Yeremia 4 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Abaisiraeli balaangwa ohweyolobya

¹ Omwaami aboola ati: “Eng'we Abaisiraeli, nimudaha ohukobola yindi, mukobole. Nimwaakama ohuhola eby'omusiro mu moni waange, mani mwaaba abeesikwa yi ndi,

² nimwechubaanga mubwadyeeri neende mu buluungifu muti ‘Koti Omwaami lwaali omulamu.’ Mani ebyaalo byoosi byahasabe ohunyoola ehabi nibibitira mweeng'we, haandi binefumisiraanga mweese.”

³ Olwohuba Omwaami aboolera abaandu bomu Buyudaaya neende abo abamenya mu Yerusalemu ati: “Mulime eloba lyeeng'we litalimwangaho, mani muhaye ohutaakaanga amawa.

⁴ Muliinde Endagaano yi mwahola naange, Ese Omwaami, haandi mweyaanireyo elalira yi ndi, eng'we abaandu bomu Buyudaaya neende abamenya mu Yerusalemu; ataali ao, etima lyaange lichia ohwaaduha sa koti omuliro, lyaaduhe mani abuleo onyala ohulisimya, hulw'ebyonoono bi mwahola.”

Buyudaaya sitiiswa-tiiswa ohuseetwa

⁵ Mulaangirire mu Buyudaaya neende mu Yerusalemu, nimuboola muti: “Muhubbe eturumbete mu syaalo; musiingise ekono mani muboole muti, Mwebuuse alala, hwiingire mu biko byasitwa.

⁶ Musiingise ebbeendera nimuchia Siyooni. Mwiiruhe ohweewonia, haba mutahiinda daawe, olwohuba Omwaami ali ohuleeta amasira neende ohusihirira hw'amaani ohutula emukulu.

⁷ Koti edalang'i yahatula mu sichaha syayo, olwo nilwo lu musihirisi w'ebyaalo atulireyo. Atulire mu bweyaango bwae ohwiichia ohusihirisa esyaalo syeeng'we. Ebiko byeeng'we byahasihiriswe bihaye ohubaamo ababimenyamo daawe.

⁸ Mani sakira mwefwaale ebigunia, mulire haandi muhubbe embuungu; olwohuba etima ly'Omwaami lyaalaba haba silikaluhaane ohututulaho daawe.”

⁹ Omwaami aboola ati: “Hu ludaalo olwo, abatuki neende abahoongo bahaweemo amaani; abalaamisi bahateng'eng'ale, haandi abanabbi bahawuke.”

¹⁰ Ao niwo yi ndahabooleere endi, “Aaa, Omwaami Nasaae, mubwadyeeri bweene, obachiriise abaandu bano, neende esiko sya Yerusalemu noboola oti, ‘Bichia ohubachiira bulai’. Nae mubwadyeeri bweene, olugaanga lw'ohubasihirisa luli aambi.”

¹¹ Mu biha ebyo, bahaboolere abaandu bano neende esiko sya Yerusalemu bati: “Omuyaka mu bafu kuwuucha, nikutula hu ngulu chomu siparara nikwiicha yi muli, haba simboo haya eyiwuuchaanga omuhuuchi oba eyilabya.

¹² Nae omuyaka ku Omwaami alagiire ohwiichia, kuchia ohuba okw'amaani muno ohuhirao. Bulaanu Omwaami mweene niye oheengerao abaandu bae omusaango.”

Buyudaaya syebodoohaanwe neende abasuku basyo

¹³ Bone, omusuku wao nguyo yeecha koti esireesi, ebigaari byae biri koti esiifuusye; efaraasi chae chiiruha muno ohuhiraho eeswi. Chitwakaanire, olwohuba husihiriire!

¹⁴ Ewe Yerusalemu, yosa omwooyo kwao, kuweemo ebyonoono, mani owone. Wahaake yeena ohubaasa ebibaaso bibi?

¹⁵ Olwohuba bawamwaanda batula mu Daani neende mu Lugulu lwa Efuraimu balaangira amasira.

