Yisaaya 10 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Chibaakaanire abo abataao amalako akataali okobwadyeeri, neende abo abaandiiki bemeeda ohwandiika ebifwiinyirira abaandu,

² ebikaira ohuheengera abamanani omusaango mubwadyeeri

³ Mwahahole mutye hu ludaalo lu Omwaami yahabasaandisireho? Mwahahole mutye niyahabooseho amasira katula eyale? Mwaheruhire eyiri wiina ohunyoola obuhoonyi? Haandi mwahakise yeena obuyiinda bweeng'we?

⁴ Sibulao esiindu si mwahahole, ohutusaho ohwiitwa oba ohusaandisirwa alala neende ababoye oba ohwitiirwa mu biita koti abaandi. Olwohuba bino nibimalire ohukwaao, etima ly'Omwaami haba siryahaakame haandi yahabe nasikoloole omuhono kwae ohubasaandya.

Nasaae achia ohwehoonyera omutuki w'Asiiria

⁵ Omwaami haandi yaboola ati, “Ewe Asiria, niiwe endawusi yi mbukulaanga etima niliindiirire, omukwaajo kw'etima lyaange.”

⁶ Njia ohutuma Asiria ohuseeta esyaalo sitaanjisamo oluyaali, njia ohulagira Asiria siseete abaandu baanyooleese. Njia ohutuma Asiria ohuyaaya ebiindu by'abaandu abo mani babiyire, haandi babiseenakire aasi koti lu basenakira eloba lyohu ngira.

⁷ Nae Asiria haba sisiri neende esichiiririrwa sy'ohuhola esiindu si ese ndaha, haandi haba si sisibaasaho daawe; nae esiri mu mwooyo kwasyo nihwo ohusihirisa sa, neende ohutusao ebyaalo biindi;

⁸ olwohuba omutuki w'Asiiria yehuduumbasa n'aboola ati, “Abeemerera amaye kaange nabwaami nibo.

⁹ Ndayiingira esiko sya Kalino, koti lu ndayiingira Karikemisi, ndayiingira esiko sya Hamati, koti lu ndayiingira Aripaadi, haandi ndayiingira Samaria koti lu ndayiingira Damasiko.

¹⁰ Mani koti lu ngoloole omuhono kwaange ohwoola hu byaalo biinamira ebiloongaloongwe, ebiloongaloongwe biingi muno ohuhiraho ebyo ebiri mu Yerusalemu neende Samaria.

¹¹ Koti lu ndasihirisa Samaria neende ebiloongaloongwe ebyalimo nilwo lu njia ohusihirisa Yerusalemu neende ebiloongaloongwe byasyo.”

¹² Omwaami niyahabe n'amalire ohuhola emirimo kyae kyoosi hu Lugulu lwa Siyooni neende hu Yerusalemu, nilwo lu alimala mani hu yasaandya omutuki w'Asiiria olwohweniinia hwae neende ohwehuduumbasa hwae.

¹³ Olwohuba aboola ati: “Esyo ndasihola neende amaani kaange, haandi neende amakesi kaange, olwohuba ndi omukesi-kesi. Ndamalao enjaho ch'ebyaalo, haandi ndayaaya emyaandu kyaabyo. Koti esurusi y'amaani, ndatusao abo abali nibehaale hu bisaala by'obutuki.

¹⁴ Ndanyoola obuyiinda bw'ebyaalo nibuli koti ebiyu by'amayoni; mani ndayaaya obuyiinda bwaabwe koti lu baandu babuusa alala amabuyu kaleherwe ao mani nilibulao eyoni lyoosi elipapa embaya chaalyo, kata sa lyaasamia omunwa kwaalyo, ohwaayula nilitiisa-tiisa.”

¹⁵ Eyaywa yaeniinia yitye yiti yihira oyo oyasyaakira? Oba Omusumeeno kunyala ohweniinia ohuhira oyo okuheengera? Kata omukwaajo kweniinia ohuhira oyo okuyuuba, oba endawusi haba siniyo eyisiingiswa akulu omweeneyo, nae omweeneyo niye oyisiingisa akulu.

