Yeremia 11 - EBBAIBBO EMBOOSI YA NASAAE EYIRIMO EBITABO BILAANGWA DEUTEROKANONIKO

Yeremia neende Endagaano

¹ Omwaami yeemao yamboolera ati:

² “Ewe Yeremia, wulira emboosi ch'endagaano yino. Lomaloma neende abaandu bomu Buyudaaya neende abo abamenya mu Yerusalemu.

³ Baboolere oti, Omwaami Nasaae wa Yisiraeli aboola ati: Omuundu yeesi otawulira emboosi ch'endagaano yino mubwaabe niye.

⁴ Yino niyo Endagaano yi ndalagira bakuuka yeeng'we nindali nimbatusa mu syaalo sy'e Misiri, esyali nisibeeholeere koti omuliro kusaangulusa ebyuuma. Baboolere oti: ‘Tekeereseenge ekono lyaange haandi holeenge buli siindu sibalagira.’ Ao mani munabecheenge abaandu baange, haandi njia ohuba Nasaae weeng'we.

⁵ Njia ohwooseresa esichubo si ndeechubira bakuuka yeeng'we, endi ndahababerese esyaalo silai esihulukusa amabeere neende obuuhi, sibalimo bulaanu buti.” Mani nimboola endi: “Sibe sityo, Omwaami.”

⁶ Omwaami yamboolera ati: “Chia oyaalire emboosi chino choosi mu biko bya Buyudaaya neende mu ngira chomu Yerusalemu noboola oti: ‘Wulire emboosi ch'endagaano yino, mani muhole bi chiboola.’

⁷ Olwohuba nindali niindusa bakuuka yeeng'we mu syaalo sya Misiri, ndabalagira neende esiroonyo ohuumbuliraanga, haandi neende ohwoola buti mbalabula nimboola endi, ‘Wulireenge ekono lyaange.’

⁸ Nae nibahaya ohutekeeresa haandi sibawulira daawe, ohutusaho buli muundu yemeeda sa ohwoomaanga omutwe neende ohuloondakanaanga neende bi mwooyo kwae mubi kudaha. Ndabalagira ohuliindaanga Endagaano yino, nae nibahaya; sakira mbakwiisireho amasira kano koosi.”

⁹ Haandi Omwaami yamboolera ati: “Aliwo obujeemu mu baandu bomu Buyudaaya neende abo abamenya mu Yerusalemu.

¹⁰ Bakoboole hu bibi bya bakuuka yaabwe bahale, abahaya ohuwulira emboosi chaange. Bakoboole hu hwiinamiraanga banasaae neende ohubahalaabanira. Abomu Yisiraeli neende abomu Buyudaaya bahalaka Endagaano yi ndahola neende bakuuka yaabwe.

¹¹ Mani sakira Omwaami aboola ati, ‘Bone, ndi ohuleetaho esibi, mani abulao ochia ohuwonao; kata bahaandira batye ohubahoonya, haba siinjia huwulira echaabwe.

¹² Mani sakira abomu biko byomu Buyudaaya neende abo abamenya mu Yerusalemu bachia ohulirira banasaae baandi babanioohesera obubbaani, nae haba sibachia ohubawonia mu biha by'ebidinyu byaabwe.

¹³ Olwohuba eng'we abaandu bomu Buyudaaya, banasaae beeng'we beengiiye bali koti obuungi bw'ebiko byeeng'we. Haandi obuungi bw'alutaari chi boombaahe buli koti engira chiri mu Yerusalemu, ohwo nihwo hubanioohesera obubbaani eyiri Bali.

¹⁴ “Ewe Yeremia, haba siniiwe ohoyere ohusabira abaandu bano, oba ohubalirira, oba ohundekweeda hulwaabwe, olwohuba haba siinjia ohuwulira nibaasaba obuhoonyi mu biha by'ebidinyu byaabwe.

¹⁵ Abaandu baange ba ndaheera bali ohwonoona. Mani babaasa bati bali neende bunyala siina obwohuba mu nyuumba yaange? Babaasa bati obweyamo bwaabwe neende ebiyaanwa byaabwe binyala ohukayira amasira kali ohwiichia? Munyala ohusangaala?

¹⁶ Biluwo ebiha bi Omwaami yabalaangaanga ati: ‘Omuseituuni kuliho amasaafu maangi, omulai kuli neende ebyaamo bilai.’ Nae neende ohwaaduluhana huli koti ohw'ehubba, achia ohukutubulaho omuliro, mani amasaga kwakwo kachia ohusihirira.

¹⁷ Omwaami w'Obunyala, owaboombaha, niye olaangiriire amasira kachia ohubakwaaho. Olwohuba esyonoono sy'abaandu bomu Yisiraeli neende abomu Buyudaaya sibahola, basiingiise etima lyaange nibanioohesa obubbaani eyiri Bbaali.”

Olukwe ludiira hu bulamu bwa Yeremia

¹⁸ Omwaami yasiinjekesa ndaamanya; haandi yaanjekesa ebiholwa byaabwe bibi.

¹⁹ Nae ndali koti ekoondi doto loonga li bayira ohusiinja. Ndali nitaamanyire endi niise yibali ohuhobaanga nibaboola bati, “Lehe husihirise omusaala nikusisiiri neende ebyaamo byakwo, lehe humwiite atule hu syaalo, abuleo omuundu omwiichulisaho haandi.”

²⁰ Nae, Ewe Omwaami w'Obunyala, oheengaanga omusaango mu buluungifu, oteema omwooyo neende ebibaaso by'abaandu, leha mbone koti lu onetuunge eyiri baandu bano, olwohuba hudiisire ebidinyu byaange.

²¹ Mani sakira Omwaami aboola bino ebidiira hu baandu bomu Anatooti, abo abadaha ohumalao obulamu bwao, nibaboola bati: “Leha ohulaangiriraanga mu liita ly'Omwaami, ataali ao huchia ohuhwiita”

²² Mani sakira Omwaami w'Obunyala aboola ati: “Bona, njia ohubasaandya. Abaraaga baabwe baheetwe neende olugaanga; abaana baabwe basyaani neende abaana baabwe bahaana bahafwe enjala;

²³ mani abulao owahadoong'eo. Olwohuba ndeereo ebiha by'ohuleeta amasira hu baandu ba Anatooti, omwaaka kw'ohusaanda hwaabwe.”