Yeremia 7 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yeremia ayaalira abaandu mu Nyuumba ya Nasaae

¹ Ao mani Omwaami n'aboolera Yeremia ati:

² “Siingira weeme mu siruwa sy'enyuumba y'Omwaami, mani oyaalire abaandu emboosi yino nobaboolera oti: Muwulire Emboosi y'Omwaami, eng'we mweesi abaandu bomu Buyudaaya, abeengirira mu siruwa sino ohwiinamira Omwaami.

³ Omwaami w'Obunyala, Nasaae wa Yisiraeli aboola ati, mukolole esaambo cheeng'we neende ebiholwa byeeng'we, mani njia ohuleha mumenye mu bweyaango buno.

⁴ Mulehe ohweesika emboosi chobubacha chiloondehana chino chiti: Yino nyuumba y'Omwaami, enyuumba y'Omwaami, enyuumba y'Omwaami.”

⁵ “Kaluuhanie ebiima byeeng'we neende ebiholwa byeeng'we. Mube abadyeeri eyiri abasyeeng'we.

⁶ Muleheenge ohufwiinyirira bawalukeenda, neende bamulehwa, neende abahasi bafwiirwe. Mwaakamire ao ohwiitaanga abaandu babula omusaango mu syaalo sino. Mwaakamire ao ohwiinamiraanga banasaae baandi, olwohuba, nimubeenamira abeene muba mwechuunia sa.”

⁷ Ao mani njia ohubaleha mumenye mu syaalo sino si ndaberesa bakuuka yeeng'we ohuba esyaabwe endaalo choosi.

⁸ Bone, muli ohweesika emboosi ch'obubacha, echitaalimo obuhoonyi.

⁹ Mwiiba, mutemula, muhola obucheke, mweechuba ebyobubacha, munioohesera Bbaali obubbaani, haandi mwiinamira banasaae bamukoterwe.

¹⁰ Mwemeede sa ohuholaanga ebiindu bi tadaha bino, mumala mwiicha ohweema mu moni waange, mu nyuumba yaange yeene yino, mani nimuboola muti, Huli bulai.

¹¹ Omwaami ateeba ati: “Mubaasa muti enyuumba yaange yino, bweeyikamo bw'abanyaka? Bone, Ese mweene malire ohubona ebiindu bi muhola.

¹² Bulaanu muchieho Siilo, abuundu yi ndataangira ohudoola ohunyinamiraangamo, mani mubone bi ndasihola, ohweema hu bibi by'abaandu baange Abaisiraeli.”

¹³ Mani bulaanu, olwohuba muholere ebiindu bino byoosi, kata ndahaba nindabalabula amahabi maangi muno, nae nimuhaya ohuwulira, haandi nindabalaanga, mwahaya ohukaluhamo.

¹⁴ Mani sakira esiindu si ndahola Siilo, nisyo siinjia ohuhola Enyuumba yaange yino, yi mweesika, yi ndababeresa eng'we neende bakuuka yeeng'we.

¹⁵ Mani njia ohubeerusa mutule mu moni waange, koti lu ndeerusa abeeho beeng'we boosi, abaandu b'enyuumba ya Efuraimu.

Obujeemu bw'Abaandu

¹⁶ Omwaami yamboolera ati: “Nae ewe Yeremia, otasabira abaandu bano, oba wandirira oba waasaba hulwaabwe. Otandekweeda daawe, olwohuba haba siinjia ohuhuwulira.

¹⁷ Ewe haba soobona ebiindu bi bali ohuhola mu biko bya Buyudaaya neende hu ngira chomu Yerusalemu?

¹⁸ Abaana bateenya eehwi, laata yaabwe nabo baadusa omuliro, nae abahasi bakaanda obusye, ohuubba emigaati eyiri nasaae muhasi w'ekulu; haandi baakaluuhanira banasaae baandi ebiyaanwa by'ohung'wa, ohusiingisa etima lyaange.”

¹⁹ Omwaami aboola ati: “Haba sibali ohutaangana Ese, nae abeene nibo abetaangana, mani abeene nibeereetera ohudoondobana.”

