Yeremia 12 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yeremia ateeba Omwaami

¹ Ewe Omwaami, mba ni ndayiingana naawe, niiwe owabeere owadyeeri. Nae leha ndeete amaliro kaange yooli. Lwasiina abahola-mbi bahulaahulana? Lwasiina abaandu bataali abeesikwa bali bulai?

² Wabataaka, mani beesa emisi; bahula mani baama ebyaamo. Bahulomalomaho buli ludaalo nae haba sibahudeebaho daawe.

³ Nae ewe Omwaami, wuumanyire; wumbonaanga, haandi omanyire oti hubaasaangaho. Hweesa abaandu abo koti amakoondi kachia ohusiinjwa. Babulemo ohwoola oludaalo lwo hwiitirwaho.

⁴ Esyaalo syahoome ohwoola liina, haandi obunyaasi bwomu siino bwaahooha? Olwohuba ebyonoono by'abaandu bikerere ebisolo alala neende amayoni byaafwa. Olwohuba abaandu baboola bati, Nasaae haba saabona ebiindu bi huhola.

Omwaami akobola mu Yeremia

⁵ Omwaami aboola ati: “Yeremia, ohwiiruha neende abaandu neende amakulu nibahujoong'a batyo, wahanyale otye ohwiiruha neende abo abali hu faraasi? Haandi n'otanyala ohweema mu syaalo sikwalaafu, wahole otye mu siparara sya Yorodaani?

⁶ Olwohuba bamwaanamaao beene neende abanaluyia bao, bosi bahulyaamo olukwe, bakwiire alala neende abo abahuyiingania. Otabetaaho daawe kata neende nibalomaloma naawe bulai.”

Engisa yidiira Omwaami hulw'abaandu bae

⁷ Omwaami aboola ati: “Ndebwaabire Yisiraeli, ndehere esyaalo si ndedoolera. Abaandu ba ndaheera muno, mbayaanireyo mu mahono k'abasuku baabwe.

⁸ Abaandu baange ba ndedoolera omweene baandeekaluhaanieho bali koti edalang'i yomu sichaha. Baanjalabiire; sakira mbasyuulire.

⁹ Abaandu baange ba ndedoolera omweene, bali koti eyoni li bayiima. Li bayiimi bebodoohaanie nibatulira embeka choosi. Muchie, mubuuse alala esolo ndeende choosi; muchileete chilye.

¹⁰ Abeemirisi baangi banyaasire endalo yaange y'emisabbiibbu, baseenakiire obulimo bwaange. Esyaalo syaange silai basiholere esiparara sibulamo abaandu.

¹¹ Baholere esyaalo syaange ohuba koti ekuunda; esiino lyoong'ene nilyo li mbona. Esyaalo syoosi siri koti ekuunda, nae abulao omuundu odeebayo.

¹² Abasihirisi batumalireho mu bigulu byomu siparara byoosi. Olwohuba olugaanga lw'Omwaami luchia ohusihirisa esyaalo syoosi. Abulao omuundu ali mu muleembe.

¹³ Bataaka engaano, nae nibakesa amawa. Badiindikirira muno, nae nibatanyoola engaanga yoosi daawe. Ekesa lyaabwe lichia ohubadiisa esoni olwohuba etima liingi ly'Omwaami.”

Ebiindu bi Omwaami asuubisa abasibiraane ba Yisiraeli

¹⁴ Omwaami aboola bino ebidiira hu balirwaana ba Yisiraeli abachia ohunyaasa esyaalo si ndaberesa abaandu baange Abaisiraeli ohuba esyaabwe: “Bone, njia ohutusa abaandu babi abomu syaalo syaabwe, haandi ndahatuse Abayudaaya mu mahono kyaabwe.

¹⁵ Nae niimalire ohubatusa mu syaalo syaabwe, ndahabakwiire esisa haandi. Ndahakobose buli muundu mu situundu syae neende mu syaalo syae syeene.

¹⁶ Syahoolerere abweene siti, buli muundu niyeeka bulai ebiima by'abaandu baange, mani nibeechuba nibaboola bati: ‘Koti lu Omwaami ali omulamu,’ kata koti beekesa abaandu baange ohweechuba eyiri Bbaali, mani abo bosi bahabalirwe mu baandu baange.

¹⁷ Nae esyaalo syahahaye ohuwulira, ndahasitusireo elalira haandi ndahasisihirise. Ese Omwaami Niise oboolere.”