¹⁶ Labule ebyaalo muti ali ohwiichia; laangirire eyiri Yerusalemu muti, “Abasuku bali ohwiichia nibatula mu syaalo sy'eyale. Abasuku bao bachia ohuyokerera ebiko bya Buyudaaya.

¹⁷ Baheebodoohanienge Yerusalemu hu buli lwaande, koti abaliindi b'endalo, olwohuba abaandu bamwo bajeemera Omwaami. Omwaami niiye oboola.

¹⁸ Buyudaaya, ewe omweene niiwe oweleetera ebyo hulw'engeri y'obulamu bwao neende hulw'ebiindu bi wahola. Esibi esyo nisyo esikera n'osaanda otyo, haandi nisyo esihuchuunia omwooyo.”

Engisa yidiira Yeremia olwohuba abaandu bae

¹⁹ Engisa yiinjita, engisa yiinjita! ndi mubuchuuni! Aaa, omwooyo kwaange! Eholo yiihubba; haba siinyala ohwesimiirisa daawe; mbuliire ekono ly'eturumbete neende ohuubba embuungu hw'ebiita.

²⁰ Amasira kaloondehana sa, esyaalo syoosi sinyaasirwe. Amayeema keefwe kasihiriiswe bwaangu muno, engubo chamwo chitanduuhe, cheeholere ebicheere.

²¹ Ndahabone ebbeendera y'ebiita ohwoola liina? Haandi ndahawulire ekono ly'eturumbete y'ebiita ohwoola liina?

²² Omwaami aboola ati: “Abaandu baange basiru nibo, haba sibaamanyire daawe. Bali koti abaana bayere, abataamanyireho esiindu syoosi. Bamanyire sa ohwonoona, nae haba sibamanyire ohuhola ebilai.”

Ohuboneherwa hwa Yeremia hudiira hu husihiriswa huchia ohubaao

²³ Ndatingaala hu syaalo, nae bone, syali esihaya haandi nisinyasiihe; haandi ekulu lyoosi, haba silyaali neende obulafu.

²⁴ Ndatingaala hu ngulu, nae bone, chali nichidengaana, neende ebigulu byoosi byali nibyewuuba-bwewuuba.

²⁵ Ndatingaala, nae bone, yabulao omuundu, neende amayoni koosi akali nikabburuuhe.

²⁶ Ndatingaala, nae bone, eloba lai lyali nilyeeholere esiparara, neende ebiko byasyo byoosi byali nibisihiriiswe olwohuba Omwaami yali n'anyoleere muno.

²⁷ Olwohuba Omwaami aboola ati, “Esyaalo syoosi syahanyaasihe, nae haba sisichia ohusihirisirwa elalira.”

²⁸ Olwohuba esyaalo sino syahalire haandi ekulu lyeehola esiirima. Olwohuba Ese nomanoome, haandi heengereo; haba siinjia ohukaluuhana oba haba kata ohusireha daawe.

²⁹ Nibahawulire esiyoka sya abeerusi b'efaraasi neende esy'abalasi b'obusaale abaandu ba buli siko baheeruhe; abaandi baheengire mu bichaha; nae abaandi bahaniine amakina. Ebiko byoosi byahalehwe ao sa abuleo omuundu wahabimenyemo daawe.

³⁰ Nae ewe Yerusalemu, webwabirwe! Lwasiina wenyirisa niwefwaala engubo ching'enaang'ena? Lwasiina wesyaaya neende emigasa ky'esaabbu neende ohwetona eraangi mu moni? Wenyirisira buhaya sa. Abeecha bao bahuchalaasa-buchalaasa; haandi bakoonya sa ohuhwiita.

³¹ Olwohuba mbuliire ekono liri koti elyo muhasi oli mubuchuuni bw'ohwiibula, ohwayula huli koti ohwo muhasi owiibula omwaana wae waamberi. Elyo nilyo ekono lya Yerusalemu esifundeerere mani nisitanyala ohuyeera omuuya, Sisiingisa aakulu amahono kasyo mani nisiboola siti, “Endaalo chiinjakaanire! Obulamu buwaamo, abatemo babumalao.”