Yeremia 22 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Ohulaangirira hwa Yeremia eyiri enyuumba y'obutuki yomu Buyudaaya

¹ Omwaami yamboolera ati: “Yihirira ochie mu dooho ly'omutuki wa Buyudaaya, mani olomalomereyo emboosi chino,

² oboole oti: Ewe omutuki wa Buyudaaya, owiihala hu sisaala sy'obutuki sya Daudi, ewe, neende abahalaabani bao, neende abaandu bao abeengirira mu biruwa bino, wulire Emboosi y'Omwaami.”

³ Omwaami aboola ati: Holeenge ebyadyeeri haandi ebiluungifu, mani mukayirire abo abafwiinyirirwa neende ababanyakireho. Mutaholaangaho esibi, oba mwaalabira bawalukeenda, oba abaana bafwiirwe, oba abahasi bafwiirwe, noomba mweedisa amabaanga kabulaho omusaango abuundu woolerefu ano.

⁴ Olwohuba nimudiirira elalira emboosi chaange, ao mani ab'olwiibulo lwa Daudi baba bachia ohubeechaanga abatuki. Baba bachia ohwiingiriraanga mu biruwa byomu dooho lino, nibali hu bigaari neende hu faraasi. Abeene, neende abahalaabani baabwe, neende abaandu baabwe.

⁵ Omwaami aboola ati: Nae nimutadiira emboosi chaange, omweene ndeechuba endi, edooho lino liba lichia ohuba ekuunda.

⁶ Olwohuba Omwaami aboola ebidiira hu dooho ly'omutuki wa Buyudaaya ati: “Eyiri ese, edooho ly'omutuki wa Buyudaaya, lai muno koti elyomu syaalo sya Gileadi, haandi koti olugulu lwa Lebbanooni. Nae njia ohulihola libe ekuunda, esiko sitaalimo abaandu.

⁷ Njia ohutekeha abasihirisi balilwaanie, buli otulayo neende ebilwaaniso byae.” Mani bachia ohutema emisaala kya Keduro kihiramo obulai, bakisukune mu muliro.

⁸ Luunyuma, abateende baangi bahabite aambi neende esiko sino, mani abeene-na-beene bahateebaneenge bati, Lwasiina Omwaami, yahola esiko sino atyo?

⁹ Mani balibakobolamo bati, Olwohuba baleha Endagaano y'Omwaami, Nasaae waabwe, mani beenamira banasaae baandi haandi babahalaabanira.

Ohulaangirira hwa Yeremia eyiri Yowahasi

¹⁰ Abaandu bomu Buyudaaya, mutalira omutuki Yosia owafwa, oba mwaacherenjesa daawe; nae mulire muno omwaana wae Yowahasi, olwohuba bali ohumuyira mu buwaambe, nae haba siyahakobole daawe ohubonaho esyaalo syaabwe syeene.

¹¹ Olwohuba Omwaami aboola ebidiira hu Yowahasi, omwaana wa Yosia, omutuki wa Buyudaaya, oyo owatuka mu bweyaango bwa Yosia laatang'ene, haandi owatula mu bweyaango buno ati: “Haba siyahakobole ano haandi.

¹² Nae yahafwiire eyo yi bamuyirire koti omuwaambe, haandi haba siyahaboneho esyaalo sino.”

Ohulaangirira hwa Yeremia eyiri Yehoyakimu

¹³ “Chimwaakaanire oyo owoombaha enyuumba yae mu ngira yitaali enuungifu mani nayitakalasa mu ngira yitaali eyadyeeri; oyo otatuunga abo abamuhalaabanira, haandi yahaya ohubaberesa omusaara kwaabwe.

¹⁴ Chimwaakaanire oyo oboola ati, ‘Njia ohwoombaha enyuumba hoongo eyirimo ebiseenge bihoongo.’ Njia ohutaaho amadirisa, njia ohuyitaamo embaao ch'emiseengese mani njibahe eraangi njahanyu.

¹⁵ Obaasa oti oli omutuki olwohuba wombahiire enyuumba yao emiseengese chihira ech'abaandu baandi? Laatao yalichaanga haandi yang'wechaanga mani naahola ebyadyeeri haandi ebiluungifu. Mani naaba bulai.

