Yeremia 18 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yeremia naali mu nyuumba y'omuloongi w'endamu

¹ Omwaami yamboolera ati:

² “Siingira, wiihirire ochie mu nyuumba y'omuloongi w'endamu, eyo niyo yi njia ohuhuboolera esy'ohuhola.”

³ Ndeemao ndeehirira ndaachia ew'omuloongi w'endamu, mani ndaamunyoola naali hu mulimo kwae.

⁴ Buli siindu si yaloongaanga nisyanyasihiraanga mu mahono kae, yanyoobaanga eloba elyo haandi, mani aloongamo esiindu siindi koti lwaadaha.

⁵ Haandi Omwaami yamboolera ati:

⁶ “Eng'we Abaisiraeli, mubaasa muti, Ese haba siinyala ohubahola hooho esiindu koti lu muloongi w'endamu wuno yahola hu loba li yali naaloongera? Bone, koti eloba liri mu mahono k'omuloongi w'endamu, nilwo lu mwesi muli mu mahono kaange, eng'we Abaisiraeli.

⁷ Niimboola endi njia ohwiiya, oba ohulikula, oba ohusihirisa esyaalo oba obwaami,

⁸ nae esyaalo esyo sikaluuhana, syaakama ohwonoona, mba njia ohweyolobya mani haye ohuhola esiindu si ndali nimboolere ohusihola.

⁹ Nae niimboola endi njia ohwoombaha oba ohutaaka esyaalo oba obwaami,

¹⁰ nae esyaalo esyo syonoona mu moni waange, haandi sihaya ohuwulira ekono lyaange, mba njia ohuhola esiindu si ndali nimboolere ohusihola.”

¹¹ Sakira bulaanu, boolera abaandu bomu Buyudaaya neende abo abamenya mu Yerusalemu oti: Omwaami aboola ati, Bone, ndi ohutekeha ohubaholaho esibi, haandi ndi omwetekefu ohubasaandya. Kobole, buli muundu alehe ebiima byae bibi, akololose obulamu bwae neende ebiholwa byae.

¹² Nae bachia ohuhukobolamo bati: “Ebyo bya bihaya! Efwe huchia ohuloondakana sa neende endekeha yeefwe yeene, mani buli muundu ahole ohuchianakana neende omwooyo kwae mwoomeranu haandi omubi.”

Abaandu bebwaaba Omwaami

¹³ Mani sakira Omwaami aboola ati: “Muteebeho mu byaalo. Aliwo owaali nawuliireho esiri sityo? Abaandu ba Yisiraeli baholere esiindu sibi muno.

¹⁴ Mani enjafwa ch'olwaanda lw'aakulu lwa Lebbanooni chahawaamo omunyiti? Emyaalo ky'amaachi manyifu kyahatula mu lugulu, mani kyaakamaanga ohuhulukusa?

¹⁵ Nae abaandu baange baanjibiriire, baanioohesa obubbaani eyiri banasaae bataali abadyeeri. Batulire hu ngira chaabwe chi bakeenderaangaho ohutula hale, mani nibakeendera hu mihoosi, ataali hu ngira hoongo.

¹⁶ Esyaalo syaabwe basiholere esitiisa, esiindu sibanalekeereseenge endaalo choosi. Buli muundu obita aambi nasyo anaaticheenge mani naayuuya sa omutwe kwae.

¹⁷ Abaandu baange ndahabasalaanie mu moni ch'abasuku baabwe, koti lu muyaka kw'ebukwe kudumuula olufu. Amasira nikahabakweeho, njia ohubafudatira, haba siinjia ohubahoonya daawe.”

Ohweehoba hw'ohulya olukwe mu Yeremia

¹⁸ Abaandu beemao baaboola bati: “Mwiiche, lehe hulye olukwe mu Yeremia. Nihumumalao, haba sihunaahaywe abalaamisi ohutweekesa, noomba abaandu bakesi ohutukerakira, noomba abanabbi ohutuyaalira emboosi ya Nasaae. Mwiiche, lehe humuteeho omusaango, mani hwaakame ohuwulira emboosi ch'aboola.”

¹⁹ Sakira ndasaba endi: “Ewe Omwaami, tekeeresa, mani owulire bi basuku baange bali ohuunomanomaho.

²⁰ Esilai mani situungwaangaho neende esibi? Nae nabo bayabire eliina nibadaha bati ngweemo. Ewe Omwaami, yichulisa koti lu ndeema mu moni wao nihwekweeda hulwaabwe, endi ohaye ohubadiirira etima.

²¹ Mani sakira, leha abaana baabwe balumwe enjala bafwe, haandi beeterwe mu biita. Leha abahasi baabwe badoong'e nibabula abaana, haandi koti abahasi bafwiirwe. Leha abasaacha baabwe bafwe amalwaae, nae abaraaga baabwe beeterwe mu biita neende olugaanga.

²² Batumire omukaanda kw'abanyaka, kunyake ebiindu byaabwe nibataamanyire, mani boobbe embuungu mu madaala kaabwe. Olwohuba bayaba eliina nibadaha bati ngweemo, haandi baateka emiteego nibadaha bati chindiire.

²³ Nae, ewe Omwaami, omanyire ehobo chaabwe ch'ohuunjita choosi. Otabaleheramo esyonoono syaabwe, noomba weebirira esyonoono syaabwe. Leha basukunwe batule mu moni wao; basaandye n'obanyoolereere.”