Yeremia 39 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohuwaambwa hwa Yerusalemu

¹ Mu mwaaka kwa hataanu-na-hane ech'obutuki bwa Sedekia omutuki wa Buyudaaya, mu mwoosi kw'ehumi, Nebukadineesa omutuki wa Bbabbilooni neende eye lyae lyoosi, baseeta Yerusalemu.

² Mu mwaaka kw'ehumi neende mulala okw'obutuki bwa Sedekia, mu mwoosi kwohune, hu ludaalo lwa hataanu-na-hane olw'omwoosi okwo, Abakalidaaya badomola eliina mu sida sy'esiko.

³ Yerusalemu nisyawaambwa, abahoongo b'omutuki wa Bbabbilooni boosi beengira beehala mu Siruwa sy'Akatikaati. Mwaabo nimwo omwaali: Nerigali-Sareseeri, Samiga-Nebbo, Sarisekimu Omurabbisari, Nerigali-sareseeri, Omurabbimagi, neende abahunuufu baandi boosi ab'omutuki wa Bbabbilooni.

⁴ Nae Sedekia omutuki wa Buyudaaya neende abasikaari boosi nibabona ebikwiireo, beeruha, baatula mu siko esyo esiro. Bachiira hu ngira yomundalo y'omutuki, nibabitira akatikaati w'ebida bibiri, mani nibeeyiba nibachiira mu hooho lya Yorodaani.

⁵ Nae eye ly'Abakalidaaya niliboongaho, niliwaambira omutuki Sedekia mu bipaapi bya Yeriko. Bulaanu bamuyira Ribbila, mu syaalo sy'Amaati eyiri Nebukadineesa omutuki wa Bbabbilooni. Nebukadineesa n'amuheengera omusaango.

⁶ Eyo Ribbila, omutuki wa Bbabbilooni niyo yi yeetera abaana ba Sedekia mu moni wae naabona. Omutuki wa Bbabbilooni haandi yeeta abahunuufu bomu Buyudaaya boosi.

⁷ Nebukadineesa omutuki wa Buyudaaya n'achomola mu Sedekia emoni, mani n'amuboya neende eminyororo, naamuyira Bbabbilooni.

⁸ Abakalidaaya basaamba enyuumba y'omutuki neende enyuumba ch'abaandu, haandi nibalikula ebida byomu Yerusalemu.

⁹ Mani Nebbusaradaani, omuhoongo w'eye, naayirwa mu jeela mu Bbabbilooni abaandu bali nibadoong'ere mu siko, neende abo abali niberuuhe nibeyaanireyo.

¹⁰ Nebbusaradaani, omuhoongo w'eye, naaleha mu Buyudaaya abamanani baandi abataaliho neende esiindu syoosi daawe, mani naababeresa endalo ch'emisabbiibbu, neende emikuunda.

Yeremia alehuulwa

¹¹ Nebukadineesa omutuki wa Bbabbilooni mani naalagira Nebbusaradaani omuhoongo w'eye ebidiira hu Yeremia n'aboola ati,

¹² “Mubukule mani omuliinde bulai, haandi otamuholaho esibi syoosi daawe, nae muholere buli siindu sy'ahusaba.”

¹³ Mani Nebbusaradaani, omuliindi w'eye, neende Nebbusasibbaani Omurasaari, neende Nerigali-Sareseeri Omurabimaagi, neende abahunuufu boosi ab'omutuki wa Bbabbilooni

¹⁴ nibatuma baleete Yeremia ohutula mu lwaanyi lw'omuliindi. Mani nibamudiisa Gedalia omwaana wa Ahikamu, omwiichuhulu wa Safani, amuyire engo wae. Ao mani Yeremia naamenya alala neende abaandu bae.

Esuubi lya Ebbedimeleki

¹⁵ Omwaami yamboolera nisiboyeerwe mu lwaanyi lw'omuliindi oyo ati:

¹⁶ “Yeremia, chia oboolere Ebbedimeleki Omuitiopia oti, Omwaami w'Obunyala, Nasaae wa Yisiraeli aboola ati: Bona, njia ohwooseresa emboosi chaange, njose esibi hu siko sino, nae haba siinjia hukwiisaho esilai. Sino sichia ohwoolerera mani wesi ochia ohusibona neende emoni chao.

¹⁷ Nae Ese Omwaami, njia ohuhuwonia, haba soochia hudiiswa mu mahono k'abaandu booli ohutya abo.

¹⁸ Olwohuba mubwadyeeri bweene, njia ohuhuwonia, haba soochia hwiitwa daawe. Nae ochia ohuwonia obulamu bwao, olwohuba wandeesika. Ese Omwaami, Niise oboolere.”