Yisaaya 16 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Obulamu budinyu bwa Moabbu

¹ Ohutula mu siko sya Sela, esiri mu siparara, Abamoabbu bayira esiyaanwa sy'amakoondi madoto, eyiri omutuki w'esyaalo, eyiri omutuki wa Yerusalemu.

² Koti lu mayoni kababbabbuluuse akasalaana ohutula mu biyu byako, nilwo lu Abamoabbu bachokaanire nibeeruhana hu olwaasi lw'Omwaalo kwa Arinooni.

³ Baboolera Abayudaaya bati, “Mutukerakireho esy'ohuhola, mutweekeseho obwadyeeri. Lehe esiiniha syeeng'we situbwiheho omubasu nikufwa muno esideete; lehe hweeyikame omwo. Huli abaandu babeebwaabire, mani mutukiseho yi baandu batatubona.

⁴ Lehe abajwaang'e bomu Moabbu bamenye alala naang'we; mube obweyikamo bwaabwe mubawonie oyo oli ohubasihirisa. Nae oyo ofwiinyirira abaasye naabulao haandi ohusihirisa nihwakaame, mani abo abaseenakira abaasye mu makulu bahabe nibaweere mu syaalo.

⁵ Ao mani niwo yi mulala hu beechuhulu ba Daudi yaheechere yeehala hu sisaala sy'obutuki yaatuka abaandu neende obweesikwa alala neende obwadyeeri. Yahatuke abaandu naabakwiira esisa haandi yahaheengere abaandu omusaango niyeema hu obwadyeeri haandi yahabe omwaangu ohuhola obuluungifu.”

⁶ Abaandu bomu Buyudaaya baboola bati, Huwuliire Abamoabbu koti lu bali ab'esuunga, koti lu babeere abeniinia. Humanyire koti lu beehuduumbasa muno haandi nibepaaha, nae beehuduumbasa buhaya bweene.

⁷ Mani sakira, lehe Abamoabbu balire, leha buli muundu oli hulwa Moabbu alire. Lire, nimweyendehereere muno, nimwiichulisa emigaati milai kimwalichaanga mu siko sya Kirihareseeti.

⁸ Olwohuba endalo cha Hesibboni chisihiriiswe, neende emisabbiibbu kya Sibbima kyoosi. Abaami bomu byaalo batemere amasaga kakwo akalaanda ohwoola Yaseri haandi koolera elalira mu siparara. Amasaga kaandi kalaanda hu lwaande luundi kaabita Enyaanja y'Omuunyu.

⁹ Mani sakira njia ohulirira emisabbiibbu kya Sibbima koti lu ndalirira Yaseri; Ewe Hesibboni neende Eleyale, ndahabadosye neende amasika kaange; olwohuba omulaanga kw'ebiita kukwiire hu byaamo byeeng'we neende hu kesa lyeeng'we.

¹⁰ Mani abulao owehoya oba yasangaala hulw'endalo ndai; haandi mu ndalo ch'emisabbiibbu, abulao oweemba hulw'esangaalo; sibulao esiyoka sibulirihana. Abulao omuundu onyuha omweenge kw'emisabbiibbu; esiyoka sy'esangaalo syaakama.

¹¹ Sakira engisa yindiira hulwa Moabbu, neende esibeera hulwa Kiri-heresi.

¹² Mani nae Abamoabbu abeene nibaheetuseyo, mani badiindikirira ohuchia mu bituundu byohu ngulu ohwekongooya banasaae baabwe, haba sibahanyoolemo obuhoonyi daawe.

¹³ Kuno nikwo omulaanga ku Omwaami yalomaloma hale okudiira hu Moabbu.

¹⁴ Nae bulaanu Omwaami aboola ati, “Emyaaka kidatu, ekiri koti emyaaka ki omuhosi ahalaabaniramo ohunyoola omusaara, nikyahawe, oluyaali lwa Moabbu lwahabe niluwereo. Hu baandu ba Moabbu baangi, bahabe nibadoong'ereo abadiidi muno, haandi amaani nikabaweeremo.”