hu syaalo syoosi, nimubona ebbeendera niyisiingisiirwe hu ngulu, tingaaleenge! Eturumbete niyihubbwa, wulireenge!”

⁴ Olwohuba Omwaami aboolere ati: “Njia ohubuleera mani ndingaale ni ndi Muukulu ewaange ni ndi koti obubafu mu mubasu kwaaduha, haandi koti olume ludumuuhira mu bubafu bwomu ndaalo ch'ekesa.”

⁵ Nae koti ekesa ly'emisabbiibbu nilisisiiri ohwoola, ohumuliha nihuweere, mani ebimuli nibyeholere emisabbiibbu kyeengere, omusuku achia ohusihirisa Etiopia, achia ohutemaho amasaga kaloha neende engeso haandi amasaga kalaanda, achia ohukatema kakwe aasi.

⁶ Emilaambo ky'abasikaari baabwe kyahalehwe ao. Ohung'ang'abanirwa amayoni komu ngulu neende ebisolo byohu syaalo. Mani amayoni kacheliire sa mu siminyu nae ebisolo byohu syaalo byoosi bichirye mu toocho.

⁷ Mu biha ebyo, bahaleete ebiyaanwa eyiri Omwaami w'Obunyala ohutula eyiri esyaalo sy'abaandu baleeyi haandi abanyirira, ohutula eyiri esyaalo si byaalo byoosi bitya esyaalo sy'amaani haandi esiyiingira esyaalo si myaalo kikabuhaniramo. Baheeche hu Lugulu lwa Siyooni, lu beenamiraangaho Omwaami w'Obunyala.