Yeremia 47 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Emboosi y'Omwaami eyidiira hu Filistia

¹ Omwaami yalomaloma naange ebidiira hu Filisiti, omutuki wa Misiri n'asisiiri ohuseeta Gasa.

² Omwaami aboola ati: “Bona, amaachi kaniina nikatula emukulu, haandi kachia ohuba koti omwaalo kwiichuule okuhulukusa neende amaani; kwahabwiihe esyaalo syoosi neende buli siindu siriho syoosi, ebiko neende abo boosi ababimenyamo. Abaandu bahahuumule nibadaha obuhoonyi, haandi buli muundu oli mu syaalo yahalire naali mubuchuuni.

³ Bahawulire embiindo ch'ebirekeyi by'efaraasi, neende ohuwuuma hw'ebigaari. Balaataang'ene baana haba sibahahubbe amahemo enyuma, bahateengerehe amahono nibaweeremo amaani.

⁴ Olwohuba oludaalo lusudire aambi olw'ohusihirisa Abafilisiti boosi, ohumala hu Tiiro neende Sidoni buli muhoonyi wadoong'ao. Olwohuba Omwaami ali ohusihirisa Abafilisiti, abadoong'ereo hu sisiinga sya Kaputoori.

⁵ Efwiiri liweere hu baandu ba Gasa, haandi abaandu ba Asekelooni basihiriire. Eng'we ab'Anakimu abadoong'ao mwahaake yeena ohuchereenjesa?”

⁶ Mulira muti; “Olugaanga lw'Omwaami! Mwahabuleere liina? Mulukobose abeene mu sikiingiro syaalwo, muwuluuhe mani muwuleere!

⁷ Nae lunawuluuhe lutye, nikali mbwe Omwaami mweene niye olagiire esy'ohuhola? Ndaalagiire ohuseeta Asikelooni neende egenya ly'enyaanja.”