Yeremia 15 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Amasira hu baandu bomu Buyudaaya

¹ Omwaami yamboolera ati: “Kata Musa neende Samueli baheema mu moni waange, haba siinyala ohukwiira abaandu bano esisa. Beeruse batule mu moni waange, baweeo.”

² Nae nibahuteeba bati, baweeo, bachie yeena. Obakobolamo oti, Omwaami aboola ati: “Ab'ohufwa oluumbe, bachia eyiri oluumbe, haandi ab'ohwiitwa neende olugaanga, bachia eyiri olugaanga. Ab'ohufwa enjala, bachia eyiri enjala. Ab'ohuyirwa mu jeela, bachia mu jeela.”

³ Omwaami aboola ati: “Njia ohubateerao embya chine och'ohubasihirisa: olugaanga ohubafumita, embwa ohubaboosyoola, amayoni ohubasoosomola, neende esolo ndeende ohubanyoonyobola

⁴ Njia ohubahola esy'ohwesiinduha eyiri obwaami bwohu syaalo bwoosi, hulw'ebyo bi Manaase omwaana wa Hesekia omutuki womu Buyudaaya yahola mu Yerusalemu.”

⁵ Omwaami aboola ati: “Ewe Yerusalemu, wiina mweene olihukwiira esisa, oba yaahudiirira engisa? Wiina mweene olikabuha ohuhuteeba koti lu oli?

⁶ Ewe wandekaana, mani wemeeda ohuufudatira. Mani sakira hukololeere omuhono, husihirise. Njoong'ere ohuhukwiira esisa.

⁷ Mu buli biruwa byomu syaalo sino, mbasereechere koti osereecha omuhuuchi. Ndeeta abaana baabwe, ndasihirisa abaandu baange; olwohuba bahayira mu biima byaabwe bibi.

⁸ Abahasi bafwiirwe mu syaalo syaabwe bemeedere muno ohuhira omusenye kwohu nyaanja. Ndeeta abaraaga baabwe nibasisiiri neende amaani, mani engisa niyidiira bang'inaabwe. Naabakwisaho amasira neende ebitiisa nibataamanyire daawe.

⁹ Omuhasi weebula abaana bataanu aweeremo amaani abbwoyoohere; obulamu bu muweereeremo elalira. Obwiire bumwiriire nisisiiri esideete. Esoni chimudiirire mani yaawumumala. Mani njia ohuleha abasuku beeng'we, babeete eng'we abasiidoong'ereo, Omwaami niye oboola.”

Yeremia yekanyiirisira Omwaami

¹⁰ Chiinjakaanire! Lwasiina maama yanjibula. Soolana haandi ndayiingana neende buli muundu hu syaalo syoosi. Haba sindewolaangaho eseende, oba abaandu bandeeyolaho, nae buli muundu yabwaaba.

¹¹ Ewe Omwaami, leha ebibwaabo byaabwe byoolerere niimba nitahuhalaabaniraanga bulai, haandi niimba nitekongooyeraanga omusuku waange naali mu bidinyu neende amasira.

¹² Aliwo omuundu onyala ohufunaka esyuuma neende esikomo, ohuhira elalira ebyo ebitula mu syaalo sy'emukulu?

¹³ Omwaami aboola ati: “Emyaandu kyeeng'we neende obuyiinda bweeng'we njia ohubiberesa babinyake, abula ohutuungwa, hulw'ebyonoono byeeng'we bi mwahola mu syaalo syeeng'we syoosi.

¹⁴ Njia ohubahola mube abahalaabani b'abasuku beeng'we mu syaalo si mutaamanyire daawe, olwohuba etima lyaange lyaaduha koti omuliro kutahasime daawe.”

¹⁵ Mani niimboola endi: Ewe Omwaami, wumanyire; njichulise mani wuhoonye. Wetuunge abo abadaha ohuunjita. Otabesimiirisa ohuunjita; manya oti nyekwa hulwao.

¹⁶ Walomaloma naange, mani ndaatekeeresa buli mboosi. Mani emboosi chao chandeetera esangaalo neende ohweehoya mu mwooyo. Olwohuba ndi owao, ewe Omwaami, Nasaae w'Amaye.

¹⁷ Haba sindeehale alala neende abaandu mu bidyaalo byaabwe, oba kata ohubisangaalira. Nae ndeehalaanga syeng'ene, olwohuba waali naange, mani ni njichula etima lyao.

¹⁸ Lwasiina obuchuuni bwaange haba sibwaakama daawe? Lwasiina ebikoonjo byaange haba sibiwona? Lwasiina bihaire ohuwona? Wundehooleere ahaalo hadiidi ahateesikiha, ahahamamo amaachi mu siminyu.

¹⁹ Mani sakira Omwaami yamboolera ati: “Nookobola yi ndi, njia ohuhukobosa hu mulimo, haandi ochia ohweema mu moni waange. Noolomaloma emboosi ndai, mani waaleha emboosi chitaalimo obuhoonyi, oba wahalomalome mu liita lyaange. Abaandu bahakobole yooli, nae ewe haba siwahakobole yi bali.

²⁰ Mani njia ohuhuhola obe koti olukaka lw'esikomo eyiri abaandu bano. Bachia ohuhulwaania, nae haba sibahahuyiingire daawe, olwohuba ndi naawe ohuhuhoonya neende ohuhununula, Omwaami niye oboola.

²¹ “Njia ohuhununula ohutula mu mahono k'abahola-mbi, haandi hwabine ohutula mu bunyala bw'abaandu baalaba.”