Yeremia 23 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esuubi mu biha biichayo

¹ Omwaami aboola ati: Chibaakaanire, abeemirisi abo abasihirisa haandi abasalaania abaandu b'Omwaami.

² Mani sakira Omwaami, Nasaae wa Yisiraeli, aboola bino ebidiira hu beemirisi bachuunirwa abaandu baange ati: “Haba simwadeebaho hu baandu baange, mani nimubeerusa nibasalaana. Bone, bulaanu njia ohubasaandya ohweema hu sibi simwahola.

³ Mani njia ohubuusa alala abaandu baange ohutula mu byaalo bi basalaaniramo, mbakobose mu syaalo syaabwe. Baheebule mani beengiiye muno.

⁴ Njia ohudoola abeemirisi abanaabadeebeengeho, mani bahayeenge ohutya neende ohweyendehereraanga haandi, mani abuleo onyala ohukota daawe. Ese Omwaami, Niise oboola.”

⁵ Omwaami aboola ati: “Bone, esiha syahoole, mani ndoole omutuki muluungifu ohutula hu lwiibulo lwa Daudi. Omutuki oyo niye owahatuke neende amakesi haandi yahahole ebyadyeeri neende eby'obuluungifu mu syaalo.

⁶ Mu biha byae, abaandu bomu Buyudaaya bahabe bulai, neende abomu Yisiraeli bahabe neende omuleembe.” Mani bahamulaangeenge bati: Omwaami niye obuluungifu bweefwe.

⁷ Omwaami aboola ati: “Mani sakira, bone, endaalo chahoole, abaandu bahaye ohuboola bati, ‘Koti lu Omwaami ali omulamu, oyo owatusa Abaisiraeli mu syaalo sya Misiri.’

⁸ Nae bahaboole bati: ‘Koti lu Omwaami ali omulamu, oyo owatusa Abaisiraeli mu syaalo sy'emukulu neende mu byaalo byoosi bi bali nibasalaaniiremo.’ Mani bachia ohumenya mu syaalo syaabwe syeene.”

Emboosi ya Yeremia eyilomaloma hu Banabbi

⁹ Ebidiira hu banabbi: Omwooyo kwaange kufuniihe, amakuumba kaange koosi kateengereha. Ndi koti omuundu omeerere, oyo yi malwa kahirire amaani, hulw'Omwaami neende hulw'emboosi chae njoolerefu.

¹⁰ Olwohuba esyaalo siichulemo abaandu batomiirira hu Omwaami. Abaandu balira olwohuba Omwaami yalaama esyaalo, haandi olwaayiro lwoomereere. Abaandu bano b'ebiima bibi, haandi beehoonyera bubi obunyala bwaabwe.

¹¹ Abanabbi alala neende abalaamisi baholi b'ebibi; ndabanyoola nibonoonera neende mu nyuumba yaange yeene. Omwaami niye oboola.

¹² Mani sakira, engira yaabwe yahabe koti emihoosi miterere haandi ekyomu siirima. Balibasiindiha mani baakwa. Olwohuba njia ohubakwiisaho esibi mu biha byaabwe byohu saanda. Omwaami niye oboola.

¹³ Mbweene esyonoono mu banabbi bomu Samaria. Batusa obunabbi mu liita lya Bbaali nibakosa abaandu baange bomu Yisiraeli.

¹⁴ Haandi mbweene esiindu sibi muno mu banabbi bomu Yerusalemu. Bahola obucheke haandi baabacha. Bakwiira abahola-mbi, mani abulao onyala ohukaluuhana yaaleha ebyonoono byae. Boosi-boosi, mbona endi bali koti abaandu ba Sodomu haandi abaandu bamwo bali koti aba Gomora.

¹⁵ Mani sakira Omwaami w'Obunyala aboola ebidiira hu banabbi ati: “Bone, njia ohubaliisa emisaala kihahaata; haandi mbaberese amaachi kalimo obutwa, bang'we. Olwohuba abanabbi bomu Yerusalemu basalaanisire ebiholwa bibi mu syaalo syoosi.”

¹⁶ Omwaami w'Obunyala aboola ati, “Mutawuliraanga emboosi ch'abanabbi balaangirira yi muli, nibabasuubisa ebiindu bi bachia ohubahoonya. Bababoolera ebiindu bi beene babaasa sa, ebitatula eyiri Omwaami.

¹⁷ Abanabbi abo bemeedaanga sa ohuboolera abaandu balekeeresa Emboosi y'Omwaami bati, ‘Mutadeebayo, ebiindu bichia sa ohuba bulai.’ Mani buli muundu w'omwooyo mwoomeranu bamuboolera bati, Sibulao esibi sinaahukweeho,”

¹⁸ Nae wiina hu banabbi abo owali naamanyire ebibaaso bw'Omwaami? Abulao owali naawuliireho emboosi yae, oba owali naawuliire mani yaataaho omwooyo kwae hu biindu bi Omwaami yali naaboolere.