¹⁶ Mani sakira Omwaami, Omwaami w'Obunyala oyo, achia ohusiindiha endwaae mu balwaani b'amaani b'omutuki w'Asiiria. Haandi mu siha sy'oluyaali syaabeere naamanyire, Omwaami yahatubuleo omuliro, lwaaba koti omuliro kwaaduha.

¹⁷ Nasaae, obulafu bwa Yisiraeli, yahehole omuliro, haandi Omwoolerefu wae Mweene yahabe koti enjeserye ch'omuliro; mani kwahasaambe haandi kwasihirisa mu ludaalo lulala amawa kae ako neende olunani lwae olwo.

¹⁸ Oluyaali lw'ebichaha byae neende eloba lyae lai. Omwaami yahasihirise, omwooyo neende omubiri byoombi, mani syahabe koti lu bulwaae busihirisa omuundu.

¹⁹ Mani emisaala kyahadoong'eo kyahabe emidiidi muno ki kata omwaana muyere anyala ohubala.

Abaandu badiidi muno nibo abalikobola

²⁰ Ebiha ebyo nibyahoole, abo abahabe nibadoong'ereo hu Baisiraeli neende abo abahabe nibawonereo hu beechuhulu ba Yakobbo, haba sibahesike kata nabudiidi esyaalo esyo esyabayiingira, nae mubwadyeeri bweene, obweesikwa bwaabwe bahabute mu Omwaami, Omwoolerefu wa Yisiraeli.

²¹ Abadiidi bahadoong'eo hu beechuhulu ba Yakobbo bahakobole eyiri Nasaae w'obunyala.

²² Kata katyo, Abaisiraeli abaangi koti omusenye kwohu lwaasi lw'enyaanja, nae esituundu sidiidi muno esyahawoneo nisyo esirikobola. Nasaae owichuule neende obuluungifu niye oheengereo ohusihirisa.

²³ Olwohuba Omwaami, Omwaami w'Obunyala achia ohuleeta ohusihirira hw'esyaalo syoosi koti lu yaheengao ohusihola.

Omwaami achia ohusaandya Asiria

²⁴ Mani sakira Omwaami, Omwaami w'Obunyala aboola ati: “Eng'we abaandu baange, abamenya mu Siyooni, mutatya Abasiria nibabatoocha neende endawusi haandi nibakiinga emikwaajo chaabwe nibabaseeta koti lu Bamisiri baholaanga.

²⁵ Olwohuba mu biha bidiidi muno, njia ohulehera ao ohubanyoolerera, mani etima lyaange lichia ohuchaaka ohubasihirisa.

²⁶ Mani Omwaami w'Obunyala achia ohubatoocha abasaandye, koti lu yatoochera Abamidia hu lwaanda lwa Orebbu; mani achia ohusiingisa endawusi yae hu nyaanja, haandi achia ohuyisiingisa koti yahola mu Misiri.

²⁷ Ebiha ebyo nibyahoole, ndahabadwiihule omugugu musito okuli hu mabeka keeng'we, haandi ekoombo lyae lyahasihiriswe lyaatula hu makosi keeng'we.” Omwaami atulire Rimooni.

Omwiingiriri aseeta

²⁸ Omusuku yolere Ayiati; abitiire mu Migironi, emigugu kyae akibiihire mu Mikimasi;

²⁹ bahalakaanie yibabitira, mani bakona Gebba. Abomu siko sya Rama bateengereha olw'obuti, abomu siko sy'omutuki Saulo esya Gibbeya bamalire ohwiiruha.

³⁰ Eng'we abahaana ba Galimu, mwayule! Eng'we aba Laisa, mutekeerese! Eng'we aba Anatooti, kaluhemo!

³¹ Aba Madumena bali ohwiiruha, eng'we abamenya Gebbimu, mwiiruhe mwewonie.

³² Nyaanga yino, omusuku anaakone abuundu alaangwa Nobbu mani achia ohufuumba esikoonde syae hu lugulu lwa Siyooni, esigulu sya Yerusalemu.

³³ Bone, Omwaami, Omwaami w'Obunyala yahabaanuleo neende amaani katiisa; abahiramo obuhunuufu bahatemwe baakwa aasi, haandi abehuduumbasa bahaloongoyaswe.

³⁴ Omwaami achia ohutema neende embaachi, koti lu yahatema esichaha, mani Lebbanooni neende emisaala kyasyo ky'amaani syahaweere aasi.