Yeremia 29 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yeremia yaandiikira Abayudaaya bali mu Bbabbilooni

¹ Yino niyo Ebbarwa yi omunabbi Yeremia yaandiikira abalaamisi, abanabbi, neende abaandu bahuluundu, neende abaandu boosi ba Nebukadineesa yatusa mu Yerusalemu mani yaabayira mu Bbabbilooni mu buwaambe.

² Yayaandiika omutuki Yekonia, neende ng'ina, neende abeemirisi bomu Buyudaaya neende abomu Yerusalemu, aboombahi neende Abetaanyi, nibamalire ohutuswa mu Yerusalemu.

³ Ebbarwa yino, Yeremia yayiberesa Elaasa omwaana wa Safani, neende Gemaria omwaana wa Hilikia, ba Sedekia omutuki wa Buyudaaya yatuma Bbabbilooni eyiri Nebukadineesa, omutuki wa Bbabbilooni. Yali niyiboola yiti:

⁴ Omwaami w'Obunyala, Nasaae wa Yisiraeli aboola ati eyiri abaambe boosi ba ndayira mu buwaambe ohutula Yerusalemu ohuchia Bbabbilooni.

⁵ Mwoombahe enyuumba mani mumenyemo; mulime endalo mani mulye ebyaamo byaachio.

⁶ Mudeehye abahasi mani mubeebulemo abaana basyaani neende bahaana. Muhweere abaana beeng'we basyaani haandi lehe abaana beeng'we bahaana badeehe, mani banyale ohwiibulana, beengiiye, bahaye ohuduuduya.

⁷ Nae muloondekane neende obulai bw'esiko sindabatumamo mu buwaambe. Mani musabe Omwaami aberese esiko esyo ehabi.

⁸ Olwohuba Omwaami w'Obunyala, Nasaae wa Yisiraeli aboola ati: “Mutafukiiriraanga abanabbi neende abalakusi ba muli nabo ohubabachirisaanga. Mutatekeeresaangaho ebilooto byaabwe bi baloota,

⁹ olwohuba ebiindu bi balaangiriraanga nibehoonyera eliita lyaange by'obubacha buhaya nibyo. Ese haba simbatumaangaho daawe. Ese Omwaami, Niise oboolere.”

¹⁰ Olwohuba Omwaami aboola ati: “Emyaaka amahumi kataanu-na-kabiri kindadaha mube mu Bbabbilooni nikyahawe, ndahabadeebaho, mani njoserese esisuubise syaange sy'ohubakobosa abuundu ano.

¹¹ Olwohuba manyire bulai ebiindu bi mbatekehere. Ebiindu bi mbatekehera haba si bibi, by'omuleembe haandi birimo esuubi lai mu ndaalo chiichayo.

¹² Sakira mwahanaangeenge haandi mwiicha yi ndi ohuusaba, mani mbawulira.

¹³ Muchia ohungoonyanga mani munyoola; nimuungoonya neende emyooyo kyeeng'we kyoosi.

¹⁴ Mubwadyeeri bweene muchia ohunyoolaaga, haandi njia ohubakalusiraanga ehabi cheeng'we mani mbabuuseenge ohutula mu byaalo byoosi neende mu bituundu byoosi bi ndabasalaanisiramo, niimbakobosa mu syaalo si ndabatusamo niimbayira mu buwaambe. Ese Omwaami, Niise oboola.”

¹⁵ Muboola muti, Omwaami atubeere abanabbi mu Bbabbilooni.

¹⁶ Muwulire esyo si Omwaami aboola hu bidiira hu mutuki wihaale hu sisaala sy'obutuki bwa Daudi, neende ebidiira hu baandu boosi abali mu siko sino, neende abeeho beeng'we abayiribwa alala naang'we mu buwaambe:

¹⁷ Omwaami w'Obunyala aboola ati, Bone, njia ohubasiindihamo ebiita neende enjala neende oluumbe, mani mbahole babe koti emituli mifuundu, kitahanyala ohuliibwa daawe.

¹⁸ Njia ohubaloondaho neende ebiita, enjala neende oluumbe, haandi mbahole babe esilaamo, esitiisa, esiwukisa, neende esibwaabo eyiri ebyaalo byoosi bi ndabasiindihamo.

¹⁹ Ebyo byahabakweeho olwohuba haba sibawulira emboosi chaange chindabatumira ataali ohujoong'a niimbitira mu bahalaabani baange abanabbi, nae baahaya ohuwulira.

²⁰ Mani eng'we mweesi ba ndatusa mu Yerusalemu ndaayira Bbabbilooni mu buwaambe, muwulire Emboosi y'Omwaami.

²¹ Omwaami w'Obunyala, Nasaae wa Yisiraeli aboola ebidiira hu Ahabbu, omwaana wa Kolaya neende Sedekia omwaana wa Maseya, abali ohubalaangiraanga eby'obubacha nibehoonyera eliita lyaange ati: Bone, njia ohubayaanayo mu mahono ka Nebukadineesa omutuki wa Bbabbilooni, mani abeeta nimubona.

²² Olwohuba abo boombi, abaambe boosi abatula mu Buyudaaya abali mu Bbabbilooni bachia ohwehoonyera ameeta kaabwe nibabwaaba nibaboola bati: “Omwaami ahuhole koti Sedekia neende Ahabbu, ba mutuki wa Bbabbilooni yasaamba omuliro.

²³ Esyo sichia ohubakwaaho olwohuba baholere ebyoobucheke neende abahasi ba baasyaabwe, haandi baalomaloma emboosi ch'obubacha chi tabalagira nibehoonyera eliita lyaange. Omwaami niye oboola.”

Ebbarwa ya Semaya

²⁴ Eyiri Semaya owa Nehelamu, boola oti:

²⁵ Omwaami w'Obunyala, Nasaae wa Yisiraeli aboola ati: Watuma ebbarwa nyiingi mu liita lyao eyiri abaandu boosi abali mu Yerusalemu, neende eyiri Sefania omwaana w'omulaamisi Maseya, neende eyiri abalaamisi boosi noboola oti,

²⁶ Omwaami yahuhola omulaamisi mu bweyaango bw'omulaamisi Yehoyada, ohwiimirira enyuumba y'Omwaami. Mulimo kwao ohubona oti buli yeesi oweehola omunabbi ahoyera sa ohuboywa mu jeela.

²⁷ Bulaanu, lwasiina haba siwahola otyo hu Yeremia owa Anatooti oli ohulaangiriraanga koti omunabbi eyiri abaandu?

²⁸ Olwohuba Yeremia oyo atutumire mu Bbabbilooni n'aboola ati, Obuboye bweeng'we buchia ohuba obuleeyi; yoombahe eyuumba mani muchimenyemo, haandi lime endalo mani mulye ebyaamo byachio.

²⁹ Mani Sefania omulaamisi naasoma ebbarwa yino, omunabbi Yeremia n'awulira.

³⁰ Omwaami n'aboolera Yeremia ati:

³¹ “Tuma emboosi eyiri ababoye boosi noboola oti, ‘Omwaami aboola ebidiira hu Semaya owa Nehelamu ati: Olwohuba Semaya yalaangiriraangaa yi muli niitamutumire, mani yakera mweesika eby'obubacha,

³² mani sakira Omwaami aboola ati: Bone, njia ohusaandya Semaya owa Nehelamu neende olwiibulo lwae, haba saachia ohuba neende omuundu yeesi mweeng'we ochia ohubona ebilai bi njia ohuholera abaandu baange, olwohuba yalomaloma ebibaleetera ohujeemera Omwaami. Ese Omwaami, Niise oboola.’ ”