Yisaaya 11 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Obwaami bw'omuleembe

¹ Koti esaga lisebuhira hu musaala kubatema, mani lu abeechuhulu ba Yese muchia ohutulamo omutuki.

² Mani Mwooyo w'Omwaami achia ohumubaaho, mwooyo ow'amakesi neende ow'ohumanya, omwooyo kw'ohukerakira neende okw'amaani, omwooyo w'ohumanya Omwaami neende ow'ohwiisa oluyaali mu Omwaami.

³ Mani esangaalo lyae linabechaanga mu hwiisa oluyaali mu Omwaami. Haba sanaheengaanga omusaango ohweema hu hubona hw'emoni, kata ohuheengao ohweema hu bi awuliire-buwulira.

⁴ Nae anaheengeraanga abamanani omusaango ohuchianakana neende obuluungifu, haandi anaheengeraanga abaloonga bohu syaalo n'aloondakana neende obwadyeeri. Yahatuse esilagiro sidiira hu syaalo, mani abaandu nibasaandisibwa, haandi neende omuuya sa ohutula muhanwa mwae, kuchia ohwiitaanga ababi.

⁵ Obuluungifu bwahabecheenge olusibiro lwomu sibuno syae, haandi obweesikwa nibwo obwahabecheenge olusibiro lw'engubo chae.

⁶ Ebbwe lyahaliireenge alala neende omwaana kw'ekoondi, haandi eengwe yaheyaliseenge alala neende emeeme, haandi emoosi neende edalang'i neende eng'oombe nginu byahalireenge alala, omwaana muyere nabyaaya.

⁷ Eng'oombe neende elyaaka byahalireenge alala; abaana baacho baheeyaliseenge alala; haandi edalang'i yahayeenge obunyaasi koti eng'oombe.

⁸ Omwaana mudoto osinuuna yahabayireenge sa hu liina ly'esikuluhi, haandi omwaana muyere owakaama ohunuuna yahatecheenge sa omuhono kwae mu liina ly'efubi.

⁹ Haba siyahabeeo ohunyaala hwoosi kata sa ohusihirisa hu lugulu lwa Siyooni lwa Nasaae lwoolerefu; olwohuba esyaalo syoosi syahabe nisichuule ohumanya Omwaami koti lu maachi keechula mu nyaanja.

Abaandu babayira mu jeela balilehuulwa baakobola

¹⁰ Oludaalo olwo nilwahoole, omwiichuhulu wa Yese oyo yahabe esilolero eyiri ebyaalo. Ebyaalo bichia ohumukoonya, haandi abuundu yaalitukira yahabe aw'oluyaali.

¹¹ Oludaalo olwo nilwahoole, Omwaami haandi yahehoonyere obunyala bwae ehabi liindi, mani abaandu bae abahabe nibadoong'ao, yahabakobose ohutula mu Asiria, neende mu Misiri, neende mu Patiroosi, neende mu Etiopia, neende mu Elamu, neende mu Sinaari, neende ohutula mu byaalo biri aambi neende enyaanja hoongo.

¹² Omwaami yahasingisire ebyaalo ebbeendera, ohubeekesa ati ali ohubuusa alala abo abayirwa mu buboye ohutula mu Yisiraeli, haandi abuuse alala abo abasalaana ohutula mu Buyudaaya. Neende ohutula mu mbeka chine ech'esyaalo.

¹³ Ehali-hali lya Efuraimu lyahawe, haandi abo abayira Buyudaaya bubi bahasihiriswe; Efuraimu haba sisyahadiirire Buyudaaya ehali-hali daawe, haandi Buyudaaya haba sisyahayire Efuraimu bubi.

¹⁴ Baheeyambaanie alala mani baseeta Abafilisiti abali emuumbo, mani nibayaaya ebiindu by'abaandu bamenya ebukwe abo. Bahayiingire Abeedomu neende Abamoabbu, haandi Abaamooni bahabawulire.

¹⁵ Mani Omwaami yahasihirisire elalira amasaga k'enyaanja y'Emisiri; haandi yahakololere omuhono kwae hu Mwaalo Ewufuraate, mani neende omuyaka kw'amaani kuwuucha, yahakwawulemo emyaalo midiidi kitaanu-na-kibiri hu baandu banyale ohwambuha hu loba lyoomu.

¹⁶ Mani yahabeeo engira hoongo ohutula Asiria yi baandu bae badoong'ereo bahabiteeho koti yi Baisiraeli babitaho nibatula mu syaalo sy'e Misiri.