¹⁹ Bona, obwaalaba bw'Omwaami buli koti omuyaka kw'amaani; koti esiifuusye sy'amaani muno, esiwuucha hu mitwe ky'abahola-mbi.

²⁰ Etima ly'Omwaami haba silyahakwe ohwoola lu yahaholere haandi yooseresa esyo syaaheengereo ohuhola. Mu biha ebyo, abaandu baange bahamanye bulai esy'ohuhola.

²¹ Omwaami yaboola ati, “Haba sindatuma abanabbi abo, nae abeene beetuma sa. Haba sindababeresa emboosi yoosi, nae abeene beelomalomera sa mu liita lyaange.

²² Nae baba nibamanya ebibaaso byaange, bahayirire emboosi yaange eyiri abaandu baange, mani bahakaluuhaane baatula hu biima byaabwe bibi, neende hu biholwa byaabwe bibi.”

²³ Omwaami aboola ati: Ese ndi Nasaae oli buli abuundu nae otaali abuundu alala.

²⁴ Abulao omuundu onyala ohweekisa abuundu woosi mani ndaahaya ohumubona. Haba simumanyire muti ndi muukulu neende mu syaalo?

²⁵ Mbuliire koti lu banabbi abo balaangirira eby'obubacha. Balaangirira nibehoonyera eliita lyaange, nibaboola bati, ndootere, ndootere.

²⁶ Abanabbi abo bahoole yeena mu hukosya abaandu baange, nibababoolera eby'obubacha, haandi nibalaangirira eby'obubacha ebiri mu myooyo kyaabwe?

²⁷ Babaasa bati, ebilooto byaabwe nibyo ebilai, mani binaakere abaandu baange baanjibirira, baakobola eyiri Bbaali?

²⁸ Leha omunabbi olootere esilooto abooleenge ati, esyo silooto sa nisyo, nae oyo oli neende emboosi yaange, ayilaangirireenge mu bweesikwa. Omwaami ateeba ati, omuhuuchi kwahabaaho nasilala neende engaano?

²⁹ Omwaami aboola ati, emboosi yaange yiri koti omuliro, haandi koti enyuundo yaata olwaanda.

³⁰ Mani sakira, Omwaami aboola ati, bone, ndi ohulwaania abanabbi, abo ababukula emboosi ch'abasyaabwe.

³¹ Omwaami aboola ati, haba siindaha abanabbi abo, abehoonyera emboosi chaabwe mani haandi baaboola bati, Omwaami aboola.

³² Omwaami aboola ati, bone, nyiingania abanabbi abo abalaangirira ebilooto byaabwe by'ohubacha, nibakosya abaandu baange hulw'obubacha baabwe obwo, neende ohusangaalira ebitaalimo. Haba simbatumangaaho daawe, oba mbalagiraho daawe; mani babula obuhoonyi bwoosi eyiri abaandu baange.

Omugugu kw'Omwaami

³³ Omwaami yamboolera ati: Mulala hu baandu baange, oba omunabbi, oba omulaamisi n'ahuteeba ati: Omugugu kw'Omwaami kuli yeena? Ochia ohubakobolaangamo oti; Niing'we Omugugu, haandi njia ohubasukuna.

³⁴ Nae omunabbi oyo, oba omulaamisi oyo, oba omuundu mulala yeesi oboola ati, Omugugu kw'Omwaami, njia ohusaandya omuundu oyo neende abomu nyuumba yae.

³⁵ Ohutusaho, buli muundu ateebeenge owaasye, haandi buli muundu ateebeenge mwanaang'ina ati: “Omwaami akoboolemo atye” oba “Omwaami aboolere atye?”

³⁶ Nae batehoonyeraanga emboosi chino haandi mbwe: “Omugugu kw'Omwaami,” olwohuba oyo owahehoonyere emboosi echo, okwo nikwo okwahabe omugugu kwae; abaandu bakodya-kodya emboosi cha Nasaae mulamu, Omwaami w'Obunyala, Nasaae weefwe.

³⁷ Mani ewe Yeremia, teeba abanabbi oti, Omwaami akobolemo siina oba “Omwaami aboolere siina?”

³⁸ Nae nibehoonyera emboosi chino, “Omukuku kw'Omwaami,” nae Ese ni hutumire, nimboola endi, Bataboola bati, “Omugugu kw'Omwaami.”

³⁹ Mani sakira, bona, njia ohubakiinga mbasukune eyale, abo alala neende esiko si ndababeresa, alala neende bakuuka yaabwe.

⁴⁰ Mani njia ohubaleetaho esoni neende ohuwumumala hw'endaalo choosi, ohutahebirirwe daawe.