Yeremia 9 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Eee, omutwe kwaange kuba nikuli esidiba sy'amaachi, haandi emoni chaange chaaba esulo y'amasika, mani ndaalira esiro neende esideete olw'abaandu baange beeterwe.

² Eee, mba ni ndi neende obweyaango bwohumenyamo mu siparara, ndahalehere abaandu baange mani ndaaba eyale nabo. Olwohuba boosi haba sibeesikwa daawe, mukaanda kw'abaandu b'olukwe.

³ Bakodya olulimi lwaabwe koti oluyiingo; mu siha sy'obwadyeeri, obubacha nibwo obunyoolere amaani mu syaalo. Omwaami aboola ati. “Abaandu baange bemeeda sa ohwonoona, haandi haba sibaamanyire daawe.”

⁴ Leha buli muundu yeliinde owaasye, haandi alehe ohweesikaanga mwaanang'ina yesi, olwohuba buli mwaanama yekaluuhania hu mwaanang'ina yaamuhoba, haandi buli muundu alomaloma sa bubi hu waasye.

⁵ Buli muundu abachia owaasye, haandi abulao olomaloma obwadyeeri. Beekesa enimi chaabwe ohulomaloma obubacha; mani bonoona haandi babula amaani k'ohweyolobya.

⁶ Bemeeda sa ohuholaanga eby'obwaalaba neende ohubacha buli siha, Omwaami aboola ati: bahayire ohuumanya.

⁷ Mani sakira Omwaami w'Obunyala aboola ati: “Bone, ndahabasaanguluse koti esyuuma, mani mbateeme, ndaahole siina syeene, olwohuba abaandu baange?

⁸ Olulimi lwaabwe luli koti ahasaale heeta; lulomaloma eby'obubacha. Buli muundu alomaloma eby'omuleembe eyiri owaasye, nae mu mwooyo yetekeha ohumuteka omuteego.

⁹ Mubaasa muti haba siinjia hubasaandya hulw'ebiindu bino? Mubaasa muti haba siinjia ohwetuunga omweene hu syaalo koti sino? Ese, Omwaami, Niise olomaloome.”

¹⁰ Mani nimboola endi: “Njia ohulira amasika niindirira engulu, haandi njerenjesere obwaayiro bwomu siparara, olwohuba bwoomere mani abulao obubitamo; haandi ohwaana hw'eng'oombe haba sihuwuliirihanamo. Amayoni neende ebisolo biiruuhemo, byawaao.”

¹¹ Omwaami aboola ati: Njia ohuhola Yerusalemu sibe esituuli sy'ebikoha, haandi yi mabbwe kamenya. Ebiko byomu Buyudaaya byaheehole amakuunda, yi baandu batamenya.

¹² Muundu mukesi siina onyala ohumanya sino? Wiina mweene yi Omwaami yaboolera onyala ohusyeekesa abaandu baandi? Lwasiina esyaalo sinyasiihe mani syooma koti esiparara, mani abuleo omuundu osibitamo?

¹³ Omwaami yakobolamo ati: “Esyaalo siri sityo olwohuba mutulire hu malako kaange ka ndabateerao, haandi simuwulira ekono lyaange, oba bahola koti lu mbaboolera.

¹⁴ Nae boomere emitwe mani baloondakana neende obwekoombi bw'emyooyo kyaabwe, mani nibeenamira nasaae olaangwa, Bbaali, koti lu bakuuka yaabwe babeekesa.

¹⁵ Mani sakira Omwaami w'Obunyala, Nasaae wa Yisiraeli aboola ati: Bone, njia ohuliisa abaandu bano ebyohulya bihahaata, haandi mbaberese amaachi kalimo obutwa bang'we.

¹⁶ Njia ohubasalaania mu byaalo bi beene kata balaata yaabwe bali nibataamanyireho daawe; haandi njia ohusiindiha amaye kabalwaanie ohwoola lu bahasihirisirwe elalira.”

Abaandu bomu Yerusalemu basaba obuhoonyi

¹⁷ Omwaami w'Obunyala aboola ati: “Baase, mani mulaange abahasi balira beeche; tume abahasi bamanyire ohuchereenjesa beeche.

¹⁸ Lehe baalaaleho mani bachaake ohutuhubbira embuungu, hunyale ohulira muno amasika katuhulukuse mu moni, haandi ebikye byeefwe bidote amasika.

¹⁹ Olwohuba omulaanga kw'ohulira kuwuliirihana mu Siyooni nikuboola kuti: Husihiriire! Esoni chitudiirire muno, olwohuba hutulire mu syaalo syeefwe, olwohuba bafunaake enyuumba cheefwe.”

²⁰ Abahasi eng'we, wulire Emboosi y'Omwaami, mani tekeerese emboosi yitula mu munwa kwae. Yekese abaana beeng'we bahaana ohuubba embuungu, haandi abasyeeng'we ohuchereenjesa.

²¹ Olwohuba ohufwa hubitiire mu madirisa keefwe, hwingiire mu madooho keefwe. Hwiitiire abaana hu ngira, neende abaraaga mu biito.

²² Lomaloma oti, Omwaami aboola ati: “Emilaambo ky'abaandu kisukuunwe mani kiri koti ebituuli by'embolera mu ndalo. Kiri koti ehaanja ch'engaano kaleherwe mu ndalo yi bakesere, mani abulao okimalao daawe.”

²³ Omwaami aboola ati: “Leha omuundu mukesi ahaye ohweefumia hulw'amakesi kae. Leha omuundu w'amaani ahaye ohweefumia hulw'amaani kae. Leha omuundu muyiinda, ahaye ohweefumia hulw'obuyiinda bwae.”

²⁴ Nae oyo odaha ohweefumia, leha yeefumia olwohuba amanyire haandi awulira ati, Niise Omwaami, ohola hu syaalo ebiindu by'obuheeri butaakama, ebyadyeeri neende ebiluungifu, olwohuba ebyo nibyo ebiindu bisaangaasa.

²⁵ Omwaami aboola ati: Bone, ebiha bichia ohwoola, bi njia ohusaandisiramo abaandu bahebe, nae beeyira koti abataali abahebe

²⁶ abomu Misiri, neende abomu Buyudaaya, aba Edomu, neende aba Abaamooni, aba Moabbu, neende abo boosi abamenya mu siparara, abeeheheta efwiiri lyaabwe, olwohuba abaandu bomu byaalo bino boosi haba si bahebwa daawe. Nae abaandu bomu syaalo sya Yisiraeli beeyira koti abataali abahebe daawe.