²⁰ Mani sakira Omwaami Nasaae aboola ati: “Bone, njia ohwiisa etima lyaange neende obwaalaba bwaange abuundu ano, hu buli muundu neende hu buli solo, hu buli musaala kwomu siino neende hu buli syaamo syomu loba. Etima lyaange lichia ohwaaduha mani lihaye ohusima daawe.”

²¹ Omwaami w'Obunyala, Nasaae wa Yisiraeli, aboola ati: Ebiyaanwa byeeng'we bisaambwa byosi mubimeeda hu biyaanwa byeeng'we biindi, mani mulye enyama yoosi.

²² Olwohuba, hu ludaalo lu ndatusa bakuuka yeeng'we ohutula mu syaalo sya Misiri, haba sindababeresa ebilagiro bidiira hu biyaanwa bisaambwa neende ebiyaanwa biindi.

²³ Nae ndabalagira sino endi: Wulireenge ekono lyaange, mani njia ohuba Nasaae weeng'we, naang'we muchia ohuba abaandu baange. Muchianakaneenge neende ebyo byoosi bi mbalagira, mani buli siindu sichia ohubachiira bulai.

²⁴ Nae nibahaya ohuwulira oba ohutekeeresa, ohutusaho baloondakana neende amakesi kaabwe keene, neende ebiholwa by'emyooyo kyaabwe mibi. Mani mubweyaango bw'ohusuda mu moni, bakaluha sa enyuma.

²⁵ Ohutula mu ndaalo chi bakuuka yaabwe batulira mu syaalo sya Misiri ohwoola buti, ndemeeda-bwemeeda ohubatumira abahalaabani baange, abanabbi.

²⁶ Nae nibahaya ohuumbulira, oba ohutekeeresa bi mboola. Mani niboomya emitwe, nibahola ebiindu bibi ohuhiraho bakuuka yaabwe.

²⁷ Ewe Yeremia, wahabeekese emboosi chino choosi, nae haba sibachia ohuhuwulira. Wahabalaange, nae haba sibachia huhukobolamo.

²⁸ Wahababoolere oti, Esyaalo sino haba sisiwulira ekono ly'Omwaami Nasaae waabwe, haandi haba sisifukiirira hukololwa. Obwadyeeri bukotereo; haba kata si badaha hulomaloma obwadyeeri.

Ebyonoono byaholerwa mu hooho lya Hinoomu

²⁹ Eng'we abaandu bomu Yerusalemu, mweebekeho efwiiri mani mulisukune eyale. Muchaake ohulira nimuli aakulu w'ebigulu, olwohuba Omwaami anyoleere mani yaahaya haandi yaasukuna abaandu bae.

³⁰ Omwaami aboola ati: “Abaandu bomu Buyudaaya bonoonere mu moni waange. Babukuule banasaae baabwe mani baabata mu Nyuumba yaange, baayinyaasa.

³¹ Boombaahe ebituundu bihunuufu Tofeeti, mu hooho ly'omwaana wa Hinoomu, ohusaamba abaana baabwe basyaani neende abaana baabwe bahaana mu muliro, esiindi sitabalagiraangaho ohuhola, oba sitabaasaangaho daawe.”

³² Mani sakira bone, ebiha byahoole, sihaye ohulaangwa siti, Tofeti, oba ehooho ly'omwaana wa Hinoomu, nae sichia ohulaangwa siti, ehooho ly'Esisiinjiro, bahasiihemo abafu, olwohuba bwahabuleo obweyaango buundi obwohusiihamo abafu.

³³ Mani emilaambo ky'abaandu bano kyahabe ebyohulya by'amayoni kabburuha neende ebisolo byomu siino; mani abulao owahabiiruse.

³⁴ Njia ohwaakamya mu biko bya Buyudaaya neende mu ngira chomu Yerusalemu amakono k'ebidyaalo neende esangaalo, neende amakono k'abo abali mu bidyaalo by'ohudeehisania; olwohuba esyaalo syaheehole ekuunda.