Yeremia 13 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Esinyaasa sy'elaasi

¹ Omwaami yamboolera ati: “Chia mani okule esinyaasa sy'elaasi, mani wefwaale, nae haba otasiiniha mu maachi daawe.”

² Mani niingula esinyaasa koti lu Omwaami yali naaboolere, ndaasyeeboya mu sibuno.

³ Haandi Omwaami yamboolera ehabi lyoohubiri ati:

⁴ “Bukula esinyaasa sy'okulire, si weeboyere mu sibuno esyo, mani osiingire ochie hu mwaalo kwa Ewufuraate, osikise mu lwaafwa lw'olwaanda.”

⁵ Mani niinjia niisikisa aambi neende omwaalo kwa Ewufuraate koti lu Omwaami yali niyandagiire.

⁶ Mani endaalo nyiingi nichibitireo, Omwaami yamboolera ati: “Siingira, ochie hu Ewufuraate, otuseyo esinyaasa si ndahulagira ohusikisamo.”

⁷ Mani niinjia hu Ewufuraate, niindusayo esinyaasa esyo abuundu yi ndali ni sikisire. Nae bona, esinyaasa esyo syali nisinyasiihe; nisibulamo obuhoonyi bwoosi daawe.

⁸ Omwaami yalomaloma naange haandi niyamboolera ati:

⁹ Olwo nilwo lu ndahasihirisire ohwehuduumbasa hw'Abayudaaya neende ohwehuduumbasa hw'amaani hw'abaandu bomu Yerusalemu.

¹⁰ Abaandu bahaya ohuwulira emboosi yaange yi mbaboolera babi nibo. Booma emitwe mani baloondakana neende ebibaaso by'emyooyo kyaabwe, nibeenamira haandi nibahalaabanira banasaae baandi. Mani bahabe koti esinyaasa sino, esibulamo obuhoonyi bwoosi daawe.

¹¹ Olwohuba koti esinyaasa syoomiirira mu sibuno sy'omuundu, nilwo lu ndaha abomu Buyudaaya baanyomiirireho, Omwaami niye oboola, hu banyale ohuba abaandu baange, abaleetera eliita lyaange efuma neende oluyaali. Nae nabo bahaya ohuwulira.

Ebbuka ly'efiini

¹² Omwaami Nasaae mani niyamboolera ati: Yeremia, boolera abaandu bomu Yisiraeli oti, Omwaami, Nasaae wa Yisiraeli aboola ati “Yichusa mu buli jaagi y'efiini.” Nabo bachia ohuhukobolamo bati, Obaasa oti haba sihumanyire huti buli bbuka liri n'ohwiichuswamo efiini?

¹³ Ao mani ochia ohubaboolera oti, Omwaami aboola ati: Bone, njia ohwiichusa obumeesi mu baandu bomu syaalo sino boosi: abatuki beehaale hu sisaala sya Daudi, abalaamisi, abanabbi neende abo boosi abamenya mu Yerusalemu.

¹⁴ Njia ohukuuda-kuudania, balaataang'ene baana neende abaana basyaani nasilala, Omwaami niye oboola. Haba sindahasaasire, oba ndaawonia, oba ndakwiira esisa, ndaahaya ohubasihirisa.

Yeremia alabula abaandi ebidiira hu hwehuduumbasa

¹⁵ Omwaami aboolere ati, Tekeerese, mani muhaye ohwehuduumbasa.

¹⁶ Mwiise oluyaali mu Omwaami Nasaae weeng'we n'asisiiri ohuleeta esiirima, nimusisiiri ohweegumula hu ngulu haandi nimusisuubira obulafu achia ohubukaluhaanisia mani bweehole esiirima sya titititi.

¹⁷ Nae nimuhaya ohutekeeresa, njia ohulirira mu bweekisi ohwehuduumbasa hweeng'we. Njia ohulira muno, mani amasika kahulukuse, olwohuba abaandu b'Omwaami bayirirwe mu jeela.

¹⁸ Omwaami yamboolera ati, “Boolera omutuki neende ng'ina mutuki oti: ‘Mutule hu bisaala byeeng'we, olwohuba ekofia ch'obutuki chitulire hu mitwe kyeeng'we.’ ”

¹⁹ Ebiko bya Negebbu biikaalwe, mani abulao onyala ohubiikula. Abaandu bomu Buyudaaya boosi bayirirwe mu jeela, boosi-boosi bayirirwe mu buwaambe.

²⁰ “Yerusalemu, siingisa aakulu emoni mani obone abo abatula emukulu. Abaandu bahudiiswa ohuliinda, abaandu ba wasaangaalira, bali yeena?

²¹ Wahaboole otye, abo ba ewe mweene weekesa abo abali abeecha bao nibahahutuke? Haba si wahabe mubuchuuni obuli koti obw'omuhasi olumwa?

²² Nae nimweteeba mu myooyo kyeeng'we muti, ‘Lwasiina ebiindu bino bitukwiireho’ olwohuba esyonoono syeeng'we sihoongo muno sibwihuule engubo chao, mani sakira musaanda muno.

²³ Omuitiopia anyala ohukaluuhania efwaani y'esihoba syae, oba eengwe yakaluuhania amakoondo kayo. Mani eng'we mwesi abanaliirira ohwonoona, munyala ohuhola ebilai!

²⁴ Njia ohubasalaania koti omuhuuchi ku muyaka kutula mu siparara kusalaania.

²⁵ Omwaami aboola ati: Kuno nikwo omukabo kweeng'we, bino nibyo bi Omwaami abaheengereo, olwohuba mumwiibiriire mani mweesika banasaae bataali abadyeeri.

²⁶ Ese Mweene niise owahababwiihule engubo cheeng'we mani esoni chibadiire.

²⁷ Ese mweene mbweene eby'omusiro bi muhola. Mbweene koti lu muchia ohwiinamira banasaae, mani mwaaba koti bamalaaya neende abacheke. Koti lu mwabeenamiraanga hu bigulu byomu siino. Chibaakaanire, Eng'we abomu Yerusalemu! Mwahoole yeena nimusisiiri ohuba aboolerefu?”