Yeremia 8 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

¹ Mu biha ebyo, amakuumba k'abatuki neende abahunuufu bomu Buyudaaya, neende amakuumba k'abalaamisi, ak'abanabbi, neende ak'abaandu baandi abomu Yerusalemu, kahasiihulwe mu ng'ani chako.

² Mu siha syohukabuusa alala mani kasiihwa, kahalehwe humukulu mani kaaba koti embolera. Kahasalaane mu moni w'elyuuba neende omwoosi neende eng'ining'ini chomu kulu choosi, bi baandu abo baheeraanga haandi bahalaabaniraanga, bi beteebaangaho haandi bi beenamiraanga.

³ Abaandu bomu syaalo sibi sino, abahawoneo, buli yibaliba woosi, bahekoombe ohufwa mu siha syohudoong'a nibali abalamu. Ese Omwaami w'Obunyala, Niise olomaloome.

Esyonono neende ohubonereswa

⁴ Omwaami yamboolera ati: Teeba abaandu oti: Abaandu nibakwa, haba sibasiingiraanga daawe? Omuundu naaleha engira, haba saakobolaanga enyuma daawe?

⁵ Lwasiina abaandu bano baleha engira mani baayihayiraho nibatakobola enyuma? Bomiriire hu by'obubacha, mani baahaya ohukobola yi ndi.

⁶ Ndawulira haandi ndaatekeeresa, nae haba sibalomalomaho ebyadyeeri. Abulao kata omuundu mulala oweyolobya ohutula hu bibi byae. Abulao oweteebaho ati, Holere siina syeene sino? Buli muundu yemeeda sa ohuholaanga bi adaha, koti efaraasi yiiruha bwaangu ohuchia mu biita.

⁷ Kata engosya chosi chimanyire ebiha byachio by'ohukoboleramo. Amaguugu, neende obbiichu-bbiichu, neende owaang'i kamanyire ebiha byaako by'ohuwuuyiramo. Nae abaandu baange haba sibamanyire amalako k'Omwaami.

⁸ Munyala mutye ohuboola muti, Huli abakesi, haandi huli neende amalako k'Omwaami? Nae bone, abaandu bakaandiika bakaholere ak'obubacha.

⁹ Abaandu bakesi esoni chichia ohubadiira, bibaheehere mani bahirwe. Bone, bahayire Emboosi y'Omwaami, mani makesi siina ka bali nako?

¹⁰ Mani sakira, abahasi baabwe njia ohubakaba abasaacha baandi, neende endalo chaabwe njia ohuchiba abaandu baandi, olwohuba ohutulira elalira hu muundu ohiramo obudiidi ohwoola hu muhunuufu ohiramo, buli muundu ayuyuuhanira sa ohunyoola engaanga mu saambo yitaali endai. Kata abanabbi neende abalaamisi bosi badaha sa asowa.

¹¹ Mani ebikoonjo by'abaandu baange babiwonia humukulu hwoong'ene, nibaboola bati, Buli siindu siri bulai, nae bubulao obulai buliwo.

¹² Abaandu baange, n'abamala ohuhola eby'omusiro ebyo, mani esoni chabadiira? Haba bbe, esoni haba sichabadiira kata nabudiidi. Haba sibamanya kata ohudiirwa esoni. Mani sakira bahakwe alala neende abo abamala ohukwa. Nindahabasaandye, eyo niyo eyahabe enjakamo yaabwe. Omwaami niye oboola.

¹³ Omwaami aboola ati: “Ndadaha ohubuusa alala abaandu baange, koti omuundu lu abuusa alala ekesa lyae, nae bali koti omusabbiibbu kubulaho emisabbiibbu oba omutuli kubulaho enduli. Kata amasaafu kahoohere. Mani kata ebiindu bi ndababeresa, ndahabatuseho.”

¹⁴ Abaandu b'Omwaami bateeba bati: “Lwasiina husihaale sa? Lehe hwebuuse alala, lehe huchie mu biko bisite mani hufwiire eyo; olwohuba Omwaami Nasaae weefwe atulehere husihirire. Atubereese amaachi kalimo obutwa hung'we, olwohuba hwahola ebyonoono eyiri Omwaami.

¹⁵ Hwasuubira ohunyoola omuleembe, nae sibulao esilai si hwanyoola. Hwasuubira owonesibwa, nae bone, ebitiisa byoong'ene nibyo bi hwanyoola.”

¹⁶ Abasuku beefwe bamalire ohwoola mu siko sya Daani; huwulira efaraasi chaabwe koti lu chifuuta; mani esyaalo syoosi sitengereha sa. Abasuku beefwe beechere ohusihirisa esyaalo syeefwe neende buli siindi sisirimo, esiko syeefwe neende abo abasimenyamo.

¹⁷ Omwaami aboola ati: “Bone, ndi ohubasiindihamo endemo, efubi chi batanyala ohuloka, mani chichia ohubaluma.”

Engisa yidiira Yeremia hulw'abaandu bae

¹⁸ Endaalo chiinjakaanire, engisa yindi hu mwooyo.

¹⁹ Tekeeresa, amaliro k'abaandu baange mu syaalo syoosi, nibateeba bati: “Mani Omwaami ali mu Siyooni? Omutuki wamwo haba sasisiirimo? Lwasiina musiingisa etima lyaange, nimwiinamira ebiindu bi eng'we abeene mwahola, haandi nimwiinamira ebiloongaloongwe?”

²⁰ “Ekesa liweere, esiminyu syakaame, nae haba sihuwoniswe.”

²¹ Olwohuba engisa y'abaandu baange, omwooyo kwaange kwosi kuli mu ngisa, ndira, haandi ndi neende esibeera.

²² Mu Gileadi, mubulamo amalesi? Mubulamo omulesi yeesi? Siina esikayiire abaandu baange ohuwona?