Yeremia 24 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ebikono by'Enduli bibiri

¹ Nebukadineesa, omutuki wa Bbabbilooni niyali naamalire ohutusa mu Yerusalemu, Yekonia omwaana wa Yehoyakimu, omutuki wa Buyudaaya yamuyira mu jeela, alala neende abachweenufu bae, neende Abetaanyi, alala neende abamanyirifu mu mirimo. Omwaami yanjekesa ohubonehera huno: Bone, ebikono bibiri eby'enduli, byali nibiteerwe mu moni w'enyuumba y'Omwaami.

² Esikono silala, syalimo enduli ndai, echitaangirira ohweenga. Nae esikono siindi syalimo enduli mbi muno, echitanyala huliibwa daawe.

³ Mani Omwaami naateeba ati: “Yeremia, obona siina?” Naange ningobolamo endi, “Mbona enduli ndai muno, neende embi muno echitanyala ohuliibwa daawe.”

⁴ Omwaami yamboolera ati:

⁵ “Ese, Omwaami Nasaae wa Yisiraeli mbona endi abaandu bano bali koti enduli milai abahoonyere ohutula mu Buyudaaya, mani bayirwe mu syaalo ch'Abakalidaaya.

⁶ Ndahabakwiire esisa, mani mbakobose mu syaalo sino. Njia ohuboombaha mani haye ohubalikula; njia ohuboombaha mani bahaye ohweeyiya.

⁷ Njia ohubaberesa omwooyo kumanya kuti, Niise Omwaami. Mani bachia ohuba abaandu baange, haandi njia ohuba Nasaae waabwe. Olwohuba bachia ohukobola yi ndi neende omwooyo kwaabwe kwoosi.”

⁸ Nae Sedekia, omutuki wa Buyudaaya, neende abachweenufu bae, neende abomu Yerusalemu, abadoong'a mu syaalo sino, neende abo abali mu syaalo sya Misiri, ese Omwaami mbona endi bali koti enduli mbi echitanyala ohuliibwa daawe.

⁹ Njia ohuboosaho esibi, mani obwaami bwohu syaalo bwoosi butye. Abaandu bahabanyekeenge, beehola olukaado yibali; bahabacheheenge, haandi bahehoonyereenge eliita lyaabwe nibabwaaba, buli abuundu yi ndahabasalaanisirye.

¹⁰ Njia ohubasiindihamo ebiita, enjala, neende oluumbe, ohwoola lu ndahabasihirisiire elalira mbamale mu syaalo si ndababeresa alala neende bakuuka yaabwe.