Yeremia 5 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esibi sya Yerusalemu

¹ Abaandu bomu Yerusalemu, mwiiruhe nimweebodoohania engira chomu siko syeeng'we. Tingaale mwehaliirise. Koonye mu bituundu byasyo mani mubone nimwahanyoola hoomo omuundu kata mulala, ohola ebiluungifu haandi okoonya obwadyeeri. Nimunyoolamo, Omwaami achia ohuleheramo Yerusalemu.

² Kata bahaboola bati, “Koti lu Omwaami ali omulamu,” nae beechuba eby'obubacha sa.

³ Ewe Omwaami, abo haba sibabona obwadyeeri? Obasaandiisye, nae nibahaya ohweeka. Obasihiriise, nae nibahaya ohukololwa. Bomiirire muno ohuhiraho olwaanda; mani nibahaya ohweyolobya.

⁴ Naange nimboola endi, “Bano bamanani nibo, boong'ene nibo abasiru; olwohuba haba sibamanyire bi Omwaami adaha, neende bi Nasaae waabwe alagira.

⁵ Njia ohuchia eyiri abahunuufu baabwe nomanome nabo; olwohuba bamanyire bi Omwaami adaha neende bi Nasaae waabwe alagira.” Nae boosi-boosi nasilala bajeemeere Omwaami, baahaya ohuwulira ebilagiro byae.

⁶ Mani sakira edalang'i echitula mu bichaha chahatuleyo chibeete, amabbwe komu siparara kaheeche kabasihirise. Eengwe chahakeendereenge aambi neende ebiko byaabwe, mani chahabosyoole-bosyooleenge buli muundu olibitulaangamo; olwohuba ebyonoono byaabwe biingi nibyo, haandi batulire muno hu Nasaae.

⁷ Omwaami ateeba ati, “Nyala endye ohubaleheramo? Abaana beeng'we baandulireho, haandi beechubiire abo abataali Nasaae. Ndababeresa buli siindu si badaha, nae bahaya ohuba abeesikwa mani nibebuusira mu nyuumba ch'abacheke.

⁸ Bali koti efaraasi saacha echaaywa bulai neende obwekoombi buli yitulayo yilaluhanira ehasi ye yiindi.

⁹ Ndahahaye endye ohubasaandya hulw'ebiindu bino? Omwaami niye oboola; mani ndaahaya ohwetuunga omweene hu syaalo siri koti sino?

¹⁰ “Mubite mu ndalo chaabwe ch'emisabbiibbu mani muchisihirise nae mutachimalirayo elalira. Mwaakuleho amasaga kachio, olwohuba haba si kaange niko.

¹¹ Olwohuba abaandu bomu Yisiraeli neende abomu Buyudaaya haba sibabeere abeesikwa yi ndi kata nabudiidi, Omwaami niye oboola.

Omwaami ajwaang'a Yisiraeli

¹² Balomaloome eby'obubacha hu Omwaami, nibaboola bati: ‘Sibulao sya anaahole; Sibulao esibi sinaatukweeho. Ebiita oba enjala haba sibichia ohutwoolaho.

¹³ Abanabbi bahabe koti omuyaka sa yibulao emboosi yitula eyiri Omwaami yibali nayo. Mani sino syahabakweeho.’ ”

¹⁴ Mani sakira Omwaami Nasaae w'amaye aboola ati: “Olwohuba balomaloome batyo, bona, njia ohuhola emboosi chaange chibe omuliro mu minwa kyaabwe. Abaandu bano bahabe koti eehwi, mani omuliro okwo kwahabasihirise.

¹⁵ Bone, eng'we Abaisiraeli, njia ohuleeta esyaalo sy'eyale sibasihirise, Omwaami niye oboola. Abo nibo ab'esyaalo sy'amaani, haandi esihale, Esyaalo sy'olulimi lu mutaamanyire, haandi haba simumanyireho bi balomaloma.

¹⁶ Boosi basaacha b'amaani, ebikiingiro by'obusaale byaabwe biri koti eng'ani cheekuha.

¹⁷ Bahalye emere yeeng'we neende ebyohulya byeeng'we; baheete abaana beeng'we basyaani neende abaana beeng'we bahaana. Baheete ebyaayo byeeng'we neende eng'oombe cheeng'we. Bahanyaase emisabbiibbu kyeeng'we neende emituli kyeeng'we. Bahasihirise neende engaanga ebiko byeeng'we bisite bi mweesika.”

¹⁸ Omwaami aboola ati: “Nae mu ndaalo echo, haba siinjia hubasihirisa mbamalireo elalira.

¹⁹ Mani abaandu nibaheteebe bati, ‘Lwasiina Omwaami Nasaae weefwe yatuhola ebyo byoosi?’ Mubakobolaangamo muti, ‘Koti lu eng'we mwaandulaho mani nimuhalaabanira banasaae bateende mu syaalo syeeng'we, nilwo lu munahalaabanireenge abaandu bateende mu syaalo sitaali esyeeng'we.’ ”

Nasaae alabula abaandu bae

²⁰ Omwaami aboola ati: Sino musiboolere ab'olwiibulo lwa Yakobbo, musilaangirire eyiri Abayudaaya muti:

²¹ “Wulire sino, eng'we abaandu basiru haandi abatamanya, abali neende emoni, nae haba sichibona, abali neende amatwi, nae haba sikawulira.”

²² Haba simutyaaho, Ese Omwaami? Ndataao omusenye ohuba olwaaho lw'enyaanja, lu nyaanja yitanyala ohuduuma; kata efwiinda chahahubba chitye, haba sichinyala ohuunyiingira. Kata efwiinda chahawoola chitye, haba sichinyala ohukubitaho daawe.

²³ Nae baandu eng'we, muli ab'emitwe myoomu haandi abajeemu. Muundulireho, mwaawaao.

²⁴ Simwabaasaho mu myooyo kyeeng'we muti, Lehe hutye Omwaami Nasaae weefwe, okwiisa efula mu biha byao, efula y'etoocho neende efula y'esiruumbi, mani n'ataao ebiha by'ohukesa buli mwaaka.

²⁵ Nae ebyonoono byeeng'we nibyo ebitusireo ebiindu bino, nibyo ebibakayiire ohunyoola ebiindu bilai bino.

²⁶ Mu baandu baange mulimo abahola-mbi. Beetekeha koti abateki b'amayoni. Bateka omuteego; ohudiira abaandu.

²⁷ Koti olutaanda lw'omuyiimi lwaheechula amayoni, nilwo lu beechusa enyuumba chaabwe neende ebiindu bi banyakire. Sakira beehola abaandu bahunuufu haandi abayiinda,

²⁸ sakira bahomeere mani baanyirira. Ebiholwa byaabwe bibi bibula enjakamo; baheenga omusaango ataali obwadyeeri haba sibadeeba hu bamulehwa haandi sibakayirira abo abafwiinyirirwa.

²⁹ Omwaami ateeba ati: “Mubaasa muti ndahahaye ohubasaandya hulw'ebiindu bino? Haandi mubaasa muti haba siinjia ohwetuunga omweene hu syaalo siri koti sino?”

³⁰ Esiindu si tiisa haandi esisiindusa syeholeehe mu syaalo muno:

³¹ abanabbi balaanga eby'obubacha, haandi abalaamisi batuka koti abanabbi lu babalagira; mani abaandu baange baahaya ohusiyiingania daawe. Nae siina syeene si mwahahole enjakamo niyoolere?