¹⁶ Emisaango ky'abamanani neende abali mu budahano yakiheenganga bulai. Ohwo nihwo ohuumanya. Omwaami niye oboola.

¹⁷ Nae ewe oli neende emoni neende omwooyo kudeeba hu hunyoola obuyiinda mu ngira yitaali endai. Olwohuba wiita abaandu bataaliho omusaango, haandi ofwiinyirira bao neende obwaalaba.” Omwaami niye oboolere.

¹⁸ Mani sakira Omwaami aboola ebidiira hu Yehoyakimu, omwaana wa Yosia, omutuki wa Buyudaaya ati: “Haba sibachia humulira, oba ohuboola bati, ‘Wuuwi mwaanama!’ oba ‘Wuuwi mboocho yaange!’ Habi sibachia humulira, nibaboola bati: ‘Wuuwi Omwaami!’ oba ‘Wuuwi ow'oluyaali!’

¹⁹ Yahasiihwe koti esuhiri, yahahwehweeswe yaasukunwa erwaanyi w'ebiruwa bya Yerusalemu.”

Emboosi ya Yeremia yidiira humbeera ya Yerusalemu

²⁰ “Abaandu bomu Yerusalemu, muniine hu Lebbanooni, mani muhuumule, haandi muchie mu syaalo sya Bbasani, mani musiingise ekono. Mulire nimuli hu ngulu cha Abbariimu, olwohuba abaandu bamweesika boosi basihiriiswe.

²¹ Omwaami yalomaloma naang'we nimusisiiri bulai. Naang'we nimuboola muti, ‘Haba sihuchia hutekeeresa daawe.’ Olwo nilwo lu mwanaliirira ohuhola ohutula mubuyere bweeng'we, mwahayira elalira ohuwuliraanga bi mboola.

²² Abeemirisi beeng'we boosi bahawuuchwe neende omuyaka, haandi abaandu bamweesika bahawaambwe mu biita. Mwahadiirwe esoni mani mwateng'eng'ala hulw'ebyonoono byoosi bi mwahola.

²³ Eng'we abali mu muleembe, abamenya mu nyuumba ch'emituumba chimwatusa Lebbanooni, mwahekanyiirise amasira nikabakwiireho, obuchuuni bweeng'we bwahabe koti oby'omuhasi olumwa engasi.”

Nasaae aheengera Yehoyakimu omusaango

²⁴ Omwaami aboola ati: “Koti lu Ese ndi omulamu, ewe Koniya omwaana wa Yehoyakimu, omutuki wa Buyudaaya, kata wahaba niwefwaalire engila hu muhono kwao muluungi, nae ndahahufwaaluuleho

²⁵ mani ndahudiisa mu mahono k'abaandu bakiiya obulamu bwao, mu mahono k'abaandu babi b'otya. Ndahahudiise mu mahono ka Nebukadineesa, omutuki wa Bbabbilooni neende mu mahono k'Abakalidaaya.

²⁶ Ewe neende maakoo ohwiibula, njia ohubahweehweesa mbayire mu syaalo siindi, si muteebulirwamo daawe, mani eyo niyo yi mwahafwiire.

²⁷ Nae mwahekoombe ohukobola mu syaalo sino, nae haba simwahasikobolemo daawe.”

²⁸ Omusaacha wuno Koniya, yeeholere koti olukyo lwaadiha, olusukuunwe, mani naabulao oludeebaho daawe. Lwasiina Koniya neende abaana bae bahweehweeserwe mani baasukunwa mu syaalo sibataamanyireho daawe?

²⁹ Ewe esyaalo, esyaalo, esyaalo, wulira emboosi y'Omwaami!

³⁰ Omwaami aboola ati: “Muyire omusaacha wuno koti otaaliho neende abaana. Omusaacha otanyoolaho ehabi mu bulamu bwae. Olwohuba, mulwiibulo lwae, abulao haandi owahatukeho Buyudaaya, mani niyeehala hu sisaala sy'obutuki sya Daudi.”